ໃນວັນທີ 16 ມີນາ ນີ້ ທີ່ຈຸດເປີດງານເທດສະການໝາກພ້າວນາໄຊ ບ້ານນາໄຊນ້ອຍ ເມືອງ ແລະ ແຂວງສາລະວັນ ໄດ້ຈັດພິທີຍ່າງເພື່ອສຸຂະພາບ ສົ່ງເສີມການທ່ອງທ່ຽວ ເທດສະການໝາກພ້າວນາໄຊ ຕິດພັນກັບງານບຸນລະປືບຂອງເຜົ່າກະຕາງ ປະຈຳປີ 2023, ໂດຍມີ ທ່ານ ຈັນສີລອນ ສີສົມບູນ ເຈົ້າເມືອງສາລະວັນ, ມີພະນັກງານການນຳຂັ້ນແຂວງ, ຂັ້ນເມືອງ, ພະນັກງານ-ລັດຖະກອນ, ຄອບຄົວການນຳ, ນັກທຸລະກິດ, ນັກຮຽນ, ນັກສຶກສາ ພ້ອມດ້ວຍມວນຊົນຊາວບ້ານນາໄຊ ແລະ ບ້ານໃກ້ຄຽງເຂົ້າຮ່ວມ.

ທ່ານ ໜູຄຳ ສີສະຫວັດ ຮອງເຈົ້າເມືອງສາລະວັນ ໄດ້ກ່າວຈຸດປະສົງຂອງງານດັ່ງກ່າວວ່າ: ຂະບວນການຍ່າງມາລາທອນ ອອກກຳລັງກາຍ ເພື່ອສຸຂະພາບ ຕິດພັນກັບການສົ່ງເສີ່ມການທ່ອງທ່ຽວເທດສະການໝາກພ້າວນາໄຊ ແລະ ງານບຸນລະປືບ ຂອງເຜົ່າກະຕາງ ບ້ານນາໄຊ ປະກອບມີ 2 ຮຸ່ນຄື: ຮຸ່ນອາວຸໂສ ແລະ ຮຸ່ນຊາວໜຸ່ມທົ່ວໄປ, ໂດຍເລີ່ມຈາກຈຸດຕະຫຼາດຊຸມຊົນ ຍ່າງຕາມເສັ້ນທາງເລກທີ 20 ເຂົ້າສູ່ບ້ານນາໄຊໄປຫາຫໍກວນບ້ານ ໄລຍະທາງ 3 ກິໂລແມັດ. ຈາກນັ້ນ ກໍໄດ້ມີກິດຈະກຳເຕັ້ນແອໂຣບິກ ຢູ່ເດີ່ນໂຮງຮຽນນາຍສິບນາໄຊ. ກິດຈະກຳ ທັງໝົດນັ້ນກໍເພື່ອເຮັດໃຫ້ງານດັ່ງກ່າວມີບັນຍາກາດຄຶກຄື້ນເບີກບານມ່ວນຊື່ນ.

(ຂ່າວ-ພາບ: ທິດລານີ ໂຄດໂຍທາ).