ເມື່ອບໍ່ດົນມານີ້, ກົມຄຸ້ມຄອງຊັບສິນແຫ່ງລັດ ກະຊວງການເງິນ ພ້ອມດ້ວຍພາກທີ່ກ່ຽວຂ້ອງຂັ້ນສູນກາງ ແລະ ຂັ້ນແຂວງ ລົງເຄື່ອນໄຫວຕິດແຜ່ນກາໝາຍນໍາໃຊ້ສະຕິກເກີ QR code (ຄິວອາໂຄດ) ໃສ່ລົດຂອງລັດຢູ່ແຂວງເຊກອງ ໂດຍມີທ່ານ ສົມບູນ ລັດຕະນະພອນ ຮອງຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ, ທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງເຊກອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ສົມບູນ ລັດຕະນະພອນ ໄດ້ກ່າວວ່າ: ການລົງຕິດແຜ່ນກາໝາຍນໍາໃຊ້ສະຕິກເກີ QR code ໃສ່ລົດຂອງລັດຢູ່ແຂວງເຊກອງໃນຄັ້ງນີ້ ແມ່ນເພື່ອຜັນຂະຫຍາຍ ແລະ ຈັດຕັ້ງປະຕິບັດດໍາລັດຂອງລັດຖະບານ ສະບັບເລກທີ 599/ລບ ລົງວັນທີ 29 ກັນຍາ 2021 ວ່າດ້ວຍລົດຂອງລັດ ແລະ ຄໍາແນະນໍາຂອງລັດຖະມົນຕີກະຊວງການເງິນ ສະບັບເລກທີ 0393/ກງ ລົງວັນທີ 4 ກຸມພາ 2022 ວ່າດ້ວຍການຄຸ້ມຄອງ ແລະ ນໍາໃຊ້ລົດບໍລິຫານຂອງລັດ. ການລົງຕິດແຜ່ນກາໝາຍນໍາໃຊ້ສະຕິກເກີ QR code ໃສ່ລົດຂອງລັດຢູ່ແຂວງເຊກອງ ມີທັງໝົດ 1.560 ຄັນ. ໃນນີ້, ລົດໃຫຍ່ 378 ຄັນ, ລົດຈັກ 1.182 ຄັນ ແລະ ໃນຊຸດນີ້, ຕິດໄດ້ທັງໝົດ 108 ຄັນ, ສ່ວນທີ່ເຫຼືອແມ່ນຈະສືບຕໍ່ຕິດໃນຊຸດຕໍ່ໄປ ແລະ ຄາດຄະເນຈະໃຫ້ສໍາເລັດໃນປີ 2023.

ທ່ານ ສົມບູນ ລັດຕະນະພອນ ກ່າວຕື່ມວ່າ: ລົດຂອງລັດທຸກຄັນທີ່ນຳໃຊ້ເຂົ້າໃນວຽກງານບໍລິຫານລວມ, ລົດຮັບໃຊ້ວຽກງານວິຊາສະເພາະ ແລະ ລົດວິຊາສະເພາະຈຳເພາະ ຕ້ອງຕິດແຜ່ນກາໝາຍນຳໃຊ້ ໂດຍລະບຸຊື່ອົງການທີ່ນຳໃຊ້ ພ້ອມທັງຂຽນວ່າ ລົດຮັບໃຊ້ວຽກງານທາງລັດຖະການ ແລະ ມີບາໂຄດ QR code ໂດຍໃຫ້ຕິດໃສ່ປະຕູເບື້ອງໜ້າທັງສອງດ້ານ ທັງນີ້ ກໍເພື່ອຫັນເຂົ້າສູ່ການຄຸ້ມຄອງລົດຂອງລັດດ້ວຍລະບົບທັນສະໄໝ, ນຳໃຊ້ໃຫ້ມີປະສິດທິຜົນ ແລະ ຈຳກັດການນຳໃຊ້ລົດຂອງລັດບໍ່ຖືກເປົ້າໝາຍ ແນໃສ່ຕອບສະໜອງການຈັດຕັ້ງປະຕິບັດນະໂຍບາຍປະຢັດທີ່ລັດຖະບານໄດ້ວາງອອກໃຫ້ປະກົດຜົນເປັນຈິງເທື່ອລະກ້າວ.

(ຂ່າວ-ພາບ: ສັນຍາ)