ຂ່າວຕ່າງປະເທດລາຍງານ ເມື່ອບໍ່ດົນມານີ້, ທ່ານ ຮຸນເຊນ ນາຍົກລັດຖະມົນຕີກຳປູເຈຍໄດ້ເປີດເຜີຍວ່າ ປັດຈຸບັນ, ພະລັງງານໝູນວຽນກວມອັດຕາສ່ວນ 62% ຂອງກຳລັງການຜະລິດໄຟຟ້າຕິດຕັ້ງຂອງປະເທດ.

ທ່ານ ຮຸນເຊນ ກ່າວໃນຂະນະທີ່ເດີນທາງຢ້ຽມຢາມສະຖານທີ່ກໍ່ສ້າງໂຮງໄຟຟ້າພະລັງງານນ້ຳຂະ ໜາດ 80 ເມກາວັດ ໃນແຂວງໂພທິສັດທາງທິດຕາເວັນຕົກສ່ຽງເໜືອຂອງປະເທດວ່າ: ກຳປູເຈຍສາມາດເປັນໜຶ່ງໃນປະເທດທີ່ບໍ່ສ້າງມົນລະພິດຕໍ່ສິ່ງແວດລ້ອມ. ທ່ານ ຮຸນເຊນ ລະບຸວ່າ ໄຟຟ້າພະລັງງານນ້ຳຍັງຄົງເປັນທາງເລືອກທີ່ດີສຳລັບການພັດທະນາພະລັງງານທີ່ສະອາດ ແລະ ເປັນມິດຕໍ່ສິ່ງແວດລ້ອມ.

ອີກຢ່າງໜຶ່ງ, ພະລັງງານໝູນວຽນ ຄືພະລັງງານທີ່ມາຈາກແຫຼ່ງຕ່າງໆເຊັ່ນ: ພະລັງງານນໍ້າ, ພະລັງງານແສງຕາເວັນ ແລະ ພະລັງງານຊີວະມວນ ໂດຍພະລັງງານໝູນວຽນສ່ວນໃຫຍ່ໃນກຳປູເຈຍມາຈາກເຂື່ອນໄຟຟ້າພະລັງງານນ້ຳ. ການໄຟຟ້າແຫ່ງກຳປູເຈຍລະບຸວ່າ ການສະໜອງພະລັງງານຂອງປະເທດໃນປີ 2022 ຢູ່ທີ່ 4.495 ເມກາວັດ ເພີ່ມຂຶ້ນ 12,6% ຈາກ 3.990 ເມກາວັດໃນປີ 2021 ຂະນະທີ່ 98,27% ຂອງໝູ່ບ້ານທັງໝົດ 14.168 ແຫ່ງ ມີໄຟຟ້າໃຊ້ແລ້ວ.