ເມື່ອບໍ່ດົນມານີ້ທີ່ສະໂມສອນເມືອງຫົງສາ ແຂວງໄຊຍະບູລີ ໄດ້ເປີດກອງປະຊຸມຄົບຄະນະບໍລິຫານງານສະຫະພັນແມ່ຍິງເມືອງ ຄັ້ງທີ 4 ສະໄໝທີ IX ໂດຍພາຍໃຕ້ການເປັນປະທານຂອງສະຫາຍນາງ ຄຳວົງ ແກ້ວມູນລັດ ວ່າການປະທານສະຫະພັນແມ່ຍິງເມືອງ, ເປັນກຽດເຂົ້າຮ່ວມຂອງສະຫາຍນາງ ຈັນທີ ຄໍາພູວົງ ຫົວໜ້າຄະນະໂຄສະນາອົບຮົມເມືອງ,ມີແຂກຖືກເຊີນກ່ຽວຂ້ອງເຂົ້າຮ່ວມ.

ສະຫາຍນາງ ຄຳວົງ ແກ້ວມູນລັດ ໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານຮອບດ້ານຂອງສະຫະພັນແມ່ຍິງເມືອງຫົງສາ ປະຈຳປີ 2022ແລະ ທິດທາງແຜນການ 2023 ຊຶ່ງໃນ 1 ປີຜ່ານມາ, ສະຫະພັນແມ່ຍິງແຕ່ລະໜ່ວຍໄດ້ຮັບການປັບປຸງໃຫ້ມີຄວາມເຂັ້ມແຂງ, ສາມາດຂະຫຍາຍສະມາຊິກສະຫະພັນແມ່ຍິງໄດ້ 339ສະຫາຍ, ມີໜ່ວຍສະຫະພັນແມ່ຍິງ 71ໜ່ວຍ. ໃນນີ້,ໜ່ວຍອ້ອມຂ້າງ 39ໜ່ວຍ ແລະ ໜ່ວຍແມ່ຍິງບ້ານ 32 ໜ່ວຍ, ມີຈຸຮ່ວມຊີວິດ 282ຈຸ, ໄດ້ເປີດກອງປະຊຸມໃຫຍ່ສະຫະພັນແມ່ຍິງຮາກຖານໄດ້ 12 ບ້ານ ພ້ອມທັງເອົາໃຈໃສ່ປັບປຸງ ແລະ ຂະຫຍາຍການຈັດຕັ້ງ, ປັບປຸງແບບແຜນວິທີນໍາພາ-ວິທີເຮັດວຽກຂອງຄະນະແມ່ຍິງແຕ່ລະໜ່ວຍ ເຮັດໃຫ້ມີຄວາມໜັກແໜ້ນດ້ານການເມືອງ ແລະ ເຂັ້ມແຂງດ້ານການຈັດຕັ້ງ ຕິດພັນກັບການຈັດຕັ້ງປະຕິບັດຂໍ້ແຂ່ງຂັນ 3 ດີທີ່ສູນກາງສະຫະພັນແມ່ຍິງລາວວາງອອກຄື: ສ້າງພົນລະເມືອງດີ 3.924 ຄົນ, ພັດທະນາດີ 3.758 ຄົນ, ສ້າງຄອບຄົວດີ 3.715 ຄົນ. ຈັດຕັ້ງປະຕິບັດຄັດເລືອກບຸກຄົນ 3 ດີ ປະເພດ I ໄດ້3.566 ຄົນ, ປະເພດ II ໄດ້363 ຄົນ ແລະ ໜ່ວຍ 3 ດີໄດ້ 70 ໜ່ວຍ. ໃນນີ້ໜ່ວຍອ້ອມຂ້າງ 39 ໜ່ວຍ ແລະ ບ້ານ 31 ບ້ານ.ເຮັດໃຫ້ສະມາຊິກແມ່ຍິງມີຜົນງານດີເດັ່ນເຊັ່ນ: ໄດ້ຮັບໃບຢັ້ງຢືນການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການພັດທະນາຕາມທິດ 3 ສ້າງ ໄດ້ຮັບຫຼຽນໄຊແຮງງານໃນຂະບວນການແຂ່ງຂັ້ນຮັກຊາດ ແລະ ພັດທະນາ.ສະຫະພັນແມ່ຍິງເມືອງມີກອງທຶນຊ່ວຍເຫຼືອຊຶ່ງກັນ ແລະ ກັນ ມີສະມາຊິກທັງໝົດ 470 ຄົນ, ມີເງິນທັງໝົດ 78ລ້ານກວ່າກີບ.ນອກຈາກນັ້ນຍັງໄດ້ປຸກລະດົມສະມາຊິກແມ່ຍິງບັນດາເຜົ່າເຂົ້າຮ່ວມພາລະກິດປົກປັກຮັກສາ ແລະ ສ້າງສາປະເທດຊາດກໍຄື: ການສ້າງເສດຖະກິດຄອບຄົວ ເພື່ອແກ້ໄຂຊິວິດການເປັນຢູ່ໃຫ້ໄດ້ຮັບການພັດທະນາຂຶ້ນເລື້ອຍໆໂດຍເລັ່ງໃສ່ການປູກຝັງ, ລ້ຽງສັດໃຫ້ກາຍເປັນສິນຄ້າ, ດ້ານຫັດຖະກໍາຕໍ່າຫູກ ແລະ ການຫຍິບປັກຖັກແສ່ວ ແມ່ນເປັນຂະບວນຟົດຟື້ນ. ຜ່ານການປະເມີນຕີລາຄາເມືອງຫົງສາ ສາມາດຮັກສານາມມະຍົດທຸງໄຊ 3 ດີ ແລະ ເມືອງແມ່ຍິງ 3 ດີ.ຈາກນັ້ນ ກອງປະຊຸມໄດ້ຮັບຟັງການປະກອບຄຳຄິດຄຳເຫັນເພື່ອຢັ້ງຢືນຜົນງານດ້ານຕ່າງໆໃນການຈັດຕັ້ງປະຕິບັດວຽກງານໃນໄລຍະຜ່ານມາ.

ຂ່າວ-ພາບ: ກິດຕິສັກ ບົວໄລ