ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22/3/1955-22/3/2023), ສະຫາຍ ທັນວາ ສີສຸລາດ ຫົວໜ້າພະແນກນະໂຍບາຍ ແລະ ຍຸດທະສາດ ກົມເຕັກໂນໂລຊີ ແລະ ນະວັດຕະກຳ ກະຊວງເຕັກໂນໂລຊີ ແລະ ການສື່ສານ ໄດ້ສະແດງຄວາມຮູ້ສຶກຕໍ່ວັນດັ່ງກ່າວວ່າ: ຂ້າພະເຈົ້າມີຄວາມຮູ້ສຶກພາກພູມໃຈ ແລະ ດີໃຈຫຼາຍທີ່ໄດ້ມີຄວາມເຫັນ ຄວາມເຕີບໃຫຍ່ເຂັ້ມແຂງຂອງພັກປະຊາຊົນປະຕິວັດລາວ ຕະຫຼອດ 68 ປີຜ່ານມາ. ພັກປະຊາຊົນ ປະຕິວັດລາວ ເປັນພັກທີ່ມີກຽດສະຫງ່າແມ່ນກອງນຳໜ້າທີ່ມີການຈັດຕັ້ງ ແມ່ນການຈັດຕັ້ງການເມືອງສູງສຸດຂອງຊົນຊັ້ນກຳມະກອນ ແລະ ຂອງລະບອບປະຊາທິປະໄຕ ປະຊາຊົນລາວ ເປັນຕົວແທນທີ່ຈົງຮັກພັກດີຢ່າງສະເໝີຕົ້ນສະເໝີປາຍຕໍ່ສິດ ແລະ ຜົນປະໂຫຍດຂອງຊົນຊັ້ນກຳມະກອນ, ຊາວຜູ້ອອກແຮງງານລາວ ແລະ ຂອງຊາດລາວທັງໝົດ.

ດັ່ງທີ່ພວກເຮົາໄດ້ຮູ້ແລ້ວວ່າ ພັກ-ລັດ ໄດ້ມີແນວຄິດທີ່ສະຫຼາດສ່ອງໃສ ຊຶ່ງມັນສະແດງອອກພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ໂດຍ ປະທານ ໄກສອນ ພົມວິຫານ ທີ່ເຄົາລົບຮັກຂອງປະຊາຊົນບັນດາເຜົ່າ ພ້ອມດ້ວຍໝູ່ຄະນະທີ່ເປັນສະມາຊິກພັກກອມມູນິດອິນດູຈີນໃນເວລານັ້ນໄດ້ຈັດກອງປະຊຸມໃຫຍ່ສ້າງຕັ້ງພັກຂຶ້ນໂດຍໃສ່ຊື່ວ່າ:‘’ ພັກປະຊາຊົນລາວ’’ ຕໍ່ມາຈັດກອງປະຊຸມໃຫຍ່ຄັ້ງທີ II ຂອງພັກປະຊາຊົນລາວ ປີ 1972 ປ່ຽນຊື່ເປັນ ‘’ພັກປະຊາຊົນ ປະຕິວັດລາວ’’ ພັກເຮົາໄດ້ນຳພາປະຊາຊົນບັນດາເຜົ່າລຸກຮືຂຶ້ນຢຶດອຳນາດການປົກຄອງທົ່ວປະເທດ ແລະ ສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນໃນວັນທີ 2 ທັນວາ ປີ 1975 ສາມາດຍາດເອົາເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນ ມາສູ່ປະຊາຊົນບັນດາເຜົ່າ. ພັກເຮົາເວລາໃດກໍໄດ້ເອົາໃຈໃສ່ຢູ່ສະເໝີນອກຈາກຜົນປະໂຫຍດຂອງປະເທດຊາດ, ຕໍ່ຄວາມມຸ່ງມາດປາຖະ ໜາຂອງປະຊາຊົນ ແລະ ຮັບໃຊ້ສິດຜົນປະໂຫຍດຂອງປະຊາຊົນ, ນອກນີ້ແຕ່ລະໄລຍະພັກຍັງໄດ້ມີແນວທາງນະໂຍບາຍຫຼາຍດ້ານ, ການເປີດກວ້າງການຮ່ວມມືກັບຕ່າງປະເທດເປັນຕົ້ນບັນດາປະເທດເພື່ອນມິດໃນພາກພື້ນ ແລະ ສາກົນ ເພື່ອຍາດແຍ່ງເອົາການຊ່ວຍເຫຼືອມາພັດທະນາເສດຖະກິດ-ສັງຄົມຢູ່ປະເທດເຮົາ, ຊຸກຍູ້ການສຶກສາ, ສາທາ, ວັດທະນະທຳ, ລວມທັງສັງຄົມສົງເຄາະ ແລະ ປົກປ້ອງຜູ້ດ້ອຍໂອກາດ ແລະ ອ່ອນແອໃນສັງຄົມ, ການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບແມ່ນຄວາມສຳຄັນບຸລິມະສິດສູງ ກ່ຽວກັບການຮັບປະກັນສັນຕິພາບ, ຄວາມປອດໄພ, ຄວາມໝັ້ນຄົງຂອງຊາດ ແລະ ນຳພາປະເທດຊາດຈະເລີນຮຸ່ງເຮືອງສີວິໄລ, ມີຄວາມຍຸຕິທຳ, ປະຊາຊົນຢູ່ເຢັນເປັນສຸກ.

ຂ້າພະເຈົ້າໃນນາມສ່ວນຕົວຂໍໃຫ້ບັນດາທ່ານຈົ່ງຮັກສາມູນເຊື້ອອັນດີງາມ, ມູນເຊື້ອອັນພິລະອາດຫານທີ່ມີກຽດສະຫງ່າຂອງພັກປະຊາຊົນ ປະຕິວັດລາວ, ສືບຕໍ່ຜັນຂະຫຍາຍມູນເຊື້ອໃຫ້ໄດ້ຮັບຜົນດີ ແລະ ຂໍອວຍພອນໄຊອັນປະເສີດໃຫ້ແກ່ຜູ້ນຳພັກ-ລັດ, ທົ່ວພັກ, ທົ່ວລັດ, ທົ່ວປວງຊົນລາວເຮົາ ໃນໂອກາດວັນສ້າງຕັ້ງພັກ ຄົບຮອບ 68 ປີ ໃຫ້ປະສົບຜົນສຳເລັດໃນການດຳເນີນພາລະກິດການປ່ຽນແປງໃໝ່ທີ່ມີຄວາມໝາຍຄວາມສຳຄັນ ແລະ ມີລັກສະນະຮອບດ້ານເປັນພື້ນຖານສຳລັບການສືບຕໍ່ກ້າວຂຶ້ນສູ່ຈຸດໝາຍສັງຄົມນິຍົມ.

“ພັກປະຊາຊົນປະຕິວັດລາວຈົ່ງໝັ້ນຍືນ”