ຫໍໄຕວັດກາງ ຕັ້ງຢູ່ບ້ານວັດກາງໃນເທດສະບານເມືອງສາລະວັນ ແຂວງສາລະວັນ, ເປັນຄົງສາງພະໄຕປີດົກສາສະໜາພຸດ ນັບຕັ້ງແຕ່ສະໄໝບູຮານ ກາຍເປັນມໍລະດົກອັນລ້ຳຄ່າທາງດ້ານວັດທະນະທຳ ແລະ ສະແດງໃຫ້ເຫັນເຖິງສີມືອັນປານີດ ຂອງນັກຈິດຕະກອນ ໃນສະໄໝກ່ອນ. ຫໍໄຕດັ່ງກ່າວສ້າງຂຶ້ນໃນປີ ຄ.ສ 1857, ມີ 54 ເສົາ ໂດຍວັດສະດຸກໍ່ສ້າງຕົ້ນຕໍແມ່ນນຳໃຊ້ໄມ້ ແລະ ດິນ, ເຊັ່ນ: ໄມ້ມັນປາ, ໄມ້ແຄນ, ໄມ້ດູ່ ເປັນຕົ້ນ, ມີການວາດຊົງດ້ວຍລວດລາຍລາວບູຮານ ໂດຍການໃຊ້ສິ່ວເຈາະຮູ ແລະ ຕອກລຸບໄມ້ຂັດຕ່າງໆ. ໜ້າເສຍດາຍຫໍໄຕປີດົກດັ່ງກ່າວໄດ້ຖືກຝູງເຮືອບິນເຕ 28 ຂອງອາເມຣິກາ ຍິງທຳລາຍເກືອບໝົດ ຊຶ່ງປັດຈຸບັນ ອົງການຈັດຕັ້ງຂັ້ນເທິງ ພ້ອມປະຊາຊົນກໍໄດ້ພາກັນບູລະນະສ້ອມແປງຫໍໄຕວັດກາງຄືນໃໝ່ໃຫ້ກັບມາສູ່ສະພາບເດີມ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ