ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 68 ປີ (22 ມີນາ 1955 - 22 ມີນາ 2023), ທ່ານ ອໍາຄາ ໄມສິມມາລາ ເລຂາພັກບ້ານ ນາຍບ້ານໜອງປີງ ເມືອງຈັນທະບູລີ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນກ່ຽວກັບວັນສ້າງຕັ້ງພັກ ວັນທີ 22 ມີນາ 1955 ວ່າ: ຕະຫຼອດໄລຍະ 68 ປີ ເປັນໄລຍະທີ່ເຕັມໄປດ້ວຍສິ່ງທ້າທາຍ ທົດສອບລະອິດລະອ້ຽວ, ຂ້ຽວຂາດທີ່ສຸດ, ພັກປະຊາຊົນ ປະຕິວັດລາວ ໄດ້ຮັບການປັບປຸງ ແລະ ຫຼໍ່ຫຼອມໃຫ້ເປັນພັກທີ່ມີທາດແທ້ ມູນເຊື້ອອັນສະຫງ່າລາສີ ເພື່ອສືບຕໍ່ພາລະກິດປະຕິວັດຂອງພັກພວກເຮົາຕ້ອງໄດ້ສືບຕໍ່ ເອົາໃຈໃສ່ດັ່ງນີ້: ຢຶດໝັ້ນ ແລະ ເສີມຂະຫຍາຍທິດສະດີມາກ - ເລນິນ, ແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກ ແລະ ແນວຄິດ ໄກສອນ ພົມວິຫານ ເພື່ອນໍາພາປະເທດຊາດກ້າວ ສູ່ຈຸດໝາຍສັງຄົມນິຍົມຢ່າງໜັກ ແໜ້ນ, ຕັ້ງໜ້າປັບປຸງພາຍໃນພັກໃຫ້ເປັນພັກທີ່ກຳອຳນາດທີ່ປອດໃສ, ເຂັ້ມແຂງ ແລະ ໜັກແໜ້ນ, ຄວາມເປັນແບບຢ່າງ ນຳໜ້າຂອງພະນັກງານ ແລະ ສະມາຊິກພັກ ແລະ ເພີ່ມທະວີຄວາມສາມັກຄີເປັນປຶກແຜ່ນໜັກແໜ້ນພາຍໃນຊາດ, ເຊີດຊູສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ, ເສີມຂະຫຍາຍ ນໍ້າໃຈຮັກຊາດ, ຮັກລະບອບໃໝ່, ເປັນເຈົ້າການໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງກ້າວຂຶ້ນຢ່າງບໍ່ຢຸດຢັ້ງ.

ທ່ານ ອໍາຄາ ໄມສິມມາລາ ຍັງໄດ້ກ່າວຕື່ມວ່າ: ຂ້າພະເຈົ້າກໍແມ່ນຜູ້ໜຶ່ງທີ່ເປັນສະມາຊິກພັກ ມີຄວາມຮູ້ສຶກພາກພູມໃຈເປັນຢ່າງຍິ່ງ ຊຶ່ງເປັນວັນມີຄວາມໝາຍ ຄວາມສໍາຄັນອັນເລິກເຊິ່ງ ຕໍ່ຜູ້ນໍາພັກ, ການນໍາພັກ, ສະມາຊິກພັກ ແລະ ປະຊາຊົນລາວບັນດາເຜົາ, ທີ່ໄດ້ເສຍຊີວິດເລືອດເນື້ອເພື່ອປະເທດຊາດ ແລະ ເພື່ອປະຊາຊົນ, ກ່ອນທີ່ ສປປ ລາວ ຈະໄດ້ຮັບການປົດປ່ອຍ, ສາມາດຍາດເອົາຊະນະທຸກໆກົນອຸບາຍຂອງສັດຕູ ແລະ ພັດທະນາປະເທດຊາດໃຫ້ມີຄວາມສະຫງົບສຸກ, ມີຄວາມຈະເລີນຮຸ່ງເຮື່ອງກໍຍ້ອນມີພັກຊີ້ນໍາ-ນໍາພາ, ມີຜູ້ນໍາພັກ, ມີຄະນະພັກ ແລະ ສະມາຊິກພັກທີ່ມີຄວາມສາມາດ, ມີຄວາມສະຫຼາດສ່ອງໃສ, ຈຶ່ງເຮັດໃຫ້ ພັກປະຊາຊົນ ປະຕິວັດລາວ ມີຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະ ຈະຂໍຢຶດໝັ້ນ, ເຊື່ອໝັ້ນ ແລະ ໄວ້ວາງໃຈຕໍ່ແນວທາງ ແລະ ອຸດົມການຂອງພັກ.