ພະແນກການເງິນ ແຂວງໄຊຍະບູລີ ໄດ້ຈັດກອງປະຊຸມປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ປະຈໍາປີ 2022 ຂຶ້ນໃນວັນທີ 15 ມີນາ ຜ່ານມາ ທີ່ຫ້ອງປະຊຸມຫ້ອງວ່າການແຂວງ ໂດຍໃຫ້ກຽດເຂົ້າຮ່ວມຂອງ ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ, ມີພາກສ່ວນກ່ຽວຂ້ອງ ພ້ອມດ້ວຍພະນັກງານ-ລັດຖະກອນພາຍໃນພະແນກເຂົ້າຮ່ວມ.

ທ່ານ ວັນດາວ ແວວທະນັດສີ ຫົວໜ້າພະແນກການເງິນແຂວງ ໄດ້ຂຶ້ນຜ່ານຜົນການຈັດຕັ້ງປະຕິບັດວຽກງານຂອງພະນັກງານ-ລັດຖະກອນ ປີ 2022 ຜ່ານມາ ຊຶ່ງໄດ້ເລີ່ມຈັດຕັ້ງປະຕິບັດມາແຕ່ວັນທີ 29 ພະຈິກ 2022 ຜ່ານມາ ບົນພື້ນຖານການຈັດຕັ້ງປະຕິບັດຕາມ 4 ບາດກ້າວ ແລະ ຂັ້ນຕອນຂອງການປະເມີນ ແລະ ໄດ້ແບ່ງອອກເປັນ 5 ກຸ່ມປະເມີນ. ຜ່ານການຄົ້ນຄວ້າຂອງຄະນະພະແນກການເງິນແຂວງ ຕາມມາດຖານເງື່ອນໄຂ ຊຶ່ງມີພະນັກງານ-ລັດຖະກອນປະຈໍາການເຂົ້າຮ່ວມປະເມີນຕົວຈິງມີ 142 ທ່ານ ຍິງ 58 ທ່ານ, ບໍ່ໄດ້ປະເມີນ 1 ທ່ານ (ຍົກຍ້າຍມາໃໝ່). ຜ່ານການເລືອກເຟັ້ນ ແລະ ຈັດແບ່ງປະເພດພະນັກງານ-ລັດຖະກອນ ໄດ້ລະດັບດີຫຼາຍ 59 ທ່ານ ຍິງ 18 ທ່ານ ກວມ 41,55% ເພີ່ມຂຶ້ນ 21,28%. ຈາກປີ 2021 ລະດັບດີມີ 83 ທ່ານ ຍິງ 41 ທ່ານ ກວມ 58,45% ຫຼຸດລົງ 21,28%; ຈາກຜົນງານການປະເມີນເຫັນວ່າໃນ 1 ປີ ຜ່ານມາພະນັກງານ-ລັດຖະກອນພາຍໃນພະແນກການເງິນແຂວງ ໄດ້ມີຄວາມບຸກບືນຕັ້ງໜ້າຈັດຕັ້ງປະຕິບັດໜ້າທີ່ການເມືອງ ກໍຄືວຽກງານວິຊາສະເພາະຂອງຕົນຢ່າງຕັ້ງໜ້າ ຈຶ່ງເຮັດໃຫ້ບັນດາໜ້າວຽກບັນລຸຜົນສໍາເລັດອັນຈົບງາມ. ຈາກນັ້ນ, ກອງປະຊຸມຍັງໄດ້ມີການປະດັບຫຼຽນໄຊແຮງງານຊັ້ນ I, II, III, ຫຼຽນກາແຮງງານ ແລະ ໃບຍ້ອງຍໍລັດຖະບານໃຫ້ແກ່ບຸກຄົນ ແລະ ກົມກອງທີ່ມີຜົນງານດີເດັ່ນໃນການປະກອບສ່ວນເຂົ້າໃນຂະບວນແຂ່ງຂັນຮັກຊາດພັດທະນາ ສ້າງບ້ານພັດທະນາຕິດພັນກັບວຽກງານ 3 ສ້າງ ມີທັງໝົດ 87 ທ່ານ ຍິງ 38 ທ່ານ ແລະ 1 ກົມກອງ; ໃນນີ້, ປະດັບຫຼຽນໄຊແຮງງານຊັ້ນ I ມີ 2 ທ່ານ, ຫຼຽນໄຊແຮງງານຊັ້ນ II ມີ 5 ທ່ານ ຍິງ 1 ທ່ານ, ຫຼຽນໄຊແຮງງານຊັ້ນ III ມີ 10 ທ່ານ ຍິງ 3 ທ່ານ, ຫຼຽນກາແຮງງານມີ 28 ທ່ານ ຍິງ 11 ທ່ານ ແລະ 1 ກົມກອງ, ໃບຍ້ອງຍໍລັດຖະບານມີ 42 ທ່ານ ຍິງ 23 ທ່ານ ໃຫ້ກຽດປະດັບຫຼຽນ ແລະ ມອບໃບຍ້ອງຍໍລັດຖະບານໂດຍທ່ານຮອງເຈົ້າແຂວງໄຊຍະບູລີ.

(ພາບ+ຂ່າວ: ບຸນທີ)