ທ່ານ ທະວີສັກ ໄຊຍະວົງ ເຈົ້າເມືອງໆເງິນ ພ້ອມດ້ວຍຄະນະ ແລະ ທີມນັກກິລາໄດ້ເດີນທາງໄປຮ່ວມງານແຂ່ງຂັນກິລາມິດຕະພາບລາວ-ໄທ ລະຫວ່າງ ເມືອງເງິນ ແຂວງໄຊຍະບູລີ ສປປ ລາວ ກັບ ອຳເພີ ສະເຫຼີມພະກຽດ ຈັງຫວັດນ່ານ ປະເທດໄທ ຄັ້ງທີ່ 24 ທີ່ທາງ ອຳເພີສະເຫຼີມພະກຽດ ໄດ້ຮັບກຽດເປັນເຈົ້າພາບ ຈັດຂຶ້ນຫວ່າງບໍ່ດົນມານີ້ ຊຶ່ງໃຫ້ກຽດຕ້ອນຮັບຢ່າງອົບອຸ່ນຈາກທ່ານ ທ່ານ ສຸທັດ ລິ້ມວະນິດກຸນ ນາຍອຳເພີສະເຫຼີມພະກຽດ ພ້ອມດ້ວຍຄະນະ, ມີຄະນະນຳເມືອງເງິນ-ອຳເພີສະເຫຼີມພະກຽດ, ນັກກິລາ, ນັກທຸລະກິດຜູ້ປະກອບການ ຕະຫຼອດຮອດມວນຊົນ ທັງ 2 ເມືອງເຂົ້າຮ່ວມ.

ການຈັດງານແຂ່ງຂັນກິລາໃນຄັ້ງນີ້ ທ່ານ ສຸທັດ ລິ້ມວະນິດກຸນ ນາຍອຳເພີສະເຫຼີມພະກຽດ ແລະ ທ່ານ ທະວີສັກ ໄຊຍະວົງ ເຈົ້າເມືອງໆເງິນ ໄດ້ກ່າວເປີດການແຂ່ງຂັນກິລາ ມິດຕະພາບລາວ - ໄທ ຄັ້ງທີ 24 ຢ່າງເປັນທາງການ. ເພື່ອສືບຕໍ່ເສີມສ້າງສາຍພົວພັນ ອັນດີງາມ ແລະ ມູນເຊື້ອຄວາມສາມັກຄີຮັກແພງຊ່ວຍເຫຼືອຊຶ່ງກັນ ແລະ ກັນ ທີ່ມີມາແຕ່ດຶກດຳບັນ ເປັນການພົບປະແລກປ່ຽນ ຖອດຖອນບົດຮຽນຊຶ່ງກັນ ແລະ ກັນ ດ້ານກິລາກາຍະກຳ, ເປີດໂອກາດໃຫ້ນັກທຸລະກິດຊາວຄ້າຂາຍ ໄດ້ສົນທະນາ ດ້ານການຄ້າ, ການລົງທຶນ, ການບໍລິການ ແລະ ການທ່ອງທ່ຽວ ທັງນີ້ກໍເພື່ອແນໃສ່ ຊາຍແດນລາວ-ໄທ ກໍຄືເມືອງເງິນ ກັບ ອຳສະເຫຼີມພະກຽດ ໄດ້ມີຄວາມສະຫງົບສັນຕິສຸກຢ່າງໜັກແໜ້ນ ກາຍເປັນຊາຍແດນ ແຫ່ງສັນຕິພາບ-ມິດຕະພາບ ແລະ ການຮ່ວມມືຢ່າງແທ້ຈິງ.

ການຈັດງານແຂ່ງຂັນກິລາໃນຄັ້ງນີ້ ມີ 4 ປະເພດກິລາຄື: ເຕະບານ ຍິງ-ຊາຍ, ບານສົ່ງ ຍິງ-ຊາຍ, ເປຕັງ ຍິງ-ຊາຍ, ກິລາກະຕໍ້ຫວາຍຊາຍ. ຜົນການແຂ່ງຂັນເຕະບານຊາຍຊາວໜຸ່ມ ແມ່ນເມືອງເງິນ ເອົາຊະນະ 1-0 ປະຕູ, ເຕະບານຂັ້ນການນຳ ແມ່ນ ເມືອງເງິນ ເອົາຊະນະ ອຳເພີສະເຫຼີມພະກຽດ 3-1 ປະຕູ , ເຕະບານ ຍິງ ແມ່ນເມືອງເງິນ ເອົາຊະນະ 4-1 ປະຕູ, ບານສົ່ງຊາຍ ແມ່ນເມືອງເງິນເອົາຊະນະ 3-0 ເກມ, ບານສົ່ງຍິງ ແມ່ນ ອຳເພີສະເຫຼີມພະກຽດ ເອົາຊະນະ 2-0 ເກມ, ກະຕໍ້ຫວາຍ ຊາຍ ແມ່ນເມືອງເງິນ ເອົາ ຊະນະ 2-0 ເກມ, ເປຕັງ ຍິງ ແລະ ເປຕັງຊາຍ ເມືອງເງິນ ຊະນະອຳເພີສະເຫຼີມພະກຽດ.

ຫຼັງຈາກສຳເລັດການແຂ່ງຂັນກິລາ ທາງຄະນະປະທານ ກໍໄດ້ມອບຂອງຂວັນລາງວັນ ໃຫ້ນັກກິລາແຕ່ລະປະເພດ, ພ້ອມທັງຮັບຊົມການສະແດງສິລະປະທັງສອງເມືອງ ແລະ ຮ່ວມພາເຂົ້າສາມັກຄີ.

ຂ່າວ-ພາບ: ອິນແປງ ແຫວນຄຳ