ກອງປະຊຸມສະຫຼຸບຂະບວນການແຂ່ງຂັນຍ້ອງຍໍ 5 ປີ (2016-2020) ແລະ ປະກາດເນື້ອໃນການແຂ່ງຂັນ4 ບຸກ, 2 ເປັນເຈົ້າ, 11 ບັນລຸ ໄລຍະປີ 2020-2021 ຂອງພະແນກສາທາລະນະສຸກແຂວງບໍ່ແກ້ວ ໄດ້ຈັດຂຶ້ນໃນວັນທີ 13 ມີນາ ຜ່ານມາ ທີ່ພະແນກດັ່ງກ່າວ, ໂດຍການເປັນປະທານຂອງທ່ານ ບຸນຍະເວດ ວົງຄໍາຊາວ ຫົວໜ້າພະແນກສາທາລະນະສຸກແຂວງ, ໃຫ້ກຽດເຂົ້າຮ່ວມຂອງ ທ່ານ ສຸກຂະຫຼຽນ ທອງຄໍາ ຄະນະປະຈໍາພັກແຂວງ ປະທານກວດກາພັກ ອົງການກວດກາລັດ ແລະ ການສໍ້ລາດບັງຫຼວງແຂວງ, ມີຄະນະພັກ, ຄະນະພະແນກ, ຫົວ ໜ້າ-ຮອງຫົວໜ້າຂະແໜງຕະຫຼອດຮອດພະນັກງານວິຊາການເຂົ້າຮ່ວມ.

ໃນກອງປະຊຸມ, ໄດ້ຜ່ານມະຕິຕົກລົງຂອງກົມການເມືອງສູນກາງພັກ ສະບັບເລກທີ 01/ກມສພ, ດໍາລັດຂອງປະທານປະເທດເລກທີ 011/ປທ, ດໍາລັດວ່າດ້ວຍການແຂ່ງຂັນ ແລະ ການຍ້ອງຍໍເລກທີ 116/ລປ, ຄໍາແນະນໍາກ່ຽວກັບການຈັດຕັ້ງຜັນຂະຫຍາຍດໍາລັດວ່າດ້ວຍການແຂ່ງຂັນຍ້ອງຍໍເລກທີ 01/ພນ ແລະ ຄໍາແນະນໍາຂອງຄະນະຊີ້ນໍາຂັ້ນແຂວງເລກທີ 01/ຄຊຂຍ. ຈາກນັ້ນ, ທ່ານ ບຸນຍະເວດ ວົງຄໍາຊາວ ໄດ້ຜ່ານບົດສະຫຼຸບຂະບວນການແຂ່ງຂັນຮັກຊາດ ແລະ ພັດທະນາໄລຍະ 2016-2020. ພະແນກສາທາລະນະສຸກແຂວງບໍ່ແກ້ວ ໄດ້ກໍານົດເອົາເນື້ອໃນແຂ່ງຂັນຮັກຊາດ ແລະ ພັດທະນາ, ສໍາລັບແຜນການແຂ່ງຂັນຍ້ອງຍໍປີ 2021-2025, ໄດ້ກໍານົດເອົາຂໍ້ແຂ່ງຂັນ 4 ບຸກ, 2 ເປັນເຈົ້າ ແລະ 11 ບັນລຸ ຊຶ່ງມີເນື້ອໃນດັ່ງນີ້, ເນື້ອໃນ 4 ບຸກຄື: ບຸກທາງດ້ານການເມືອງແນວຄິດ, ບຸກທາງດ້ານການຈັດຕັ້ງ, ບຸກດ້ານແບບແຜນນໍາພາ-ແບບແຜນວິທີເຮັດວຽກ, ບຸກດ້ານການລົງກໍ່ສ້າງຮາກຖານ, 2 ເປັນເຈົ້າມີຄື: ເປັນເຈົ້າພັດທະນາອົງກອນຂອງຕົນ, ເປັນເຈົ້າພັດທະນາຕົນເອງ ແລະ 11 ບັນລຸເປົ້າໝາຍຕົວຊີ້ບອກ. ຈາກນັ້ນ, ກໍໄດ້ປະດັບຫຼຽນໄຊແຮງງານຊັ້ນ I ມີ 2 ທ່ານ, ຫຼຽນໄຊແຮງງານຊັ້ນ II ມີ 3 ທ່ານ, ຫຼຽນໄຊແຮງງານ III ມີ 9 ທ່ານ ແລະ ຫຼຽນກາແຮງງານມີ 9 ທ່ານ, ໃຫ້ກຽດປະດັບ ໂດຍທ່ານ ສຸກຂະຫຼຽນ ທອງຄໍາ ແລະ ມອບໃບຍ້ອງຍໍລັດຖະບານ 19 ທ່ານ, ໃບຍ້ອງຍໍທ່ານເຈົ້າແຂວງ 13 ທ່ານ, ໃຫ້ກຽດມອບແມ່ນ ທ່ານ ບຸນຍະເວດ ວົງຄໍາຊາວ, ພ້ອມນັ້ນ ຍັງໄດ້ຈັບມືແຂ່ງຂັນໃນຫົວຂໍ້ 4 ບຸກ, 2 ເປັນເຈົ້າ 11 ບັນລຸ ໄລຍະ 2021-2025.

(ຂ່າວ-ພາບ: ຄຳພັນແກ້ວມະນີ)