ຮຽບຮຽງໂດຍ: ຕຸໄລເພັດ

ຖ້າຈະເວົ້າເຖິງສະຖານທີ່ທ່ອງທ່ຽວຕາກອາກາດເພື່ອພັກຜ່ອນຢ່ອນອາລົມແນະນຳອ່າງນ້ຳຕຽນຊຶ່ງຕັ້ງຢູ່ເຂດບ້ານໂນນສະຫວັນ ຫ່າງຈາກເທດສະບານເມືອງໄຊຍະບູລີ ແຂວງໄຊຍະບູລີໄປທາງທິດໃຕ້ປະມານ 6 ກິໂລແມັດ ຊຶ່ງທ່ານສາມາດໃຊ້ເວລາຂີ່ລົດພຽງແຕ່ 15 ນາທີ ກໍໄປຮອດ. ອ່າງນ້ຳຕຽນໄດ້ຖືກພັດທະນາຈາກອ່າງເກັບນໍ້າທໍາມະດາໃຫ້ກາຍມາເປັນແຫຼ່ງທ່ອງທ່ຽວຄົບວົງຈອນ ຊຶ່ງນອກຈາກທ່ານຈະໄດ້ພົບພໍ້ກັບທີວທັດທໍາມະຊາດອັນສວຍງາມ ແລະ ໜ້າອອນຊອນແລ້ວ ທ່ານກໍຍັງຈະໄດ້ຊົມຮອຍພະບາດທີ່ຫາຊົມໄດ້ຍາກ. ພ້ອມດຽວກັນນີ້, ຢູ່ບໍລິເວນອ່າງນໍ້າຕຽນຍັງມີ ສິ່ງອໍານວຍຄວາມສະດວກໄວ້ຮອງຮັບນັກທ່ອງທ່ຽວເຊັ່ນ: ຮ້ານອາຫານ, ເຮືອບໍລິການນໍາທ່ຽວ ແລະ ສູນອະນຸລັກຊ້າງ ໄວ້ສຳລັບນັກທ່ອງທ່ຽວທີ່ມີຄວາມສົນໃຈໃນກິດຈະກໍາການຂີ່ຊ້າງ ຫຼື ສຶກສາຂໍ້ມູນກ່ຽວກັບຊ້າງ. ອ່າງນ້ຳຕຽນເປີດໃຫ້ບໍລິການແກ່ທ່ານໃນເວລາ 8:00-19:00 ໂມງ ຂອງທຸກໆມື້.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ