ຮຽບຮຽງໂດຍ:ຕຸໄລເພັດ ພິມເມືອງ

ວັດໂພໄຊຊະນະຣາມ ຕັ້ງຢູ່ບ້ານຊໍາເໜືອເມືອງຊໍາເໜືອແຂວງຫົວພັນ ຊຶ່ງຫ່າງຈາກໃຈກາງເມືອງໄປປະມານ 1 ກິໂລແມັດ. ວັດນີ້ເຄີຍເປັນບ່ອນປະດິດສະຖານຂອງພະອົງຕື້ ອັນເປັນມິ່ງຂວັນຂອງແຂວງຫົວພັນ. ໃນປີ ຄ.ສ 1553 ສະໄໝເຈົ້າໄຊຍະເຊດຖາທິຣາຊຂຶ້ນຄອງຣາຊໄດ້ນໍາພາປະຊາຊົນສ້າງເຈດີ ແລະ ພະພຸດທະຮູບໃຫຍ່ຂຶ້ນຢູ່ທີ່ນະຄອນຫຼວງຂອງອານາຈັກລ້ານຊ້າງ (ນະຄອນຫຼວງວຽງຈັນໃນປັດຈຸບັນ) ເພື່ອເປັນສັນຍາລັກແຫ່ງໄຊຊະນະໃນການຕໍ່ສູ້ຕ້ານກັບສັກດີນາມຽນມາ ແລະ ເພື່ອເປັນບ່ອນສັກກາລະບູຊາຂອງ ປວງຊົນລາວ. ພະພຸດທະຮູບນີ້ມີຄວາມສວຍງາມ ແລະ ໜ້າເກງຂາມຫຼາຍຖືກຫຼໍ່ຂຶ້ນດ້ວຍທອງແດງ ແລະ ທອງເຫຼືອງ ຊຶ່ງມີນໍ້າໜັກ 1 ໂຕນ ດັ່ງເຫັນປະຈັກຕາຢູ່ທີ່ວັດອົງຕື້ ນະຄອນຫຼວງວຽງຈັນໃນທຸກວັນນີ້. ຫຼັງຈາກນັ້ນ, ເຈົ້າໄຊຍະເຊດຖາທິຣາຊ ກໍໄດ້ປະກາດໃຫ້ປະຊາຊົນພ້ອມກັນສ້າງເຈດີ ແລະ ພະພຸດທະຮູບໃຫຍ່ຂຶ້ນຢູ່ໃນເມືອງຂອງໃຜລາວ ເພື່ອເປັນສັນຍາລັກ ແລະ ລະນຶກເຖິງເຫດການດັ່ງກ່າວນັ້ນເຊັ່ນກັນ. ເຖິງວ່າທອງ ແລະ ວັດຖຸອຸປະກອນທີ່ຫາມາໄດ້ນັ້ນຈະມີນໍ້າໜັກບໍ່ຮອດມື້ ແລະ ເມື່ອຫຼໍ່ແລ້ວຈະເປັນພະພຸດທະຮູບໃຫຍ່ ຫຼື ນ້ອຍກໍຕາມ ກໍໃຫ້ໃສ່ຊື່ວ່າ "ພະອົງຕື້". ພາຍຫຼັງທີ່ພະຍາສີສຸລົນທໍາມະລາດ ເຈົ້າເມືອງໆໂສຍ (ເມືອງເກົ່າແຫ່ງໜຶ່ງຂອງແຂວງຫົວພັນໃນເມື່ອກ່ອນ) ໄດ້ຮັບຄໍາສັ່ງດັ່ງກ່າວແລ້ວ ກໍສັ່ງໃຫ້ບັນດາບຸກຄົນທີ່ສຳຄັນແຕ່ງຕັ້ງຄະນະຮັບຜິດຊອບເພື່ອສ້າງພະພຸດທະຮູບໃຫຍ່ 1 ອົງຂຶ້ນໃນປີ ຄ.ສ 1565 ຊຶ່ງມີນໍ້າໜັກ 3.850 ກິໂລ ຫຼໍ່ດ້ວຍທອງເຫຼືອງ ໂດຍມີຊື່ວ່າ “ພະອົງຕື້”ແລະ ໄດ້ປະດິດສະຖານຢູ່ທີ່ວັດເກົ່າແຫ່ງໜຶ່ງຂອງເມືອງໂສຍ.ວັນທີ 10 ເມສາ 1984, ອໍານາດການປົກຄອງແຂວງຫົວພັນ ໄດ້ອັນເຊີນພະອົງຕື້ມາປະດິດສະຖານຢູ່ທີ່ວັດໂພໄຊຊະນະຣາມ ທີ່ເມືອງຊຳເໜືອແຫ່ງນີ້ ແລະ ມາຮອດວັນທີ 24 ພຶດສະພາ 2013 ໄດ້ອັນເຊີນພະອົງຕື້ ໄປປະດິດສະຖານຢູ່ທີ່ວັດສີບຸນເຮືອງທີ່ສ້າງຂຶ້ນໃໝ່.

ໃນປັດຈຸບັນ, ເຖິງວ່າຈະບໍ່ມີພະພຸດທະຮູບອົງຕື້ຢູ່ທີ່ວັດໂພໄຊຊະນະຣາມແລ້ວກໍຕາມ ວັດດັ່ງກ່າວຍັງຄົງເປັນທີ່ເຄົາລົບ ແລະສັດທາຂອງປະຊາຊົນແຂວງຫົວພັນ ແລະ ປະຊາຊົນທີ່ມາຈາກທ້ອງຖິ່ນອື່ນໆສະເໝີມາ, ທ່ານສາມາດໄປກາບໄຫວ້ ແລະ ທ່ຽວຊົມວັດໂພໄຊຊະນະຣາມໄດ້ທຸກມື້, ເວລາ 8:00-17:00 ໂມງ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ