ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ຜູ້ຊີ້ນຳວຽກງານຂົງເຂດການປົກຄອງ ແລະ ວັດທະນະທຳ-ສັງຄົມ ໄດ້ໃຫ້ກຽດໂອ້ລົມເນັ້ນຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານສາທາລະນະສຸກປະຈຳປີ 2022 ແລະ ທິດທາງແຜນການປີ 2023 ແລະ ຂະບວນການແຂ່ງຂັນຮັກຊາດ-ພັດທະນາຮອດປີ 2025 ພາຍໃຕ້ຫົວຂໍ້ “ສ້າງການຫັນປ່ຽນຢ່າງແຂງແຮງວຽກງານສາທາລະນະສຸກໃນເງື່ອນໄຂໃໝ່” ໃນວັນທີ 17 ມີນາ ຜ່ານມານີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ບຸນແຝງ ພູມມະໄລສິດ ກໍາມະການສູນກາງພັກ ລັດຖະມົນຕີກະຊວງສາທາລະນະສຸກ; ມີຮອງລັດຖະມົນຕີ, ຮອງຫົວໜ້າອົງການ, ຮອງເຈົ້າແຂວງ , ຮອງເຈົ້າຄອງນະຄອນຫຼວງວຽງຈັນ, ມີຜູ້ຕາງຈາກອົງການພັກ-ລັດ, ພະນັກງານອາວຸໂສບໍານານ, ອະດີດການນໍາກະຊວງສາທາລະນະສຸກ ພ້ອມດ້ວຍພະນັກງານແພດ-ໝໍເຂົ້າຮ່ວມ.

ໃນໂອກາດເຂົ້າຮ່ວມກອງປະຊຸມຄັ້ງນີ້, ທ່ານຮອງນາຍົກລັດຖະມົນຕີ ໄດ້ເນັ້ນໜັກບາງຕອນສຳຄັນເພື່ອສ້າງການຫັນປ່ຽນຢ່າງແຂງແຮງວຽກງານສາທາລະນະສຸກໃນເງື່ອນໄຂໃໝ່ ຊຶ່ງກ່ອນອື່ນທ່ານໄດ້ຕາງໜ້າໃຫ້ລັດຖະບານ ກໍຄືໃນນາມສ່ວນຕົວສະແດງຄວາມຍ້ອງຍໍ- ສັນລະເສີນຜົນງານທີ່ພະນັກງານຂະແໜງສາທາລະນະສຸກຍາດມາໃນໄລຍະຜ່ານມາຢ່າງສຸດໃຈ. ຄຽງຄູ່ກັບດ້ານດີຜົນງານກໍຍັງມີຈຸດອ່ອນຄົງຄ້າງຈຳນວນໜຶ່ງ ທີ່ຈະຕ້ອງໄດ້ພ້ອມກັນເອົາໃຈໃສ່ປັບປຸງໃຫ້ມີການຫັນປ່ຽນຢ່າງແຂງແຮງ ເລິກເຊີ່ງ ແລະ ຮອບດ້ານ ເພື່ອສຸມໃສ່ເຮັດໃຫ້ບັນດາແຜນງານ, ໂຄງການທີ່ຍັງບໍ່ສຳເລັດ ໃຫ້ສືບຕໍ່ປະຕິບັດໃຫ້ບັນລຸຕາມຈຸດປະສົງຄາດໝາຍທີ່ວາງໄວ້ ເປັນຕົ້ນ: (1) ພະນັກງານສະມາຊິກພັກ ໃນຂະແໜງສາທາລະນະສຸກຈຳນວນໜຶ່ງ ບໍ່ທັນກຳແໜ້ນເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດຢ່າງເລິກເຊີ່ງ ຍ້ອນການນຳພາດ້ານການເມືອງແນວຄິດບໍ່ທັນແທດເຖິງ, ເລິກເຊິ່ງ ແລະ ປົກກະຕິຕໍ່ເນື່ອງ; (2) ການນໍາພາ-ຊີ້ນໍາຂອງຄະນະພັກ-ຄະນະນໍາແຕ່ລະຂັ້ນບໍ່ແທດເຖິງ; (3) ກົນໄກການຊີ້ນຳ-ມອບວຽກບໍ່ທັນຈະແຈ້ງໂລງລ່ຽນລວມທັງການຕິດຕາມ ກວດກາການເຄື່ອນໄຫວວຽກງານຂອງຂັ້ນລຸ່ມບໍ່ທັນເປັນປົກກະຕິ ແທດເຖິງເທົ່າທີ່ຄວນ, (4) ການກໍ່ສ້າງ ແລະ ການພັດທະນາບຸກຄະລາກອນ ດ້ານສາທາະລະນະສຸກຈາກໂຮງຮຽນ, ຈາກສະຖາບັນການສຶກສາຈຳນວນໜຶ່ງບໍ່ທັນຮັບປະກັນຄຸນນະພາບ, (5) ການປັບປຸງ, ຈັດວາງຕຳແໜ່ງງານ ຍັງບໍ່ທັນເປັນລະບົບບາງອັນຕິດພັນກັບຜົນປະໂຫຍດ, (6) ການເຄື່ອນໄຫວວຽກງານຮັບໃຊ້ການບໍລິການຍັງບໍ່ມີປະສິດທິຜົນເທົ່າທີ່ຄວນ, ຈໍານວນໜຶ່ງຍັງເນັ້ນການເຮັດວຽກບໍລິຫານ, ຖືເບົາວິຊາສະເພາະ ແລະ ຈັນຍາບັນ-ຈັນຍາທຳແພດໝໍ, ບາງດ້ານເອື່ອຍອີງໃສ່ກັນ ແລະ ຫັວງຜົນປະ ໂຫຍດ, ຍັງເກີດຫາງສຽງຈົ່ມວ່າຂອງປະຊາຊົນຫຼາຍຢູ່ ແລະ ອື່ນໆ. ໃນປີ 2023 ເປັນປີທີ່ມີຄວາມໝາຍສຳຄັນເພາະເປັນປີກາງສະໄໝ; ປີສຸດທ້າຍຂອງການປະຕິບັດ 2 ວາລະແຫ່ງຊາດ. ສະນັ້ນ, ເພື່ອເປັນທິດທາງໃນການແກ້ໄຂຈຸດອ່ອນຄົງຄ້າງຢ່າງເດັດດ່ຽວ ແລະ ວາງແຜນການໃນແຕ່ລະໄລຍະໃຫ້ຖຶກຕ້ອງສອດຄ່ອງ. ດັ່ງນັ້ນ, ເພື່ອເປັນທິດໃນການນໍາໄປປັບປຸງວຽກງານໃນຕໍ່ໜ້າໃຫ້ມີການພັດທະນາ ຕ້ອງເອົາໃຈໃສ່ດັ່ງນີ້:

ເພີ່ມທະວີການນຳພາຕົວຈິງທີ່ເຂັ້ມແຂງ ຂອງພັກ, ຍົກສູງຄວາມສາມາດນຳພາ ແລະ ລັກສະນະນຳໜ້າຂອງຄະນະນະພັກ: ເອົາໃຈໃສ່ການກໍ່ສ້າງພັກທາງດ້ານການເມືອງ, ໂດຍນຳໃຊ້ຫຼາຍຮູບການ, ວິທີການທີ່ອຸດົມສົມບູນ ສອດຄ່ອງເໝາະສົມ ເພື່ອສຶກສາອົບຮົມໃຫ້ພະນັກງານ, ສະມາຊິກພັກໄດ້ຮັບຮູ້, ເຂົ້າໃຈ, ກຳແໜ້ນເຊື່ອມຊຶມແນວທາງ, ແຜນນະ ໂຍບາຍ, ມະຕິຄຳສັ່ງຂອງພັກ, ລະບຽບກົດໝາຍຂອງລັດໃນແຕ່ລະໄລຍະ; 2. ຕ້ອງໄດ້ເອົາໃຈໃສ່ໃນການປັບປຸງກົງຈັກໃຫ້ກະທັດຮັດ, ຖືກທິດ ເຮັດໃຫ້ການຈັດຕັ້ງປະຕິບັດວຽກງານລ່ອງຊ່ອງໄປລວງດຽວກັນ. ສ້າງກົນໄກການປະສານງານພາຍໃນ ແລະ ພາຍນອກຢູ່ສູນກາງ, ຢູ່ໂຮງໝໍ ແລະ ຢູ່ພາກສະໜາມ ລວມເຖິງບັນດາກົມກອງຊ່ວຍໜູນອ້ອມຂ້າງກະຊວງ ໃຫ້ມີຄວາມເປັນເອກະພາບສູງຫຼີກລ່ຽງຫາງສຽງບໍ່ດີ ທີ່ເປັນຜົນກະທົບຕໍ່ວຽກງານຂະແໜງການ ກໍຄືຜົນປະໂຫຍດລວມຂອງປະເທດຊາດ; 3. ເອົາໃຈໃສ່ຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກທີ່ວ່າ: ສືບຕໍ່ຢຶດໝັ້ນການປະຕິບັດນະໂຍບາຍສາທາລະນະສຸກທົ່ວປວງຊົນ ຕາມທິດຖືເອົາການອະນາໄມກັນພະຍາດ ແລະ ສົ່ງເສີມສຸຂະພາບ ເປັນຕົ້ນຕໍ; ຖືເອົາການບໍລິການປິ່ນປົວ ແລະ ສະໜອງການບໍລິການສຸຂະພາບຢ່າງທົ່ວເຖິງ, ມີຄຸນນະພາບ, ຍຸຕິທໍາ ໂດຍເລັ່ງໃສ່ຈັດຕັ້ງປະຕິບັດ 8 ແຜນງານ ແລະ 133 ໂຄງການ ຄວບຄູ່ກັບການຈັດຕັ້ງປະຕິບັດແຜນປະຕິຮູບສາທາລະນະສຸກໄລຍະ III (2021-2025). ເພື່ອເປັນທິດໃນການຈັດຕັ້ງປະຕິບັດແຜນພັດທະນາສາທາລະນະສຸກ 5 ປີຄັ້ງທີ IX (2021-2025) ໃນແຕ່ລະດ້ານທີ່ໄດ້ວາງອອກ; ພ້ອມນີ້ ທ່ານຮອງນາຍົກໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປຈັດຕັ້ງປະຕິບັດໃຫ້ເກີດດອກອອກຜົນຕາມຈຸດປະສົ່ງຄາດໝາຍທີ່ວາງໄວ້. ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນຳພາຂອງຄະນະພັກຂັ້ນສູນກາງ ແລະ ທ້ອງຖິ່ນ ຂະແໜງການສາທາລະນະສຸກ ພ້ອມກັນເສີມຂະຫຍາຍມູນເຊື້ອອັນດີງາມ ຕິດພັນກັບການຍົກສູງຄວາມຜິດຊອບການເມືອງ ແລະ ການປະກອບສ່ວນຂອງທຸກພາກສ່ວນພາຍໃນ ແລະ ຕ່າງປະເທດ, ພາກລັດ ແລະ ເອກະຊົນ ພວກເຮົານັກຮົບເສື້ອຂາວ ພ້້ອມເສຍສະຫຼະ ເພື່ອປະຊາຊົນ ແລະ ປະເທດຊາດ ຈະເຮັດສຳເລັດພາລະໜ້າທີ່ ທີ່ສຳຄັນຫຍຸ້ງຍາກ ແຕ່ມີກຽດສະຫງ່າທີ່ພັກ-ລັດ ມອບໝາຍໃຫ້.

ຂ່າວ-ພາບ: ຍຸພິນທອງ