ທ່ານ ຂັນຕີ ສີລະວົງສາ ຮອງເຈົ້າແຂວງໆເຊກອງ, ຜູ້ຊີ້ນໍາວຽກງານຂົງເຂດເສດຖະກິດ ໄດ້ເນັ້ນໜັກໃຫ້ເອົາໃຈໃສ່ຫຼາຍບັນຫາໃນການປະຕິຮູບວຽກງານການເງິນຮອບດ້ານ ໃນໂອກາດເຂົ້າຮ່ວມກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022 ໃນວັນທີ 14 ກຸມພາຜ່ານມາ, ຊຶ່ງທ່ານໄດ້ເນັ້ນໜັກໃຫ້ຂະແໜງການເອົາໃຈໃສ່ຫຼາຍບັນຫາ ເພື່ອສືບຕໍ່ຈັດຕັ້ງປະຕິບັດບັນດາຄາດໝາຍຕ່າງໆທີ່ວາງໄວ້ໃຫ້ເກີດເປັນຮູບປະທໍາ ແລະ ປະກົດຜົນເປັນຈິງ. ກ່ອນອື່ນຕ້ອງເລັ່ງດັດປັບ ປະຕິຮູບວຽກງານການເງິນຢ່າງຮອບດ້ານ ແລະ ແຂງແຮງຕາມຍຸດທະສາດຂອງແຂວງໄດ້ຮັບຮອງໃຫ້ມີຄວາມຄືບໜ້າໂດຍໄວ ແລະ ຮັບປະກັນການຈັດເກັບລາຍຮັບໃຫ້ໄດ້ຕາມແຜນ ແລະ ລື່ນແຜນໄດ້ຍິ່ງເປັນການດີ; ສືບຕໍ່ປະຕິຮູບວຽກງານຂະແໜງການເງິນ ໂດຍຈັດຕັ້ງຜັນຂະຫຍາຍວິໄສທັດຮອດປີ 2030 ແລະ ຍຸດທະສາດພັດທະນາການເງິນແຫ່ງລັດຮອດປີ 2025 ໂດຍສະເພາະແຜນພັດທະນາຂະແໜງການເງິນໄລຍະ 5 ປີ (2021-2025) ໃຫ້ເປັນແຜນການ, ແຜນງານ ແລະ ໂຄງການລະອຽດໃຫ້ແກ່ການຈັດຕັ້ງປະຕິບັດວຽກງານຕົວຈິງໃຫ້ສຳເລັດຜົນ. ພ້ອມທັງສຸມໃສ່ຂຸດຄົ້ນທຸກແຫຼ່ງລາຍຮັບທີ່ຍັງບົ່ມຊ້ອນ ແລະ ຂະຫຍາຍຖານລາຍຮັບໃໝ່ໃຫ້ກວ້າງອອກ; ຫັນການຄຸ້ມຄອງການເງິນແຫ່ງລັດເປັນທັນສະໄໝ ເພື່ອສະກັດກັ້ນການຮົ່ວໄຫຼທາງດ້ານລາຍຮັບ-ລາຍຈ່າຍງົບປະມານ ແລະ ແກ້ໄຂປະກົດການຫຍໍ້ທໍ້; ຕ້ອງສືບຕໍ່ປັບປຸງການແບ່ງຂັ້ນຄຸ້ມຄອງການເກັບລາຍຮັບ ແລະ ຮັບຜິດຊອບລະຫວ່າງແຂວງກັບເມືອງ ໂດຍສະ ເພາະປະຕິບັດຄຳແນະນຳ ສະບັບເລກທີ 4488/ກງ ຈະມີການປັບປຸງປ່ຽນແທນ ແລະ ປະຕິບັດຕາມຂໍ້ຕົກລົງ ສະບັບເລກທີ 4489/ກງ ກ່ຽວກັບການແບ່ງຂັ້ນຄຸ້ມຄອງ ແລະ ຜົນປະໂຫຍດລາຍຮັບອາກອນ ແລະ ລາຍຮັບຊັບສິນ; ຕ້ອງສືບຕໍ່ເປັນເຈົ້າການ ແລະ ປະສານສົມທົບກັບບັນດາພະ ແນກການ, ຫ້ອງການຂັ້ນແຂວງ ແລະ ຂັ້ນເມືອງ ແລະ ພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດ ບັນດາວຽກຈຸດສຸມຕ່າງໆທີ່ກຳນົດໄວ້ ເພື່ອໃຫ້ສຳເລັດຜົນຕາມລະດັບຄາດໝາຍທີ່ວາງໄວ້; ຕ້ອງສືບຕໍ່ປະຕິຮູບລະບົບການລົງທຶນຂອງລັດໃຫ້ມີການຫັນປ່ຽນ ແລະ ປະຕິບັດກົດໝາຍລະບຽບການຢ່າງເຂັ້ມງວດ ແລະ ປັບປຸງລັດວິສະຫະກິດໃຫ້ສຳເລັດໂດຍໄວ ໄປຄຽງຄູ່ກັບການປະຕິຮູບລັດວິສະຫະກິດນ້ຳປະປາ ປັບປຸງຮູບແບບການບໍລິຫານ ແລະ ຖືເອົານິຕິກຳລະບຽບຫຼັກການເປັນບ່ອນອີງ.

ທ່ານກ່າວໃຫ້ຮູ້ອີກວ່າ: ຄຽງຄູ່ກັນນີ້ ໃຫ້ສືບຕໍ່ປະສານສົມທົບກັບຄະນະຮັບຜິດຊອບຈັດສັນຖອນຄືນລົດຂອງລັດຂັ້ນແຂວງ ແລະ ບັນດາເມືອງ, ກວດຄືນຂໍ້ມູນສະຖິຕິພາຫະນະ ລົດບໍລິຫານລົດວິຊາສະເພາະ ແລະ ລົດທີ່ພະນັກງານບຳນານນຳໃຊ້ເປັນຕົ້ນ: ສະຖານທີ່ນຳໃຊ້, ຊື່ຜູ້ນຳໃຊ້, ຊື່ໂຄງການ, ປະເພດ, ຍີ່ຫໍ້ ແລະ ອື່ນໆ ທີ່ຄະນະຮັບຜິດຊອບຂັ້ນສູນກາງສະໜອງຂໍ້ມູນໃຫ້ ເພື່ອໃຫ້ໄດ້ນຳເຂົ້າລະບົບຖານຂໍ້ມູນ (AMIS) ແລະ ພິມແຜ່ນກາໝາຍນໍາໃຊ້ຄິວອາໂຄດ (QR CODE) ຕາມບົດບັນທຶກເຮັດວຽກຮ່ວມກັບຄະນະຊຸກຍູ້ ຕິດຕາມການປະຕິບັດດຳລັດ 599/ລບ (ຂັ້ນສູນກາງ); ເອົາໃຈໃສ່ປັບປຸງກົງຈັກການຈັດຕັ້ງບາງຂະແໜງການອ້ອມຂ້າງ, ພະແນກການເງິນຂັ້ນແຂວງເພື່ອໃຫ້ສອດຄ່ອງກັບສິດ ພາລະບົດບາດຂອງຂະແໜງການເງິນ ຮັບປະກັນເຮັດໃຫ້ການຈັດເກັບລາຍຮັບ ປະຕິບັດລາຍຈ່າຍງົບປະມານໃຫ້ມີສະພາບຄ່ອງ ແລະ ມີປະສິດທິຜົນສູງ ຫຼຸດຜ່ອນຊ່ອງວ່າງການຮົ່ວໄຫຼຢ່າງຕັ້ງໜ້າ, ເອົາໃຈໃສ່ປະຕິບັດຄໍາແນະນໍາ ວ່າດ້ວຍການຈັດ ຕັ້ງປະຕິບັດແຜນງົບປະມານແຫ່ງລັດປະຈຳປີ 2023 ຢ່າງເຂັ້ມງວດ.

ຂ່າວ: ພຸດທະສອນ