ໃນວັນທີ 22ມີນາ ນີ້,ທ່ານ ທອງລຸນ ສີສຸລິດ ປະທານປະເທດ ພ້ອມຄະນະເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ໂດຍມີ ທ່ານ ວັນໄຊ ພອງສະຫວັນ ເລຂາພັກແຂວງເຈົ້າແຂວງຄຳມ່ວນ ພ້ອມພະນັກງານຫຼັກແຫຼ່ງໃຫ້ການຕ້ອນຮັບ ພ້ອມລາຍງານສະພາບການພັດທະນາເສດຖະກິດ-ສັງຄົມ ພາຍໃນແຂວງໃຫ້ທ່ານປະທານປະເທດໄດ້ຮັບຊາບ. ໂດຍລວມແຂວງຄຳມ່ວນ ຍັງຮັກສາໄດ້ຄວາມໜັກແໜ້ນທາງດ້ານເມືອງ,ມີຄວາມໝັ້ນຄົງ, ສັງຄົມມີຄວາມເປັນລະບຽບຮຽບຮ້ອຍ ປະຊາຊົນທຳມາຫາກິນ ແລະ ມີການພັດທະນາຂຶ້ນໄປເລື້ອຍໆ,ດ້ານວຽກ​ງານ​ພັດ​ທະ​ນາ​ຊົນ​ນະ​ບົດ​ລຶບ​ລ້າງ​ຄວາມ​ທຸກ​ຍາກທົ່ວ​ແຂວງ​ມີ 10 ເມືອງ, 570 ບ້ານ, ມີ 82.801 ຄອບ​ຄົວ, ມີ​ພົນ​ລະ​ເມືອງ 425.574 ຄົນຍິງ 216.721 ຄົນ, ມີ 5 ເມືອງພົ້ນ​ທຸກ ຄື: ເມືອງ​ທ່າ​ແຂກ, ເມືອງ​ມະ​ຫາ​ໄຊ, ເມືອງ​ໜອງ​ບົກ, ເມືອງ​ຫີນ​ບູນ ແລະ ເມືອງ​ຍົມ​ມະ​ລາດ. ບ້ານ​ພົ້ນ​ທຸກ​ມີ 366 ບ້ານ, ຄອບ​ຄົວ​ພົ້ນ​ທຸກ 59.707 ຄອບ​ຄົວ, ຄອບ​ຄົວ​ພັດ​ທະ​ນາ 48.488 ຄອບ​ຄົວ, ໄດ້ສຸມໃສ່ກໍ່ສ້າງ ແລະ ຂະຫຍາຍພື້ນຖານໂຄງລ່າງທາງດ້ານການສຶກສາເພີ່ມຂຶ້ນ ຕິດພັນກັບການປັບປຸງຄຸນນະພາບການສຶກສາ, ອັນພົ້ນເດັ່ນແມ່ນສໍາເລັດການກໍ່ສ້າງໂຮງຮຽນມັດທະຍົມວິຊາຊີບຕົວແບບ, ປະຕິບັດຄາດໝາຍການພັດທະນາແບບຍືນຍົງ.

ໂອກາດດັ່ງກ່າວ ທ່ານປະທານປະເທດໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ແຂວງຍາດໄດ້ ແລະໄດ້ເນັ້ນໃຫ້ການນຳແຂວງເອົາໃຈໃສ່ສືບຕໍ່ເພີ່ມທະວີໃນການພັດທະນາແຂວງໄປຄຽງຄູ່ກັບການຮັບປະກັນຢ່າງຮອບດ້ານໂດຍສະເພາຕ້ອງຮັບປະກັນວຽກງານປ້ອງກັນຊາດ-ປ້ອງກັນຄວາມ ຕິດພັນກັບສອງວາລະແຫ່ງຊາດໃຫ້ບັນລຸຕາມຄາດໝາຍທີ່ໄດ້ວາງໄວ້, ເປັນຕົ້ນການສະກັດ ແລະ ແກ້ໄຂບັນຫາຢາເສບ, ການແກ້ໄຂການຄ້າເຖື່ອນ ແລະ ປະກົດຫຍໍ້ຕ່າງໆພາຍໃນແຂວງໃຫ້ຫຼຸດນ້ອຍຖອຍລົງ, ເອົາໃຈໃສ່ສຶກສາອົບວຽກງານການເມືອງແນວຄິດໃຫ້ສະມາຊິກພັກພະນັກງານ ແລະ ປະຊາຊົນໃນທົ່ວສັງຄົມມີຄວາມອຸ່ນອ່ຽນທຸ່ນທ່ຽງ, ຢຶດໝັ້ນໃນອຸດົມການຂອງພັກເຮົາ ແລະ ຕັ້ງໜ້າປະກອບສ່ວນເຂົ້າໃການພັດທະນາແຂວງໃຫ້ມີບາດກ້າວໃໝ່, ພ້ອມນີ້ເອົາໃຈໃສ່ຂຸດຄົ້ນທ່າແຮງບົ່ມຊ້ອນຂອງແຂວງທີ່ມີເປັນຕົ້ນດ້ານກະສິກຳ-ອຸດສາຫະກຳບໍ່ແຮ່, ແລະ ການທ່ອງທ່ຽວ, ຫັນລົງກໍ່ສ້າງຮາກຖາກການເມືອງໃຫ້ເຂັ້ມແຂງ, ສ້າງເງື່ອນໄຂໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ, ຮູ້ວິທີທຳມາຫາກິນ, ຮູ້ຜະລິດເປັນສິນຄ້າ, ເພື່ອສ້າງລາຍຮັບໃຫ້ຕົນເອງ, ພ້ອມກັນນີ້ກໍເອົາໃຈໃສ່ດຶງດູດເອົາການລົງທຶນຈາກຕ່າງປະເທດເຂົ້າມາລົງທຶນໃຫ້ຫຼາຍຂຶ້ນ ແລະ ຄຸ້ມຄອງໃຫ້ຮັດກຸມເພື່ອເຮັດໃຫ້ບັນດາໂຄງການໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ, ໃຫ້ທິດຊີ້ນຳນີ້ທາງຄະນະໄດ້ໄປຢ້ຽມຢາມປະຊາຊົນບ້ານອີ່ຕູ່ ຊຶ່ງເປັນບ້ານທີ່ປະຊາຊົນເຮັດການຜລິດປູກເຂົ້າສອງລະດູເປັນສ່ວນຫຼາຍ ໃນປີ 2022 ປະຊາຊົນສາມາດປູກເຂົ້ານາປີໄດ້ 1.498 ເຮັກຕາ ແລະ ປູກເຂົ້ານາແຊງໄດ້ 1.393 ເຮັກຕາ, ລວມ1.152 ໂຕນ, ສາມາດຂາຍເປັນສິນຄ້າປະມານ 868 ໂຕນ, ຄິດເປັນມູນຄ່າປະມານ 5 ກວ່າລ້ານກີບ, ນອກນັ້ນປະຊາຊົນຍັງໄດ້ປູກພືດເປັນສິນຄ້າຕື່ມຊຶ່ງປະກອບມີຜັກ, ສາລີ ແລະ ອື່ນໆ ຕາມເງື່ອນໄຂ, ແລະ ໄປຢ້ຽມຢາມຜູ້ປະກອບການຟາມລ້ຽງປາ ຂອງບໍ​ລິ​ສັດ ສົມ​ພອນ​ໄຊ ລ້ຽງ​ປາ​ກະ​ຊັງ ຈຳ​ກັດໂດຍເລີ່ມແຕ່​ປີ 2015 ຟາມດັ່ງກ່າວໄດ້​ເລີ່ມ​ລ້ຽງ​ປາ​ກະ​ຊັງ​ຢູ່​ຕາມ​ສາຍ​ນ້ຳ​ຂອງ ເຂດ​ບ້ານ​ທ່າ​ແຂກ​ໃຕ້ ເມືອງ​ທ່າ​ແຂກ ແຂວງ​ຄຳ​ມ່ວນ, ​ລັກ​ສະ​ນະການ​ລ້ຽງແບບ​ຄອບ​ຄົວ, ເລີ່ມ​ຕົ້ນ​ໃນ​ການ​ລ້ຽງ​ມີ​ຈຳ​ນວນ 15 ກະ​ຊັງ ຕໍ່​ມາເຫັນ​ວ່າ​ກິດ​ຈະ​ການ​ດັ່ງ​ກ່າວ​ມີ​ແນວ​ທາງໃນການຂະຫຍາຍຕົວດີ​ ​ຈຶ່ງ​ໄດ້​ມີ​ການ​ຂະ​ຫຍາຍ​ກິດ​ຈະ​ການ ໂດຍ​ໄດ້ເພີ່ມ​ຈຳ​ນວນ​ກະ​ຊັງ​ຂຶ້ນ ເປັນ 30 ກະ​ຊັງ,ຜ່ານ​ການ​ລ້ຽງ​ຕົວ​ຈິງ​ມາ​ຮອດ​ໄລ​ຍະ​ໜຶ່ງ​ຄວາມ​ຮຽກ​ຮ້ອງ​ຕ້ອງ​ການ​ຂອງ​ຜູ້​ບໍ​ລິ​ໂພກ ​ພາຍ​ໃນ​ເພີ່ມ​ຂຶ້ນ​. ຫຼັງ​ຈາກນັ້ນ ໃນ​ປີ 2019-2020 ​ຈຶ່ງ​ໄດ້ຊອກຄູ່ຮ່ວມ​ລົງ​ທຶນ ເພື່ອ​ສ້າງ​ເງື່ອນ​ໄຂ​ໃນ​ການ​ ​ສືບ​ຕໍ່​ຂະ​ຫຍາຍ​ການລ້ຽງ​ປາ​ກະ​ຊັງ​ແບບ​ເປັນ​ຟາມ​​ໃຫ້ໃຫຍ່​ຂຶ້ນກວ່າ​ເກົ່າ. ປັດ​ຈຸ​ບັນໄດ້​ມີ​ກະ​ຊັງປາ​ທັງ​ໝົດ 160 ກະ​ຊັງ, ຄືລ້ຽງປານິນ ແລະ ປາດຸກ. ​ເວ​ລາຮອບ​ວຽນ​ໃນ​ການ​ລ້ຽງ​ແມ່ນ 5-6 ເດືອນ, ໄລ​ຍະເດືອນທຳ​ອິດ ປາ​ຈະມີ​ນໍ້າໜັກ ສະ​ເລ່ຍ 10 ​ໂຕ/ 1 ກິ​ໂລ ແລະ ໄລ​ຍະ​ສອງເດືອນສຸດທ້າຍ ປາ​ຈະ​ມີ​ນ້ຳ​ໜັກ​ປະ​ມານ 1 ​ໂຕ/ກິ​ໂລ, ລູກ​ປາ ລາ​ຄາ 1.000-1.200 ກີບ (ແລ້ວ​ແຕ່​ຂະ​ໜາດ​ນ້ອຍ​ໃຫຍ່), ໃຊ້​ຫົວ​ອາ​ຫານ​ສະເລ່ຍປະ​ມານ 200 ກະ​ສອບ/1 ກະຊັງ, ​ຜົນ​ຜະ​ລິດໄດ້​ສະ​ເລ່ຍ​ປະ​ມານ 1.800 ຫາ 2.000 ກິໂລ, ກະ​ຊັງ​ໜຶ່ງ ໃຊ້​ງົບ​ປະ​ມານໃນ​ການ​ສ້າງ​ສະ​ເລ່ຍ ປະ​ມານ 10 ລ້ານ​ກີບ/ກະ​ຊັງ, ມີ​ອາ​ຍຸ​ການ​ໃຊ້​ງານ ປະ​ມານ 5 ປີ ຕ້ອງ​ໄດ້​ຮັບ​ການ​ປັບ​ປຸງ​ສ້ອມ​ແປງ, ສຳ​ລັບ​ຮູບ​ແບບ​ການ​ຈຳ​ໜ່າຍແມ່ນ​ຈຳ​ໜ່າຍ​ພາຍ​ໃນ​ເທດ​ສະ​ບານ ແລະ ບັນ​ດາເມືອງພາຍ​ໃນ​ແຂວງ. 

ຂ່າວ: ຄຳມ່ວນ