ຕາມການລາຍງານຂອງທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງເຊກອງໃຫ້ຮູ້ວ່າ: ໃນປີ 2023 ນີ້, ແຂວງເຊກອງຈະສູ້ຊົນຈັດເກັບລາຍຮັບເຂົ້າງົບປະມານໃຫ້ໄດ້ທັງໝົດ234,53 ຕື້ກີບ ທຽບໃສ່ປີ 2022 ເພີ່ມຂຶ້ນ 97% ໃນນີ້ລາຍຮັບພູດສູນກາງປະຕິບັດຢູ່ທ້ອງຖິ່ນ 10 ຕື້ກີບ ເພີ່ມຂຶ້ນ 140% ແລະ ລາຍຮັບຂອງແຂວງ 224,52 ຕື້ກີບ ເພີ່ມຂຶ້ນ 95% ໂດຍມີລາຍຮັບຈາກພາສີ-ສ່ວຍສາອາກອນ 194,64 ຕື້ກີບ ເພີ່ມຂຶ້ນ 94%; ລາຍຮັບຈາກຊັບສິນແຫ່ງລັດ 29,88 ຕື້ກີບ ທຽບໃສ່ປີ 2022 ເພີ່ມຂຶ້ນ 104%, ເອົາໃຈໃສ່ຄຸ້ມຄອງລາຍຈ່າຍໃຫ້ຢູ່ໃນລະດັບ 305,03 ຕື້ກີບ ທຽບໃສ່ປີ 2022 ຫຼຸດລົງ 20%.

ທ່ານກ່າວໃຫ້ຮູ້ຕື່ມວ່າ: ຄຽງຄູ່ກັນນີ້ຍັງສຸມໃສ່ຫັນເອົາຫົວໜ່ວຍທຸລະກິດທີ່ມີລາຍຮັບເກີນ 400 ລ້ານກີບເຂົ້າໃນລະບົບອາກອນມູນຄ່າເພີ່ມ; ຄຸ້ມຄອງຖານລາຍຮັບທີ່ມີຢູ່ແລ້ວ ມອບເຂົ້າງົບປະມານໃຫ້ຖືກຕ້ອງ ແລະ ຄົບຖ້ວນ, ເກັບກໍາຂໍ້ມູນ ແລະ ຂຸດຄົ້ນແຫຼ່ງລາຍຮັບທີ່ຍັງບົ່ມຊ້ອນ; ເອົາບັນດາຫົວໜ່ວຍທຸລະກິດທີ່ໄດ້ຂຶ້ນທະບຽນທັງໝົດເຂົ້າໃນລະບົບແທັກລິດໃຫ້ສໍາເລັດ 100%; ຂະຫຍາຍຖານອາກອນມູນຄ່າເພີ່ມໃຫ້ໄດ້ທັງປະລິມານ ແລະ ຄຸນນະພາບ; ຈັດເກັບລາຍຮັບຄ່າທໍານຽມນໍາໃຊ້ພາຫະນະ ແລະ ຄ່າທໍານຽມພາສີທີ່ດິນໃຫ້ຄົບຖ້ວນ; ແກ້ໄຂໜີ້ຄ້າງມອບອາກອນໃນລະບົບ TaxRIS; ກວດກາບັນດາວິສາຫະກິດທີ່ມີການແຈ້ງບໍ່ປົກກະຕິເຊັ່ນ: ແຈ້ງສູນ, ບໍ່ມາແຈ້ງ ຫຼືແຈ້ງຫຼຸດ ເພື່ອນໍາໃຊ້ມາດຕະການຢ່າງເໝາະສົມຕໍ່ວິສາຫະກິດດັ່ງກ່າວ; ຕິດຕາມ, ສັງລວມຖານຂໍ້ມູນ ແລະ ການຈັດເກັບພັນທະຕ່າງໆໃຫ້ໄດ້ຢ່າງຄົບຖ້ວນຈາກບັນດາໂຄງການແຮ່ທາດ ແລະ ໄຟຟ້າ; ຄຸ້ມຄອງສາງສິນຄ້າ, ຕິດຕາມກວດກາການເຄື່ອນຍ້າຍນໍ້າມັນເຊື້ອໄຟ ແລະ ສິນຄ້າເຄື່ອງຂອງຕ່າງໆ; ໂຄສະນາເຜີຍແຜ່ ແລະ ການຊຸກຍູ້ໃຫ້ຜູ້ເສຍອາກອນໃຫ້ແຈ້ງມອບດ້ວຍຕົນເອງໃຫ້ເພີ່ມຂຶ້ນຂອງຫົວໜ່ວຍທັງໝົດທີ່ຢູ່ໃນລະບົບ TaxRIS; ອໍານວຍຄວາມສະດວກໃນການສົ່ງອອກການຂຸດຄົ້ນບໍ່ຖ່ານຫີນ ທີ່ໄດ້ຂຸດຄົ້ນແລ້ວ ໃຫ້ໄດ້ສົ່ງອອກ ແລະ ມອບລາຍຮັບເຂົ້າງົບປະມານ; ຈັດເກັບຈາກຖານລາຍຮັບໃໝ່ຈາກການນໍາເຂົ້ານໍ້າມັນເຊື້ອໄຟຜ່ານດ່ານສາກົນດາກຕະອອກ; ຊຸກຍູ້ຫົວໜ່ວຍທຸລະກິດທີ່ໄດ້ຮັບອະນຸຍາດດໍາເນີນທຸລະກິດ ເພື່ອໃຫ້ສາມາດດໍາເນີນກິດຈະການ ແລະ ມອບພັນທະຕາມສັນຍາທີ່ໄດ້ຕົກລົງກັນ.

ທ່ານຍັງໃຫ້ຮູ້ອີກວ່າ: ໃນປີ 2022 ຜ່ານມາ ແຂວງເຊກອງຈັດເກັບລາຍຮັບເຂົ້າງົບປະມານ (ພູດຂອງແຂວງ) ໄດ້ 149,48 ຕື້ກີບ ທຽບໃສ່ແຜນດັດແກ້ປະຕິບັດໄດ້ 130,34% ໃນນີ້ມີລາຍຮັບພາສີ-ສ່ວຍສາອາກອນ 123,25 ຕື້ກີບ ທຽບໃສ່ແຜນປະຕິບັດໄດ້ 123,17% ທຽບໃສ່ປີ 2021 ເພີ່ມຂຶ້ນ 47%; ລາຍຮັບຊັບສິນແຫ່ງລັດ 26,23 ຕື້ກີບ ທຽບໃສ່ແຜນປະຕິບັດໄດ້ 130,34% ທຽບໃສ່ປີ 2021 ເພີ່ມຂຶ້ນ 76% ແລະ ປະຕິບັດລາຍຈ່າຍ 382,44 ຕື້ກີບ ເທົ່າກັບ 99,13% ຂອງແຜນການປີ.

ຂ່າວ-ພາບ: ສັນຍາ