ໃນທ້າຍອາທິດຜ່ານມານີ້, ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ ພ້ອມດ້ວຍຄະນະ, ໄດ້ສືບຕໍ່ລົງສໍາຫຼວດພື້ນທີ່ຈຸດສຸມເຂດທີ່ຈະພັດທະນາ ໃນເຂດບ້ານສັນໂນນເມືອງເລົ່າງາມ. ການກະກຽມຄວາມພ້ອມທຸກດ້ານ ເປັນຕົ້ນ: ການຈັດສັນຂອບເຂດບ້ານ, ເສັ້ນທາງເຂົ້າເຖິງເຂດທີ່ຈະເປັນແຫຼ່ງທ່ອງທ່ຽວດ້ານກະສິກຳ ແລະ ສົ່ງເສີມການຜະລິດ, ສ້າງສິ່ງເອື້ອອໍານວຍຄວາມສະດວກໃຫ້ກັບປະຊາຊົນ.

ການລົງເຄື່ອນໄຫວໃນຄັ້ງນີ້, ແມ່ນໄດ້ສືບຕໍ່ເກັບກໍາຂໍ້ມູນເພີ່ມເຕີມ, ສຳຫຼວດຄືນຈຸດທີ່ຈະເປັນທີ່ຕັ້ງຂອງຫົວງານ ລະບົບຊົນລະປະທານ, ແລວທໍ່ນໍ້າ ແລະ ເຂດຈຸດສຸມຈະພັດທະນາໃນແຕ່ລະດ້ານ ເຊັ່ນ: ເຂດການຜະລິດ, ການເຮັດນາປູກເຂົ້າ (ນາຂັນໄດ), ການປູກພືດຊະນິດຕ່າງໆ, ການທ່ອງທ່ຽວໃນຮູບແບບກະສິກຳ, ທ່ຽວຊົມນໍ້າຕົກຕາດ ແລະ ທີວທັດທຳມະຊາດ ບໍລິເວນດັ່ງກ່າວ ໃຫ້ສາມາດເຊື່ອມໂຍງການທ່ອງທ່ຽວ ກັບແຫຼ່ງທ່ອງທ່ຽວຕ່າງໆທີ່ມີຢູ່ແລ້ວ. ໃນເບື້ອງຕົ້ນ, ແມ່ນໄດ້ມີການສໍາຫຼວດເກັບກໍາຂໍ້ມູນແລ້ວ, ທັງໄດ້ມີການສົມທົບກັບຫຼາຍພາກສ່ວນທັງພາກລັດ, ເອກະຊົນ ແລະ ຜູ້ປະກອບການ, ອຳນາດການປົກຄອງບ້ານ ຕະຫຼອດຮອດປະຊາຊົນ ໃຫ້ມີສ່ວນຮ່ວມໃນການພັດທະນາເຂດດັ່ງກ່າວ ຊຶ່ງເປັນພື້ນທີ່ເໝາະສົມ, ທັງເປັນເຂດທີ່ມີຄວາມອຸດົມສົມບູນທາງດ້ານທໍາມະຊາດ, ມີທີວທັດທີ່ສວຍງາມ. ນອກຈາກນັ້ນ, ຍັງໄດ້ມອບຄວາມຮັບຜິດຊອບໃຫ້ຂະແໜງການທີ່ກ່ຽວຂ້ອງ ລົງສົມທົບກັບອຳນາດການປົກຄອງບ້ານ ເພື່ອລົງສຳຫຼວດໃນດ້ານວິຊາສະເພາະ ເປັນຕົ້ນ: ລະບົບຫົວງານຂອງຊົນລະປະທານ, ແລວທີ່ວາງທໍ່ ແລະ ສຳຫຼວດດ້ານອື່ນໆ.

ໂອກາດນີ້, ທ່ານ ຮອງເຈົ້າແຂວງສາລະວັນ ໄດ້ຮຽກຮ້ອງໃຫ້ອໍານາດການປົກຄອງບ້ານ ກໍຄືພໍ່ແມ່ປະຊາຊົນ ເປັນເຈົ້າການມີສ່ວນຮ່ວມໃນແຕ່ລະດ້ານ, ການປະກອບສ່ວນດ້ານວັດຖຸ ທີ່ຈຳເປັນ, ດ້ານເຫື່ອແຮງ ແລະ ໃຫ້ຂໍ້ມູນຕ່າງໆຢ່າງລະອຽດ, ທັງປະສານສົມທົບກັນອໍານວຍຄວາມສະດວກ ໃຫ້ບັນດາຂະແໜງການຕ່າງໆ ທີ່ຈະເຄື່ອນໄຫວລົງເຮັດວຽກ, ທັງໄດ້ມອບໃຫ້ອົງການປົກຄອງເມືອງເລົ່າງາມ ເອົາໃຈໃສ່ຕິດຕາມຢ່າງຕໍ່ເນື່ອງໃນແຕ່ລະໄລຍະ ແລະ ຈັດຕັ້ງວຽກງານດັ່ງກ່າວໃຫ້ມີຄວາມຄືບໜ້າ, ເປັນຮູບປະທຳຂຶ້ນເທື່ອລະກ້າວ, ສ້າງແຜນເຄື່ອນໄຫວ, ແຜນງານຂອງແຕ່ລະຂະແໜງການ ມີສ່ວນຮ່ວມຊຸກຍູ້ການພັດທະນາຈຸດສຸມ ບ້ານສັນໂນນ.

(ຂ່າວ-ພາບ: ວິໄລວອນ ສິດທິໄຊ)