ຂ່າວຕ່າງປະເທດລາຍງານ ເມື່ອວັນທີ 23 ມີນາ ຜ່ານມາ, ແຟັງລັງ ຊຶ່ງກາຍເປັນປະເທດທີ່ມີຄວາມສຸກທີ່ສຸດໃນໂລກອັນດັບທີ 1 ຕິດຕໍ່ກັນ 6 ປີຢ່າງຕໍ່ເນື່ອງຈາກການຈັດອັນດັບຂອງອົງການສະຫະປະຊາຊາດ (UN) ໄດ້ເປີດເຜີຍໂຄງການຮອງຮັບຄົນຕ່າງປະເທດເຂົ້າມາທ່ອງທ່ຽວ ແລະ ຮຽນຮູ້ວິຖີຊີວິດແບບທ້ອງຖິ່ນ ໂດຍບໍ່ມີຄ່າໃຊ້ຈ່າຍ.

ປະເທດແຟັງລັງຄອງອັນດັບ 1 ໃນລາຍຊື່ປະເທດທີ່ມີຄວາມສຸກທີ່ສຸດໃນໂລກ ປີຫຼ້າສຸດຈາກການຈັດອັນດັບຂອງເຄືອຂ່າຍທາງອອກເພື່ອການພັດທະນາຢ່າງຍືນຍົງຮ່ວມກັບ UN ຊຶ່ງຖືວ່າເປັນປີທີ 6 ຕິດຕໍ່ກັນທີ່ປະເທດໄດ້ອັນດັບທີ 1 ຂອງລາຍການນີ້ຢ່າງຕໍ່ເນື່ອງ. ຍ້ອນເຫດນີ້, ທາງການແຟັງລັງຈຶ່ງເກີດແນວຄວາມຄິດລິເລີ່ມໂຄງການໃໝ່ ເພື່ອເປີດໂອກາດໃຫ້ຄົນຕ່າງປະເທດຈຳນວນ 10 ຄົນເຂົ້າມາພັກອາໄສໃນປະເທດ ແລະ ຮຽນຮູ້ວິຖີຊີວິດແບບຄົນແຟັງລັງທີ່ຖືວ່າເປັນພົນລະເມືອງທີ່ມີຄວາມສຸກທີ່ສຸດໃນໂລກ. ໂຄງການນີ້ມີຊື່ວ່າ Masterclass of Happiness ໂດຍໃຊ້ເວລາປະມານ 4 ວັນ ຊຶ່ງຄາດວ່າຈະເລີ່ມຕົ້ນໃນເດືອນມິຖຸນາທີ່ຈະເຖິງນີ້ໃນສະຖານທີ່ພັກຜ່ອນທີ່ມີຊື່ສຽງ ໃນ ກູຣູ ຣີສອດ ເຂດເລດດິສທຣິກຂອງແຟັງລັງ ຜູ້ທີ່ເຂົ້າຮ່ວມໂຄງການນີ້ຈະສາມາດທ່ອງທ່ຽວ ແລະ ເຂົ້າມາພັກຕາມສະຖານທີ່ໆຈັດໃຫ້ໂດຍບໍ່ຕ້ອງເສຍຄ່າໃຊ້ຈ່າຍ ແລະ ບໍ່ມີການຈຳກັດສິດທິການໃຊ້ງານບໍລິການພິເສດເຊັ່ນ: ຫ້ອງຊາວນ່າ ແລະ ສະປາແບບສ່ວນໂຕ.

ຜູ້ທີ່ເຂົ້າຮ່ວມໂຄງການຈະບໍ່ໄດ້ໄປທ່ອງທ່ຽວ ແລະ ພັກໃນທີ່ພັກຊັ້ນນຳ ແຕ່ຈະໄດ້ເຂົ້າຮ່ວມສຳມະນາກັບຜູ້ຊ່ຽວຊານຄົນແຟັງລັງ ຊຶ່ງຈະມາໃຫ້ຄວາມຮູ້ໃນຫົວຂໍ້ຕ່າງໆເຊັ່ນ: ອາຫານ, ການເບິ່ງແຍງສຸຂະພາບ, ຮັກສາຄວາມສົມດູນຂອງຮ່າງກາຍ ແລະ ການເຮັດວຽກສີມືແບບອີງຕາມວັດສະດຸທາງທຳມະຊາດ ໂດຍຜູ້ທີ່ເຂົ້າຮ່ວມຈະຕ້ອງອະນຸຍາດໃຫ້ມີການຖ່າຍຮູບ ແລະ ຖ່າຍຄິບວິດີໂອໃນລະຫວ່າງການເຂົ້າຮ່ວມໂຄງການເພື່ອນຳໄປໃຊ້ໃນງານໂຄສະນາການທ່ອງທ່ຽວແຟັງລັງ ໂດຍທາງການແຟັງລັງຈະເປີດຮັບສະໝັກຜູ້ເຂົ້າຮ່ວມໂຄງການນີ້ຈົນເຖິງວັນທີ 2 ເມສາ 2023 ແລະ ຍິນດີພິຈາລະນາຄິບຈາກແພດຟອມຕິກຕັອກ (Tik tok) ຫຼື ຣີນ (Reel) ທີ່ຜູ້ສະໝັກນຳສະເໜີຕົວເອງປະກອບໃນໃບສະໝັກ.