ວິທະຍຸກະຈາຍສຽງຫວຽດນາມລາຍງານ, ໃນວັນທີ 16 ມີນາ ຜ່ານມາ ຢູ່ແຂວງຫ໋າຍເຢືອງ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ໄປເຮັດວຽກຮ່ວມກັບການນຳແຂວງຫ໋າຍເຢືອງ ເພື່ອຕີລາຄາກ່ຽວກັບໝາກຜົນຂອງການພັດທະນາເສດຖະກິດ-ສັງຄົມ ປີ 2022 ແລະ ກຳນົດທິດທາງພັດທະນາໃນໄລຍະຕໍ່ໄປ.

ທ່ານ ຟ້າມມິງຈິງ ກ່າວຄຳເຫັນຕໍ່ກອງປະຊຸມ ວ່າ: ຮຽກຮ້ອງໃຫ້ແຂວງຫ໋າຍເຢືອງເອົາໃຈໃສ່ເປັນພິເສດເຖິງການເຕີບໂຕສີຂຽວ, ຫັນເປັນດີຈີຕອນ, ມີການປະດິດສ້າງໃໝ່ເພື່ອເຮັດໃຫ້ການພັດທະນາກ້າວກະໂດດຂັ້ນ ແລະ ຍືນຍົງ. ການພັດທະນາເສດຖະກິດແຂວງຫ໋າຍເຢືອງ ຕ້ອງອີງໃສ່ບັນດາທ່າແຮງທີ່ເປັນເສົາຄ້ຳຄື: ອຸດສາຫະກຳເຕັກໂນໂລຊີຂັ້ນສູງ, ສະໜັບສະໜູນດ້ານອຸດສາຫະກຳ, ເຕັກໂນໂລຊີຂັ້ນສູງດ້ານກະສິກຳ, ນຳໃຊ້ສູນເສດຖະກິດ, ອຸດສາຫະກຳ, ການບໍລິການທີ່ຕັ້ງຢູ່ແຂວງໃກ້ຄຽງເຊັ່ນ: ຮ່າໂນ້ຍ, ຫ໋າຍຝ່ອງ, ກ໋ວາງນິງ, ບັກນິງ ຢ່າງເຕັມເມັດເຕັມໜ່ວຍ. ພ້ອມດຽວກັນນີ້ແຂວງຫ໋າຍເຢືອງ ກໍຕ້ອງເອົາໃຈໃສ່ພັດທະນາວັດທະນະທຳໃຫ້ທຽບເທົ່າດ້ານການເມືອງ ແລະ ເສດຖະກິດ. ປີ 2022, ລວມຍອດຜະລິດຕະພັນພາຍໃນຂອງແຂວງຫ໋າຍເຢືອງ ຂະຫຍາຍຕົວ 9,14%, ສຳລັບການສົ່ງອອກສິນຄ້າແມ່ນບັນລຸໄດ້ 11,45 ຕື້ ໂດລາ.