ເນື່ອງ​ໃນ​ໂອ​ກາດ​ວັນ​ສ້າງ​ຕັ້ງ​ພັກ​ປະ​ຊາ​ຊົນ​ ປະ​ຕິ​ວັດ​ລາວ ຄົບ​ຮອບ 68 ປີ (22/3/1955-22/3/2023) ທ່ານ ຄໍາໝັ້ນ ໄຊຍະແສງ ປະທານ ກຸ່ມບໍລິສັດ ຈະເລີນພັດທະນາ ຄະນະບໍລິຫານງານສະພາການຄ້າ ແລະ ອຸດສະຫະກໍານະຄອນຫຼວງວຽງຈັນ ຄະນະທີ່ປຶກສາ ແລະ ຄູ່ຮ່ວມງານວຽກງານຊົນເຜົ່າສູນກາງແນວລາວສ້າງຊາດ ໄດ້​ສະ​ແດງ​ຄວາມ​ຮູ້​ສຶກຕໍ່​ວັນ​ດັ່ງ​ກ່າວວ່າ: ໃນນາມເປັນນັກທຸລະກິດຜູ້ໜຶ່ງ ຂໍສະແດງຄວາມຂໍ່ານັບ ແລະ ຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ທີ່ໄດ້ໝູນວຽນມາບັນຈົບຄົບຮອບ 68 ປີ.

ຕະຫຼອດ 68 ປີຜ່ານມາ, ເຫັນໄດ້ວ່າ ພັກເຮົາໃນນາມເປັນພັກຂອງຊົນຊັ້ນກໍາມະກອນ ພາຍຫຼັງນໍາພາປະຊາຊົນຕໍ່ສູ້ກັບພວກຈັກກະພັດລ່າເມືອງຂຶ້ນ​ແບບ​ເກົ່າ ແລະ ໃໝ່ ຢ່າງດຸເດືອດຂ້ຽວຂາດ ຈົນໄດ້ຮັບໄຊຊະນະຢ່າງສົມບູນ ແລະ ປົດປ່ອຍປະເທດຊາດ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ ປີ 1975. ຈາກ​ນັ້ນພັກເຮົາໄດ້ສືບຕໍ່ນໍາພາປະຊາຊົນປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ປະເທດເຮົາມີສະຖຽນລະພາບທາງດ້ານການເມືອງຢ່າງໜັກແໜ້ນ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ, ເຮັດໃຫ້ຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ຕະຫຼອດປະຊາຊົນນັບມື້ນັບດີຂຶ້ນເທື່ອ​ລະ​ກ້າວ.

ໃນໄລຍະປະເທດເຮົາພົບກັບການແຜ່ລະບາດຂອງພະຍາດໂຄວິດ-19 ເຮັດໃຫ້ເສດຖະກິດໃນທົ່ວໂລກ ກໍຄືເສດຖະກິດພາຍໃນປະເທດເຮົາພົບກັບຄວາມຫຍຸ້ງຍາກບໍ່ໜ້ອຍ. ແຕ່ຍ້ອນການນໍາພາ ອັນປີຊາສາມາດສະຫຼາດສ່ອງໃສຂອງພັກປະຊາຊົນ ປະຕິວັດລາວ ຈຶ່ງສາມາດຜ່ານຜ່າ​ອຸ​ປະ​ສັກ​ດັ່ງ​ກ່າວໄດ້ ໂດຍ​ລັດ​ຖະ​ບານ​ໄດ້​ອອກວາລະແຫ່ງຊາດໃນການແກ້ໄຂດ້ານເສດຖະກິດ-ການເງິນ. ໃນດ້ານໜຶ່ງອີກ ພັກເຮົາໄດ້ເຫັນຄວາມສໍາຄັນ ໄດ້ຊຸກຍູ້ສົ່ງເສີມ, ສ້າງທຸກເງື່ອນໄຂ, ອໍານວຍຄວາມສະດວກໃຫ້ນັກທຸລະກິດຂອງລາວ ກໍຄືຕ່າງປະເທດດໍາເນີນທຸລະກິດຢ່າງຖືກຕ້ອງສອດຄ່ອງ ມີກົດໝາຍ, ນິຕິກໍາຮອງຮັບ ເຮັດໃຫ້ການດໍາເນີນທຸລະກິດສະດວກດີຍິ່ງຂຶ້ນ.

ຂ້າພະເຈົ້າ ໃນ​ນາມນັກທຸລະກິດ ພ້ອມແລ້ວ ທີ່ຈະສືບຕໍ່ປະຕິບັດຕາມແນວທາງຂອງພັກ, ຈະສຸມທຸກຄວາມສາມາດຂອງຕົນປະກອບສ່ວນຢ່າງຈິງໃຈຕໍ່ການພັດທະນາເສດຖະກິດຂອງປະເທດເຮົາໃຫ້ເຂັ້ມແຂງຍິ່ງຂຶ້ນ ແລະ ຈະຊຸກຍູ້ຕາມຄວາມສາມາດຂອງຕົນ ປະກອບ​ສ່ວນໃຫ້ວຽກງານຊົນເຜົ່າຂອງສູນກາງແນວລາວສ້າງຊາດມີການຂະຫຍາຍຕົວ​ຂຶ້ນ ແລະ ມີຜົນສໍາເລັດ.

ໃນໂອກາດອັນສະຫງ່າລາສີນີ້, ຂ້າພະເຂົ້າ ຂໍອວຍພອນໄຊອັນປະເສີດມາຍັງການ​ນຳພັກ-ລັດ ຈົ່ງ​ມີພະ​ລາ​ນາ​ໄມ​ສົມ​ບູນ ສືບຕໍ່ນໍາພາປະເທດຊາດໃຫ້ກ້າວໄປຂ້າງໜ້າ ຕາມຈຸດໝາຍສັງຄົມນິຍົມ.