ນໍ້າຕົກຕາດເທວະດາຕັ້ງຢູ່ເຂດບ້ານຫາງໝູນ້ອຍ ເມືອງສາລະວັນແຂວງສາລະວັນ, ຫ່າງຈາກເສັ້ນທາງ ເລກທີ20 ປະມານ 19 ກິໂລແມັດແລະ ຫ່າງຈາກເທດສະບານແຂວງປະມານ 35 ກິໂລແມັດ, ຕາດເທວະດາ ເກີດຈາກນ້ຳຫ້ວຍໃສ ໂດຍແຕ່ກ່ອນມີຊື່ເດີມວ່ານໍ້າຕົກຕາດຕະຫຼຸຍ, ມີຕໍານານເລົ່າຂານກັນວ່າ ຢູ່ບໍລິເວນດ້ານລຸ່ມຕາດນີ້ ແມ່ນມີພະພຸດທະຮູບສະຖິດຢູ່ໃນຖ້ຳກ້ອງນໍ້າຕົກ, ດັ່ງນັ້ນ ພໍຮອດເດືອນຫ້າຂອງທຸກໆປີ ຊາວບ້ານເຂດນີ້ ຈຶ່ງໄດ້ເຮັດບຸນ ແລະ ພາກັນມາຫົດສົງພະ.ນອກນັ້ນ ບໍລິເວນຕໍ່ໜ້ານໍ້າຕົກຕາດ ຍັງມີຫີນຕັ້ງທີ່ມີລັກສະນະຄ້າຍຄືກັບພົມສີ່ໜ້າ ໃນສາສະໜາຮິນດູ ຊຶ່ງໃນອະດີດມີ 2 ອັນ, ແຕ່ມາຮອດປັດຈຸບັນແມ່ນເຫຼືອພຽງອັນດຽວເທົ່ານັ້ນ ຍ້ອນຖືກລະເບີດຍົນຍິງໃນປາງສົງຄາມ. ຕາດເທວະດາຖືກຄົ້ນພົບ ໃນປີ 2007 ແລະ ເປີດເປັນແຫຼ່ງທ່ອງທ່ຽວຢ່າງເປັນທາງການໃນປີ 2009 ເປັນຕົ້ນມາ.

ຂໍ້ມູນຈາກ: ກົມໂຄສະນາການທ່ອງທ່ຽວກະຊວງ ຖວທ