ໃນລະຫວ່າງວັນທີ 13-15 ມີນາ ຜ່ານມາ ທ່ານ ນາງ ພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ (ຜທ), ທ່ານ ຢານ ແດນເບ ຜູ້ຕາງໜ້າອົງການອາຫານໂລກ, ທ່ານ ນາງ ສີສົມບູນ ອຸນາວົງ ຫົວໜ້າກົມຮ່ວມມືສາກົນ ພ້ອມດ້ວຍຄະນະ ຢ້ຽມຍາມ ແລະ ຕິດຕາມການຈັດຕັ້ງປະຕິບັດກິດຈະກຳໂຄງການພາກສະໜາມ ແລະ ກອງປະຊຸມທົບທວນການຈັດຕັ້ງປະຕິ ບັດແຜນຍຸດທະສາດການຮ່ວມມື ລະຫວ່າງ ລັດຖະບານ ສປປ ລາວ ແລະ ອົງການອາຫານໂລກ ປະຈໍາປີ 2022 ແລະ ສ້າງແຜນບູລິມະສິດ ປະຈຳປີ 2023 ທີ່ແຂວງຜົ້ງສາລີ.

ໃນໂອກາດດັ່ງກ່າວ, ທ່ານ ນາງ ພອນວັນ ອຸທະວົງ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ແລະສະເໜີລາຍງານຈຸດປະສົງ ໃຫ້ ທ່ານ ຄຳຜອຍ ວັນນະສານ ຄະນະກຳມະການສູນກາງພັກ ເລຂາພັກແຂວງ ເຈົ້າແຂວງແຂວງຜົ້ງສາລີ ຮັບຊາບກ່ຽວກັບ ການມາເຄື່ອນໄຫວວຽກ ທີ່ແຂວງຜົ້ງສາລີ, ພ້ອມທັງໄດ້ມີການປືກສາຫາລື ແລະ ຂໍທິດຊີ້ນຳຈາກການນຳຂອງແຂວງຜົ້ງສາລີ. ຫຼັງຈາກນັ້ນ, ຄະນະດັ່ງກ່າວ ໂດຍຮ່ວມກັບ ພະແນກ ຜທ ແຂວງຜົ້ງສາລີ ແລະ ພາກສ່ວນທີ່ກ່ຽວຂ້ອງໄດ້ເດີນທາງໄປຢ້ຽມຢາມກິດຈະກຳໂຄງການອາຫານທ່ຽງໃນໂຮງຮຽນ, ພ້ອມທັງພົບປະກັບອໍານາດການປົກຄອງຂັ້ນບ້ານ, ຄູ-ອາຈານ ຜູ້ຮັບຜິດຊອບໂຄງການ ເພື່ອສົນທະນາແລກປ່ຽນການຈັດຕັ້ງປະຕິບັດກິດຈະກຳໂຄງການ, ເບິ່ງການປຸງແຕ່ງອາຫານ, ການກິນອາຫານຂອງເດັກນັກຮຽນ ແລະ ປູກຕົ້ນໄມ້ກິນໝາກ ໃນໂຮງຮຽນຂອງບ້ານຈີ່ໂຈະ.

ໃນວັນດຽວກັນ ຄະນະໄດ້ສືບຕໍ່ໄປຢ້ຽມຟາມກິດຈະກຳໂຄງການ ໂພຊະນາການ ແລະ ການສ້າງຊັບສິນເພື່ອຊຸມຊົນ, ພົບປະກັບອໍານາດການປົກຄອງຂັ້ນເມືອງ-ບ້ານ, ຜູ້ຮັບຜິດຊອບໂຄງການ ເພື່ອສົນ ທະນາແລກປ່ຽນການຈັດຕັ້ງປະຕິບັດກິດຈະກຳໂຄງການການສ້າງນ້ຳລິນ, ທະນາຄານເຂົ້າ ແລະ ຢ້ຽມຢາມຄົວເຮືອນທີ່ໄດ້ຮັບທຶນການປູກຝັງ ແລະ ລ້ຽງສັດ ທີ່ບ້ານຂຸນໜຸ່ມຫຼວງ ເມືອງຜົ້ງສາລີ ແຂວງຜົ້ງສາ ລີ, ນອກນັ້ນ ໄດ້ຈັດກອງປະຊຸມທົບທວນການຈັດຕັ້ງປະຕິບັດແຜນຍຸດທະສາດການຮ່ວມມື ລະຫວ່າງ ລັດຖະບານ ສປປ ລາວ ແລະ ອົງການອາຫານໂລກ ປະຈຳປີ 2022 ແລະ ສ້າງແຜນບຸລິມະສິດ ປະຈຳປີ 2023 ໃນຂັ້ນແຂວງ ແລະ 7 ເມືອງເປົ້າໝາຍໂຄງການ, ພ້ອມທັງຖອດຖອນບົດຮຽນໃນການຈັດຕັ້ງປະຕິບັດຕົວຈິງໃນຂັ້ນທ້ອງຖິ່ນ ຊຶ່ງໄດ້ຍົກໃຫ້ເຫັນ ຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍ, ຂໍ້ສະເໜີຕໍ່ຄູ່ຮ່ວມງານກໍຄືອົງການອາຫານໂລກ.

(ຂ່າວ-ພາບ: ກະຊວງ ຜທ)