ຂ່າວຕ່າງປະເທດລາຍງານ ເມື່ອວັນທີ 16 ມີນາ ຜ່ານມາ, ບັນດາບໍລິສັດຂະໜາດໃຫຍ່ຂອງຍີ່ປຸ່ນໄດ້ຕົກລົງເພີ່ມຄ່າຈ້າງແຮງງານຫຼາຍທີ່ສຸດໃນຮອບ 25 ປີ ຊຶ່ງທ່ານ ກິຊິດະ ຟູມິໂອະ ນາຍົກລັດຖະມົນຕີຍີ່ປຸ່ນໄດ້ຮຽກຮ້ອງໃຫ້ມີການປັບເພີ່ມຄ່າຕອບແທນ ເພື່ອຊົດເຊີຍກັບຄ່າຄອງຊີບທີ່ເພີ່ມສູງຂຶ້ນ.

ຄ່າຈ້າງແຮງງານ ຄືບັນຫາສຳຄັນທີ່ມີມາຫຼາຍປີຂອງຍີ່ປຸ່ນ ໂດຍເງິນເດືອນຂອງຄົນໃນປະເທດເກືອບຈະບໍ່ມີການປ່ຽນແປງເລີຍນັບຕັ້ງແຕ່ໄລຍະທ້າຍປີ 1990 ອີກທັງປັດຈຸບັນຍັງຢູ່ໃນລະດັບທີ່ຕ່ຳກວ່າຄ່າສະເລ່ຍຂອງກຸ່ມປະເທດທີ່ຮັ່ງມີໃນອົງການເພື່ອຄວາມຮ່ວມມືທາງດ້ານເສດຖະກິດ ແລະ ການພັດທະນາ (OECD) ອີກດ້ວຍ. ທ່ານ ກິຊິດະ ຟູມິໂອະ ໄດ້ຮຽກຮ້ອງໃຫ້ມີການຈ່າຍຄ່າຈ້າງທີ່ດີຂຶ້ນ ເນື່ອງຈາກສະກຸນເງິນເຢນທີ່ອ່ອນຄ່າ ແລະ ລາຄາສິນຄ້າສຳຄັນເພີ່ມສູງຂຶ້ນ ຊຸກຍູ້ໃຫ້ຕົ້ນທຶນການນຳເຂົ້າສູງຂຶ້ນລວມເຖິງເຮັດໃຫ້ອັດຕາເງິນເຟີ້ເພີ່ມສູງຂຶ້ນໃນດັບສູງທີ່ສຸດໃນຮອບ 4 ທົດສະວັດ. ທ່ານກ່າວຕື່ມວ່າ ໃນລະດູໃບໄມ້ປົ່ງໃນປີນີ້ຈະເປັນຈຸດປ່ຽນສຳລັບການເຕີບໂຕ ແລະ ການກະຈາຍຄວາມໝັ້ນຄົງພ້ອມທັງກ່າວຕື່ມວ່າ ທ່ານຕັ້ງເປົ້າໝາຍຂຶ້ນຄ່າແຮງງານຂັ້ນຕ່ຳທົ່ວປະເທດອີກເຊັ່ນດຽວກັນ.

ບໍລິສັດຂະໜາດໃຫຍ່ຫຼາຍແຫ່ງຂອງຍີ່ປຸ່ນລະບຸວ່າ: ພວກເຂົາຕົກລົງທີ່ຈະເພີ່ມເງິນເດືອນຕາມຄຳຮຽກຮ້ອງຂອງສະຫະພາບແຮງງານ ຊຶ່ງການເຈລະຈາໃນປີນີ້ຍັງຖືວ່າເປັນຄັ້ງທຳອິດທີ່ຜູ້ຜະລິດຍານພາຫະນະລາຍໃຫຍ່ທຸກແຫ່ງຂອງປະເທດຍອມຮັບຂໍ້ຮຽກຮ້ອງຂອງສະຫະພາບແຮງງານ ເຖິງຢ່າງໃດກໍຕາມ, ນັກວິເຄາະໄດ້ຄາດຄະເນວ່າ ສະຫະພາບແຮງງານຈະຮຽກຮ້ອງໃຫ້ປັບຂຶ້ນຄ່າຈ້າງແຮງງານໃນປີຕໍ່ໆໄປຖ້າຫາກພາວະເງິນເຟີ້ບັນເທົາລົງ ຊຶ່ງຄາດວ່າ ຈະເກີດຂຶ້ນຕັ້ງແຕ່ກາງປີນີ້ເປັນຕົ້ນໄປ.