ໂດຍ: ວັນເພັງ

ພະຍາດສາຍຕາຂຸ່ນ (ແກ່ນຕາຂຸ່ນ) ແມ່ນພົບເຫັນຫຼາຍທົ່ວໄປໃນກຸ່ມຄົນອາຍຸ 50 ປີຂຶ້ນໄປ, ແກ່ນຕາຂຸ່ນຈະມີອາການເປັນໄປຢ່າງຊ້າໆບໍ່ເຈັບປວດ ແລະ ເຮັດໃຫ້ສາຍຕາໃນການເບິ່ງເຫັນເລີ່ມຫຼຸດລົງ, ແກ່ນຕາຂຸ່ນຍັງເກີດຈາກສະພາບແກ່ນຕາມີການປ່ຽນແປງ ແລະ ຍັງເປັນສາເຫດເຮັດໃຫ້ຄົນຕາບອດໄດ້ຖ້າບໍ່ໄດ້ຮັບການປິ່ນປົວດ້ວຍວິທີຜ່າຕັດ ແລະ ໃສ່ແກນຕາທຽມ, ສະນັ້ນຖ້າໄດ້ຮັບການຜ່າຕັດ, ປິ່ນປົວໃຫ້ຖືກວິທີກໍຈະຫາຍດີໄດ້.

ແກ່ນຕາຂຸ່ນຈະມີອາການສາຍຕາມົວ, ເຫຼື້ອມຕາເວລາເບິ່ງແສງແຈ້ງ ແລະ ມັກມີວົງອ້ອມແສງດັ່ງກ່າວ ແລະ ປັດໄຈທີ່ພາໃຫ້ເປັນພະຍາດແກ່ນຕາຂຸ່ນຄື: ເບົາຫວານ, ມີການອັກເສບຕາ, ມີຄອບຄົວທີ່ເປັນແກ່ນຕາຂຸ່ນ, ການໃກ້ຊິດກັບຄວັນໄຟຫຼາຍເກີນໄປ, ການສຳຜັດກັບແສງແດດທີ່ກ້າ ແລະ ບໍ່ໃສ່ແວ່ນປ້ອງກັນ ແລະ ອື່ນໆ. ສະນັ້ນ, ເມື່ອທ່ານເປັນແກນຕາຂຸ່ນ ກໍສາມາດໄດ້ຮັບການກວດສາຍຕາວ່າເປັນແກ່ນຕາຂຸ່ນແທ້ ຫຼື ບໍ? ຖ້າກວດພົບແຕ່ຫົວທີ ກໍຈະສາມາດປິ່ນປົວໃຫ້ຖືກວິທີ ທັງຫຼຸດຜ່ອນການສູນເສຍສາຍຕາໂດຍຖາວອນ. ພ້ອມນີີ້, ທ່ານຄວນຫຼີກລ່ຽງຄວາມສ່ຽງການເປັນແກ່ນຕາຂຸ່ນຄື: ການໃສ່ແວ່ນຕາທີ່ມີຂອບແວ່ນປົກເອົາຂອບຕາ ແລະ ປ້ອງກັນແສງໄດ້ດີ ຫຼື ໃສ່ໝວກ, ຫຼຸດຜ່ອນ ຫຼື ຢຸດເຊົາການສູບຢາກໍສາມາດຫຼຸດຜ່ອນການເປັນແກ່ນຕາຂຸ່ນໄດ້, ອີກວິທີໜຶ່ງສຳລັບຜູ້ທີ່ເປັນແກ່ນຕາຂຸ່ນສາມາດເບິ່ງເຫັນຄືນໄດ້ຄື: ຕ້ອງໄດ້ຮັບການປ່ຽນແກ່ນຕາທີ່ຂຸ່ນ ເນື່ອງຈາກວ່າການປ່ຽນແກ່ນຕາຂຸ່ນຍັງເປັນວິທີທີ່ດີປອດໄພທີ່ສຸດ ແລະ ຈະເຮັດໃຫ້ສາຍຕາຂອງທ່ານດີຂຶ້ນຕາມລະດັບ.

ປັດຈຸບັນຍັງມີຂ່າວດີ ສຳລັບຜູ້ທີ່ເປັນແກ່ນຕາຂຸ່ນ ທ່ານສາມາດໄປຮັບການກວດສຸຂະພາບຕາ ແລະ ປ່ຽນແກ່ນຕາຂຸ່ນໂດຍບໍ່ເສຍຄ່າໄດ້ ທີ່ໂຮງໝໍສູນກາງ 103 ກອງທັບ ນະຄອນຫຼວງວຽງຈັນ ເລີ່ມແຕ່ ວັນທີ 14 ມີນາ ຫາ ວັນທີ 7 ເມສາ 2023 ເວລາ 8:30 ໂມງເປັນຕົ້ນໄປ ຊຶ່ງໂຄງການດັ່ງກ່າວເປັນການຮ່ວມມືຂອງທີມແພດລາວ ແລະ ທີມແພດຊ່ຽວຊານຕາຈາກ ສປ ຈີນ.

(ຂໍ້ມູນຈາກ: ປຶ້ມໂຄງການຮັກສາສຸຂະພາບຕາ ກະຊວງສາທາລະນະສຸກ )