ຂ່າວຕ່າງປະເທດລາຍງານໃນວັນທີ 17 ມີນາ ຜ່ານມາວ່າ: ອຳນາດການປົກຄອງຕັງຊານີກ່າວຢືນຢັນວ່າ ປະເທດຂອງຕົນຈະຫັນໄປສູ່ການສຶກສາລະດັບສູງເພື່ອເປັນສ່ວນ ໜຶ່ງໃນການປັບໂຄງສ້າງການພັດທະນາເສດຖະກິດຄືນໃໝ່. ທ່ານ ອາດອຟ ແມັກເກນດາ ລັດຖະມົນຕີ ກະຊວງສຶກສາທິການ ວິທະຍາສາດ ແລະ ເຕັກໂນໂລຊີ ກ່າວໃນກອງປະຊຸມລະດົມທຶນສຳລັບນັກສຶກສາທີ່ຕ້ອງການຮຽນໃນລະດັບສູງວ່າ: ເພື່ອບັນລຸເປົ້າໝາຍດັ່ງກ່າວ, ລັດຖະບານຈະສືບຕໍ່ລະດົມທຶນສຳລັບການສຶກສາລະດັບສູງ.

ທ່ານ ແມັກເກນດາ ກ່າວວ່າ: ນັບແຕ່ປີ 1994 ຈົນເຖິງປັດຈຸບັນ, ລັດຖະບານໄດ້ປ່ອຍເງິນກູ້ຢືມສຳລັບນັກສຶກສາລະດັບສູງເປັນວົງເງິນ 2,3 ຕື້ໂດລາ ຊຶ່ງມີຜູ້ໄດ້ຮັບປະໂຫຍດແລ້ວ 654.919 ຄົນ. ທ່ານ ລັດຖະມົນຕີຍອມຮັບວ່າ ການລະດົມທຶນເພີ່ມຂຶ້ນສຳລັບການສຶກສາຊັ້ນສູງກຳລັງກາຍເປັນສິ່ງທ້າທາຍ.

ທ່ານ ລັດຖະມົນຕີກ່າວວ່າ: ການລະດົມທຶນທີ່ເພີ່ມຂຶ້ນກໍເພື່ອຕອບສະໜອງກັບຈຳນວນນັກສຶກສາທີ່ເພີ່ມຂຶ້ນ ແລະ ແມ່ນຄວາມຈຳເປັນທີ່ມີຄ່າໃຊ້ຈ່າຍເພີ່ມຂຶ້ນ. ທ່ານຈຶ່ງຮຽກຮ້ອງໃຫ້ຜູ້ປ່ອຍເງິນກູ້ໃນຂະແໜງການສຶກສາຈົ່ງຊອກຫາຫຼາຍແຫຼ່ງທຶນເພື່ອສະໜອງເງິນກູ້ສຳລັບການສຶກສາຂັ້ນສູງ.