ໜັງສືພິມ ປະຊາຊົນ

ກອງປະຊຸມ ວຽກງານກວດກາ ຂອງ ທຫລ

ເຜີຍແຜ່ໂດຍ: ວິໄລສັກ ເວລາ: 27/02/2023 14:58:33 ຈຳນວນຢ້ຽມຊົມ 4971 ຄັ້ງ

ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມວຽກງານກວດກາ ທຫລ ປະຈຳປີ 2021-2022 ຂຶ້ນໃນວັນທີ 27 ກຸມພາ ນີ້ ທີ່ສະໂມສອນສະຖາບັນການທະນາຄານ ດັ່ງກ່າວ, ໂດຍພາຍໃຕ້ການເປັນປະທານຂອງສະຫາຍ ບຸນເຫຼືອ ສິນໄຊວໍຣະວົງ ເລຂາຄະນະບໍລິຫານງານພັກ ຜູ້ວ່າການ ທຫລ, ສະຫາຍ ສຸກຄໍາເພັດ ເຮືອງບຸດສີ ຮອງປະທານຄະນະກວດກາສູນກາງພັກ, ມີຮອງເລຂາຄະນະບໍລິຫານງານພັກ ປະທານຄະນະກວດກາພັກ ທຫລ, ມີພາກສ່ວນກ່ຽວຂ້ອງຈາກສູນກາງ ແລະ ທ້ອງຖິ່ນເຂົ້າຮ່ວມ

ໃນພິທີ, ສະຫາຍ ກໍາມະການພັກ ຮອງປະທານຄະນະກວດກາພັກ ທຫລ ໄດ້ຂຶ້ນຜ່ານຮ່າງບົດສະຫຼຸບການເຄື່ອນໄຫວວຽກງານກວດກາພັກ-ລັດ ທສລ ປະຈຳປີ 2021-2022 ຜ່ານມາ ແລະ ທິດທາງແຜນການ ປີ 2023 ໃນຕໍ່ໜ້າ ຊຶ່ງໄດ້ຍົກໃຫ້ເຫັນການຈັດຕັ້ງປະຕິບັດວຽກງານຕິດຕາມ, ກວດກາພັກ-ລັດ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກງານຄົ້ນຄວ້າຄໍາຮ້ອງ, ຄໍາສະ ເໜີ, ຍົກໃຫ້ເຫັນດ້ານດີ ແລະ ຜົນສໍາເລັດທີ່ຄວນເສີມຂະຫຍາຍ ໂດຍການຊີ້ນຳ-ນຳພາຂອງຄະນະກວດກາພັກ ທຫລ ແລະ ຄະນະກວດກາແຕ່ລະຂັ້ນ. ຕໍ່ການຕິດຕາມ, ກວດກາ, ການຈັດຕັ້ງປະຕິບັດພາລະບົດບາດ, ສິດ, ໜ້າທີ່ຄວາມຮັບຜິດຊອບ, ການປະຕິບັດບັນດາມະຕິ, ຄຳສັ່ງຂອງພັກ, ກົດໝາຍ ແລະ ລະບຽບການຕ່າງໆຂອງລັດ, ພ້ອມທັງຍົກໃຫ້ເຫັນດ້ານອ່ອນ-ຂໍ້ຄົງຄ້າງ ທີ່ຈະຕ້ອງຮີບຮ້ອນເອົາໃຈໃສ່ປັບປຸງແກ້ໄຂຢ່າງເດັດຂາດ, ເຂັ້ມງວດ ແລະ ທັນສະພາບການ ໃຫ້ມີການຫັນປ່ຽນທີ່ຕັ້ງໜ້າໄປສູ່ຄຸນນະພາບໃໝ່ ເປັນຕົ້ນແມ່ນການແກ້ໄຂບັນຫາຫຍໍ້ທໍ້ທີ່ເກີດຂຶ້ນໃນກົງຈັກພັກ-ລັດ ແລະ ສະມາຊິກພັກ-ພະນັກງານແຕ່ລະຂັ້ນ ເພື່ອເປັນການສະກັດກັ້ນ ແລະ ຕີຖອຍປະກົດການຫຍໍ້ທໍ້ທີ່ອາດຈະເກີດຂຶ້ນໃນຕໍ່ໜ້າ

ກອງປະຊຸມຄັ້ງນີ້, ຍັງໄດ້ຮັບຟັງການເຜີຍແຜ່ເອກະສານສໍາຄັນຈຳນວນໜຶ່ງ ເປັນຕົ້ນແມ່ນ ບົດສະຫຼຸບ-ຕີລາຄາການເຄື່ອນໄຫວວຽກງານກວດກາແຕ່ປີ 2016 ເຖິງປັດຈຸບັນ ແລະ ບາງເນື້ອໃນສໍາຄັນຕົ້ນຕໍສໍາລັບການເຄື່ອນໄຫວແຕ່ນີ້ເຖິງ ປີ 2026 ຂອງຄະນະກວດກາສູນກາງພັກ; ບົດໂອ້ລົມຂອງ ສະຫາຍ ຄໍາພັນ ພົມມາທັດ ກໍາມະການກົມການເມືອງສູນກາງພັກ ປະທານອົງການກວດກາແຫ່ງລັດ ຕໍ່ກອງປະຊຸມວຽກງານກວດກາທົ່ວປະເທດ ຄັ້ງທີ IV; ເອກະສານບົດແນະນໍາວ່າດ້ວຍການຈັດຕັ້ງປະຕິບັດກົດລະບຽບພັກ ສະໄໝທີ XI ກ່ຽວກັບວຽກງານຕິດຕາມ ກວດກາພັກ; ຄໍາສັ່ງແນະນໍາຂອງຄະນະເລຂາທິການສູນກາງພັກ ວ່າດ້ວຍການເພີ່ມທະວີ. ພ້ອມນີ້, ຍັງໄດ້ຮັບຟັງການປະກອບຄວາມເຫັນໃນຫົວຂໍ້ຕ່າງໆຈາກບັນດາຮາກຖານພັກ, ບັນດາກົມ-ທຽບເທົ່າກົມ, ສາຂາ ທຫລ ແລະ ຜູ້ແທນເຂົ້າຮ່ວມກອງປະຊຸມທີ່ຕິດພັນກັບວຽກງານກວດກາ ແລະ ການຈັດຕັ້ງປະຕິບັດວຽກງານວິຊາສະເພາະຂອງຕົນ ເພື່ອເຮັດໃຫ້ການເຄື່ອນໄຫວວຽກງານຕົວຈິງຢູ່ແຕ່ລະຂັ້ນ, ແຕ່ລະພາກສ່ວນ ໄດ້ຮັບການຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.

(ຂ່າວ-ພາບ: ວັນເພັງ)

ຂ່າວທີ່ໄດ້ຮັບຄວາມນິຍົມ