ກອງປະຊຸມ ຄັ້ງທີ XIV ຂອງຄະນະກຳມະການຊາຍແດນລາວ-ມຽນມາ ຂັ້ນສູນກາງ ໄດ້ຈັດຂຶ້ນໃນລະຫວ່າງວັນທີ 14-16 ມີນາ ນີ້ ທີ່ເມືອງທ່າຂີ້ເຫຼັກ ສສ ມຽນມາ ຄະນະຜູ້ແທນຝ່າຍລາວ ນຳໂດຍ ທ່ານ ໂພໄຊ ໄຂຄໍາພິທູນ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ຫົວໜ້າຄະນະກໍາມະການຊາຍແດນລາວ-ມຽນມາຂັ້ນສູນກາງ ແລະ ຄະນະຜູ້ແທນຝ່າຍມຽນມາ ນຳໂດຍ ທ່ານ ຈໍ ມິວ ທຸດ ຮອງລັດຖະມົນຕີກະຊວງການຕ່າງປະເທດ ແຫ່ງ ສສ ມຽນມາ ຫົວໜ້າຄະນະກໍາມະການຊາຍແດນມຽນມາ-ລາວຂັ້ນສູນກາງ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ແລະ ຜູ້ຕາງໜ້າຈາກແຂວງບໍ່ແກ້ວ ແລະ ຫຼວງນໍ້າທາ ແລະ ລັດຊານຕາເວັນອອກທີ່ມີຊາຍແດນຕິດຈອດກັນເຂົ້າຮ່ວມ; ໃນກອງປະຊຸມ ສອງຝ່າຍໄດ້ຮ່ວມກັນທົບທວນຄືນການຈັດຕັ້ງປະຕິບັດເນື້ອໃນບົດບັນທຶກກອງປະ ຊຸມຄັ້ງທີ XIII ຂອງຄະນະກຳມະການຊາຍແດນ ລາວ-ມຽນມາ ຂັ້ນສູນກາງ ທີ່ໄດ້ຈັດຂຶ້ນໃນປີ 2018 ທີ່ຜ່ານມາ ກໍຄືສັນຍາວ່າດ້ວຍການຄຸ້ມຄອງ ແລະ ຮ່ວມມືຕາມຊາຍແດນຂອງສອງປະເທດ ສະບັບປີ 1997 ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍທີ່ນັບມື້ນັບຂະຫຍາຍຕົວສູງຂຶ້ນ ແລະ ໄດ້ປຶກສາຫາລືການພົວພັນຮ່ວມມືໃນຂົງເຂດວຽກງານຊາຍແດນຂອງສອງປະເທດ ຊຶ່ງລວມມີກົນໄກການຮ່ວມມືຂອງເຈົ້າໜ້າທີ່ຊາຍແດນ, ການນຳໃຊ້ບັດຜ່ານແດນ, ດ່ານຊາຍແດນ, ການພົວພັນຮ່ວມມືທາງດ້ານແຮງງານ, ການຄ້າຊາຍແດນ, ການເດີນເຮືອ ຕາມລຳແມ່ນ້ຳຂອງ, ການກວດກາ ແລະ ບູລະນະຫຼັກໝາຍຊາຍແດນ, ການສະກັດກັ້ນການຄ້າຂາຍຢາເສບຕິດ, ການຄຸ້ມຄອງການພັດທະນາບໍລິເວນຊາຍແດນ, ຊຸກຍູ້ໃຫ້ມີການແລກ ປ່ຽນທຶນການສຶກສາ ລະຫວ່າງແຂວງຕິດຊາຍແດນຂອງສອງປະເທດ, ບັນຫາອື່ນໆ ແລະ ໄດ້ກໍານົດທິດທາງຈັດຕັ້ງປະຕິບັດວຽກງານດັ່ງກ່າວໃນຕໍ່ໜ້າ; ພ້ອມດຽວກັນນີ້, ສອງຝ່າຍຍັງໄດ້ເຫັນດີເປັນເອກະພາບກັນຊຸກຍູ້ໃຫ້ເຈົ້າໜ້າທີ່ຊາຍແດນທ້ອງຖິ່ນຂອງຕົນ ເອົາໃຈໃສ່ເພີ່ມທະວີການຮ່ວມມື, ການແລກປ່ຽນຂໍ້ມູນຂ່າວສານ, ສະກັດກັ້ນການກໍ່ອາຊະຍາກຳຂ້າມແດນ, ການຄ້າຂາຍຢາເສບຕິດ ແລະ ສິ່ງຜິດກົດ ໝາຍອື່ນໆ ລວມທັງການສຶກສາອົບຮົມປະຊາຊົນທີ່ອາໄສຢູ່ຕາມບໍລິເວນຊາຍແດນຂອງສອງປະເທດປະຕິບັດການເຂົ້າ-ອອກເມືອງ ໃຫ້ຖືກຕ້ອງຕາມລະບຽບກົດໝາຍຂອງສອງປະເທດ ເພື່ອແນໃສ່ຮັບປະກັນຄວາມເປັນລະບຽບ ຮຽບຮ້ອຍຕາມບໍລິເວນຊາຍແດນ ລະຫວ່າງ ສປປ ລາວ ແລະ ສສ ມຽນມາ.

ກອງປະຊຸມຄັ້ງນີ້ ໄດ້ດໍາເນີນໄປ ພາຍໃຕ້ບັນຍາກາດໄມຕີຈິດມິດຕະພາບ, ດ້ວຍຄວາມເຂົ້າອົກເຂົ້າໃຈ ຖານບ້ານໃກ້ເຮືອນຄຽງທີ່ມີມູນເຊື້ອອັນດີງາມ ມາແຕ່ດົນນານ ຊຶ່ງເປັນການປະກອບສ່ວນສຳຄັນໃນການເພີ່ມທະວີສາຍພົວພັນມິດຕະພາບ ແລະ ຍົກສູງການຮ່ວມມືພັດທະນາທາງດ້ານວຽກງານຊາຍແດນຂອງທັງສອງປະເທດ ເພື່ອແນໃສ່ສ້າງຊາຍແດນຂອງສອງປະເທດໃຫ້ກາຍເປັນຊາຍແດນ ແຫ່ງສັນຕິ ພາບ, ມິດຕະພາບ ແລະ ການຮ່ວມມືຍາວນານ.

(ຂ່າວ-ພາບ: ກະຊວງການຕ່າງປະເທດ)