ຖ້ຳ​ນ້ຳ​ແອງ ຫຼື ຖ້ຳ​ເກົາ​ເລົາ ​ຕັ້ງ​ຢູ່​ເຂດ​ບ້ານ​ນ້ຳ​ແອງ ເທິງ​ເສັ້ນ​ທາ​ງ​ອະ​ນຸ​ພາ​ກ​ພື້ນ R3A ຊຶ່ງຫ່າງຈາກເທດສະບານເມືອງວຽງພູຄາ ແຂວງຫຼວງນໍ້າທາ ປະມານ 12 ກິໂລແມັດ. ສະຖານທີ່ນີ້ເປັນມໍລະດົກທາງທໍາມະຊາດ ຊຶ່ງສອດແຊກຄຸນຄ່າທາງດ້ານ​ວັດ​ທະ​ນະ​ທຳ​ຂຶ້ນ​ຊື່ຂອງແຂວງ​ຫຼວງນໍ້າທາ ​ຊຶ່ງໄດ້ເກີດມີມາ​ຫຼາຍ​ລ້ານ​ປີແລ້ວ. ຢູ່ໃນບໍລິເວນຖ້ຳດັ່ງກ່າວມີອຸໂມງຍາວ 2 ສາຍ, ສາຍທີ່​ໜຶ່ງເອີ້ນວ່າ ລອດ ​ຫຼື ຖ້ານໍ້າແອງ, ສ່ວນສາຍທີ່ສອງແມ່ນ ​ຖໍ້າເກົາເລົາ ຍາວຢຽດໄປຕາ​ມ​ສັນພູທີ່ມີປ່າໄມ້ດົກໜາຂຽວງາມ ແລະ ອຸດົມສົມບູນໄປດ້ວຍຊີວະນາໆພັນ. ທັງສອງຖ້ຳນີ້ເປັນຖໍ້າຫີນປູນ ມີຄວາມເລິກເຂົ້າໄປໃນ​ໜ່ວຍ​ພູ 3 ກິໂລແມັດກວ່າ, ຢູ່ດ້ານໃນຂອງຖ້ຳ ແມ່ນມີຫີນໂຟດຊິວ (Fossil) ທີ່ໄດ້ສ້າງສິລະປະ​ແຫ່ງຄວາມງາມຕາມທໍາມະຊາດຢູ່ຕາມ​ຜາຜະ​ໜັງຖ້ຳ ຊຶ່ງປະກອບມີຫີນຍ້ອຍ ​ແລະ ນົມຜາຫີນ ທີ່ມີລວດລາຍງົດງາມສະດຸດຕາ ແລະ ​ໜ້າປະທັບໃຈ​ຫຼາຍທີ່​ສຸດ. ປັດຈຸບັນຖໍ້ານໍ້າແອງ ຫຼື ຖ້ຳເ​ກົາເລົ່າ ໄດ້ຮັບການຄຸ້ມຄອງ ໂດຍປະຊາຊົນທ້ອງຖິ່ນບ້ານນ້ຳແອງ ຊຶ່ງເປັນຜູ້ໃຫ້ບໍລິການ ແລະ ອໍານວຍຄວາມສະດວກແ​ກ່​ນັກທ່ອງທ່ຽວ ໂດຍສະເພາະແມ່ນການນຳ​ທ່ຽວ ເພື່ອເຂົ້າຊົມຖ້ຳ​ດັ່ງກ່າວ. ນ້ຳແອງ ​ຫຼື ຖ້ຳເກົາເລົາເປີດໃຫ້ທ່ານເຂົ້າຊົມທຸກມື້ ເລີ່ມແຕ່ເວລາ 8:30-16:00 ໂມງ.

ຂໍ້ມູນຈາກ: ກົມໂຄສະນາການທ່ອງທ່ຽວ ກະຊວງ ຖວທ