ເນື່ອງໃນໂອກາດທີ່ສະມາຄົມທຸລະກິດທ່ອງທ່ຽວແຫ່ງຣາຊະອານາຈັກກໍາປູເຈຍຕິດຕາມຄະນະຜູ້ແທນກະຊວງທ່ອງທ່ຽວແຫ່ງຣາຊະອານາຈັກກໍາປູເຈຍຢ້ຽມຢາມ ສປປ ລາວ ໃນວັນທີ 13 ມີນາ ຜ່ານມາ, ສະມາຄົມທຸລະກິດດັ່ງກ່າວໄດ້ເຂົ້າຮ່ວມກອງປະຊຸມພົບປະສົ່ງເສີມພາກທຸລະກິດທີ່ຈັດຂຶ້ນໂດຍສະມາຄົມທຸລະກິດທ່ອງທ່ຽວລາວຢູ່ໂຮງແຮມລາວພລາຊາ ນະຄອນຫຼວງວຽງຈັນ. ຈຸດປະສົງເພື່ອສ້າງກາລະໂອກາດໃຫ້ແກ່ພາກທຸລະກິດ ເພື່ອແລກປ່ຽນຊື້-ຂາຍຜະລິດຕະພັນການທ່ອງທ່ຽວຂອງທັງສອງຝ່າຍ.

ພາຍຫຼັງສໍາເລັດກອງປະຊຸມ ທັງສອງສະມາຄົມໄດ້ລົງນາມເຊັນບົດບັນທຶກຄວາມເຂົ້າໃຈ (MOU) ເພື່ອຮ່ວມກັນສົ່ງເສີມຕະຫຼາດທ່ອງທ່ຽວຂອງທັງສອງຝ່າຍ ໂດຍການລົງນາມຂອງ ທ່ານ ອິນທີ ເດືອນສະຫວັນ ຮອງປະທານສະມາຄົມທຸລະກິດທ່ອງທ່ຽວລາວ ແລະ ທ່ານນາງ ອັອກຍາ ຊາຍ ຊິວລິນ (OKnha Chhay Sivlin) ປະທານສະມາຄົມທຸລະກິດທ່ອງທ່ຽວແຫ່ງຣາຊະອານາຈັກກໍາປູເຈຍ ຊຶ່ງມີ ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ທ່ານ ທອງ ຄົນ ລັດຖະມົນຕີກະຊວງທ່ອງທ່ຽວ ແຫ່ງຣາຊະອານາຈັກກຳປູເຈຍ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

ການລົງນາມຄັ້ງນີ້, ເພື່ອແລກປ່ຽນການຮ່ວມມືທາງດ້ານການທ່ອງທ່ຽວ ສອງປະເທດລາວ-ກໍາປູເຈຍ ກໍາປູເຈຍ-ລາວ ກໍຄືການພັດທະນາຂະຫຍາຍສາຍພົວພັນການທ່ອງທ່ຽວລະຫວ່າງພາກລັດ ແລະ ພາກເອກະຊົນ ໃນຂະແໜງການທ່ອງທ່ຽວໃຫ້ມີຄວາມຍືນຍົງ ໂດຍສະເພາະການຮ່ວມມືດ້ານກິດຈະກໍາພັດທະນາການ ທ່ອງທ່ຽວ ເພື່ອໃຫ້ກາຍເປັນຄູ່ຮ່ວມມືທາງດ້ານການທ່ອງທ່ຽວ ພ້ອມນັ້ນຍັງເປັນການໂຄສະນາ ແລະ ສະໜັບສະໜູນຕະຫຼາດການທ່ອງທ່ຽວໃຫ້ເຕີບໃຫຍ່ຂະຫຍາຍຕົວ ແນໃສ່ຮັດແໜ້ນການຮ່ວມມືການທ່ອງທ່ຽວສອງປະເທດ ແລະ ສ້າງຄວາມເຂັ້ມແຂງໃຫ້ແກ່ສອງສະມາຄົມໃຫ້ນັບມື້ແໜ້ນແຟ້ນຍິ່ງໆຂຶ້ນ.

ຂ່າວ-ພາບ: ຍຸພິນທອງ