ກອງປະຊຸມສະຫຼຸບວຽກງານໂຄສະນາຂ່າວສານການສຶກສາ ແລະ ກິລາທົ່ວປະເທດ ປະ​ຈຳ​ປີ 2022 ໄດ້ຈັດຂຶ້ນໃນວັນທີ 24 ເມສາ ນີ້ ທີ່ສະຖບັນຄົ້ນຄວ້າວິທະຍາສາດການສຶກສາ (ແບບເຊິ່ງໜ້າ ແລະ ອອນລາຍ)ໂດຍກ່າວເປີດຂອງ ທ່ານ ນາງ ສີສຸກ ວົງວິຈິດ ຮອງລັດຖະມົນຕີ ​​ກະຊວງສຶກສາທິການ ​ແລະ ກິລາ, ມີບັນດາຫົວ​ໜ້າສະຖາບັນ, ກົມ, ສູນ, ຫົວໜ້າພະແນກສຶກສາທິການ ແລະ ກິລາ ນະຄອນຫຼວງ, ບັນດາແຂວງເຂົ້າຮ່ວມ.

ທ່ານ ນາງ ສີສຸກ ວົງວິຈິດ ໄດ້ກ່າວວ່າ: ກອງປະຊຸມຄັ້ງນີ້, ບັນດາທ່ານທີ່ຮັບຜິດຊອບວຽກໂຄສະນາຂ່າວສານໃນທົ່ວປະເທດຈະໄດ້ແລກປ່ຽນບົດຮຽນຊຶ່ງກັນ ແລະ ກັນ ໃນການປະຕິບັດ ແລະ ຕີລາຄາຄືນວຽກງານໂຄສະນາຂ່າວສານ ປີຜ່ານມາ, ​ກຳນົດແຜນການ, ວຽກຈຸດສຸມໃນປີ 2023 ແລະ ຍຸດທະສາດວຽກໂຄສະນາຂ່າວສານໃນຊຸມປີຕໍ່ໜ້າ ເພື່ອເຮັດໃຫ້ການໂຄສະນາຂ່າວສານ ກາຍເປັນກະບອກສຽງອັນແຫຼມຄົມ, ມີຄຸນນະພາບ, ວ່ອງໄວ, ທັນສະໄໝ ຕອບສະໜອງແນວທາງ ແລະ ນະໂຍບາຍຂອງພັກ-ລັດ ເວົ້າລວມ, ເວົ້າສະເພາະ ແມ່ນແນໃສ່ຮັບໃຊ້ແຜນຍຸດທະສາດ ພັດທະນາຮອບດ້ານ ຂອງກະຊວງສຶກສາທິການ ແລະ ກິລາ.

ໃນກອງ​ປະຊຸມຜູ້​ເຂົ້າ​ຮ່ວມຍັງໄດ້​ຮັບ​ຟັງ​ການສະ​ເໜີ​ບັນດາ​ເອກະສານ ​ແລະ ວຽກ​ງານ​ທີ່​ສຳຄັນ​ ເຊັ່ນ: ບົດ​ສະຫຼຸບການຈັດ​ຕັ້ງ​ປະຕິບັດວຽກງານໂຄສະນາຂ່າວສານການສຶກສາ ແລະ ກິລາ ປະຈຳປີ 2022 ແລະ ທິດທາງແຜນການ; ຮັບຟັງຄຳເຫັນ ແລະ ບົດຮຽນຕົວຈິງ ຂອງຜູ້ຮັບຜິດຊອບວຽກໂຄສະນາຂ່າວສານ ຈາກ 3 ແຂວງ ເຊັ່ນ: ຫົວພັນ, ສະຫວັນນະເຂດ ແລະ ແຂວງອັດຕະປື.

ທ່ານ ນາງ ສີສຸກ ວົງວິຈິດ ໄດ້ກ່າວຕື່ມອີກວ່າ: ເພື່ອໃຫ້ຮັບປະກັນວຽກໂຄສະນາຂ່າວສານ ໃຫ້ກາຍເປັນກະບອກສຽງ ໃຫ້ແກ່ຂົງເຂດສຶກສາ-ກິລາ ຢ່າງມີປະສິດທິພາບ ແລະ ປະສິດທິຜົນ; ອີງຕາມທ່າອ່ຽງດ້ານສື່ມວນຊົນຂອງໂລກ ທີ່ຫັນໄປສູ່ລະບົບໃໝ່ ທັນສະໄໝຢ່າງກ້າວກະໂດດ, ຫັນຈາກລະບົບໂທລະພາບ ແບບອານາລັອກ ໄປສູ່ລະບົບແບບດີຈີຕອນ. ສະນັ້ນ, ຜູ້ຮັບຜິດຊອບວຽກງານດ້ານໂຄສະນາຂ່າວສານ ຕ້ອງຍິ່ງເລັ່ງພັດທະນາທັກສະຄວາມຮູ້ ຄວາມສາມາດຂອງໂຕເອງ ເພື່ອໃຫ້ທັນກັບລະບົບ ແລະ ເຕັກໂນໂລຢີໃໝ່ໆ.

ນັກໂຄສະນາຂ່າວສານ ຫຼື ສື່ມວນຊົນ ສາຍສຶກສາ-ກິລາ ກໍໄດ້ປະກອບສ່ວນເຄື່ອນໄຫວ ຢ່າງຫ້າວຫັນເປັນຂະບວນຟົດຟື້ນ ເຮັດໃຫ້ມວນຊົນໃນທົ່ວປະເທດສາມາດຕິດຕາມ ແລະ ຮັບຮູ້ການເຄື່ອນໄຫວແຂ່ງຂັນ ໃນງານທີ່ເປັນປະຫວັດສາດຂອງຊາດໄດ້ຢ່າງທົ່ວເຖິງ; ການນຳເອົາຂໍ້ມູນຂ່າວສານທຸກໆເຫດການ ທີ່ຈະນໍາໄປເຜີຍແຜ່ໂຄສະນາອອກຕໍ່ມວນຊົນ, ຕໍ່ສັງຄົມໃຫ້ຮັບຮູ້ ແມ່ນສໍາຄັນທີ່ສຸດ. ສະນັ້ນ, ຕ້ອງເນັ້ນການກວດກາ, ກວດແກ້ຂໍ້ມູນໃຫ້ມີຄວາມຖືກຕ້ອງຊັດເຈນທີ່ສຸດ ແລະ ຄຳນຶງເຖິງຈັນຍາບັນ ໃນຖານະທີ່ເປັນສື່ມວນຊົນ (ນັກຂ່າວ) ທີ່ປັນກະບອກສຽງໃຫ້ແກ່ຂັ້ນເທິງ.

(ຂ່າວ: ບຸນອຸ້ມ, ພາບ: ບຸນຕອມ)