ເມືອງໄຊຍະບູລີ ແຂວງໄຊຍະບູລີ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2022 ແລະ ທິດທາງແຜນການປີ 2023 ຂຶ້ນທີ່ຫ້ອງວ່າການເມືອງ ໃນວັນທີ 22 ກຸມພາ ຜ່ານມາ, ເປັນກຽດເຂົ້າຮ່ວມຂອງ ທ່ານ ບຸນແທນ ທີແກ້ວ ເຈົ້າເມືອງໄຊຍະບູລີ, ມີຮອງຫົວໜ້າພະແນກການເງິນແຂວງ, ຄະນະປະຈໍາພັກເມືອງ, ກໍາມະການພັກເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ວືຊົງ ເຊັ່ຍລີ ຫົວໜ້າຫ້ອງການໆເງິນເມືອງ ກ່າວວ່າ: ໃນ 1 ປີຜ່ານມາ ຫ້ອງການການເງິນເມືອງ ໄດ້ສຸມໃສ່ຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2022 ດ້ວຍຄວາມຮັບຜິດຊອບສູງ ໂດຍສະເພາະການຈັດຕັ້ງຜັນຂະຫຍາຍວຽກງານການເງິນ ທີ່ຕິດພັນກັບການຈັດຕັ້ງຜັນຂະຫຍາຍວາລະແຫ່ງຊາດໃນການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນຂອງເມືອງ ເຫັນໄດ້ວ່າມີຄວາມຫຍຸ້ງຍາກ ແລະ ທ້າທາຍຫຼາຍດ້ານເຊັ່ນ: ການແຜ່ລະບາດຂອງພະຍາດໂຄວິດ-19 ທີ່ແກ່ຍາວຍັງບໍ່ທັນເຂົ້າສູ່ສະພາບປົກກະຕິ, ໂດຍສະເພາະເສດຖະກິດດ້ານລາຄາ, ການຂາດແຄນນ້ຳມັນ ແລະ ໄພເງິນເຟີ້, ໄຟທຳມະຊາດ, ລາຄາສິນຄ້າ ຄ່າບໍລິການຕ່າງໆເພີ່ມຂຶ້ນສູງໃນຮອບຫຼາຍປີ, ເຮັດໃຫ້ຫຼາຍຫົວໜ່ວຍທຸລະກິດພາຍໃນເມືອງຢຸດເຊົາກິດຈະການ ຊຶ່ງເຮັດໃຫ້ການຈັດເກັບລາຍຮັບພາຍໃນເມືອງບໍ່ຄົງຕົວ, ແຕ່ເຖິງແນວໃດກໍຕາມຄະນະນໍາສາຍຕັ້ງພະແນນການເງິນແຂວງ, ອົງການປົກຄອງເມືອງໄຊຍະບູລີ ແມ່ນໄດ້ເອົາໃຈໃສ່ໃນການຊີ້ນຳໆພາຢ່າງໃກ້ຊິດຕິດແທດ ສຸມໃສ່ການຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນພາຍໃນໃຫ້ໄດ້ຫຼາຍຂຶ້ນ ແລະ ບັນລຸຕາມແຜນກຳນົດໄວ້ສະແດງອອກຄື: ດ້ານລາຍຮັບໂຕເລກແຜນທັງໝົດ 5.510 ລ້ານກີບ, ປະຕິບັດໄດ້ທັງໝົດ 6.286 ລ້ານກີບ ເທົ່າກັບ 114,09% ຂອງແຜນການປີ, ລື່ນແຜນ 14% ເປັນເງິນ 776 ລ້ານກວ່າກີບ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 105%, ດ້ານລາຍຈ່າຍແຜນການປີ 3.802 ລ້ານກີບ ປະຕິບັດໄດ້ 3.716 ລ້ານກີບ ເທົ່າກັບ 97,73%, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 135,52%, ກອງປະຊຸມໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານປະຈຳປີ 2022 ແລະ ທິດທາງແຜນການປີ 2023 ຂອງ ໜ່ວຍງານປະຕູດຽວ, ຜ່ານແຜນອະນຸມັດລາຍຈ່າຍງົບປະມານປະຈຳປີ 2022 ສະບັບເລກທີ 75/ກງ.ຊຍ ລົງວັນທີ 1 ກຸມພາ 2023, ຜ່ານຄໍາແນະນໍາຂອງທ່ານເຈົ້າເມືອງໄຊຍະບູລີ, ຜ່ານຄຳແນະນໍາຂອງກະຊວງການເງິນ ເລກທີ 3736/ກງລົງວັນທີ 25 ພະຈິກ 2022, ຜ່ານແຈ້ງການກ່ຽວກັບການເສຍພາສີທີ່ດິນ, ຄ່າທຳນຽມທາງປະຈຳປີ 2023, ຈາກນັ້ນບັນດາຫ້ອງການອ້ອມຂ້າງເມືອງ, ບ້ານ, ນັກທຸລະກິດຜູ້ປະກອບການໄດ້ປະ ກອບຄໍາເຫັນຕໍ່ກອງປະຊຸມ. ພ້ອມນີ້, ກອງປະຊຸມໄດ້ປະດັບຫຼຽນກາແຮງງານ, ມອບໃບຍ້ອງຍໍຂອງລັດຖະ ບານ, ມອບໃບຍ້ອງຍໍຂອງທ່ານເຈົ້າເມືອງໃຫ້ບຸກຄົນ, ການຈັດຕັ້ງ ແລະ ບ້ານທີ່ມີຜົນງານດີເດັ່ນໃນການຈັດ ຕັ້ງປະຕິບັດໂຕເລກລາຍຮັບໄດ້ຕາມແຜນ, ຕອນທ້າຍກອງປະຊຸມ ທ່ານ ບຸນແທນ ທີແກ້ວ ໄດ້ມີຄໍາເຫັນໂອ້ລົມຕໍ່ກອງປະຊຸມຕື່ມອີກ.

ຂ່າວ-ພາບ: ສົມພົງ ສີສະຫວັດ