ໜັງສືພິມ ປະຊາຊົນ

ພິທີສົມໂພດພະພຸດທະຮູບທີ່ວັດອາມາດຕະຍະຣາມ ເມືອງຈຳປາສັກ

ເຜີຍແຜ່ໂດຍ: ວິໄລສັກ ເວລາ: 03/05/2023 14:24:17 ຈຳນວນຢ້ຽມຊົມ 7720 ຄັ້ງ

ໃນລະຫວ່າງວັນທີ 1-3 ພຶດສະພາ ນີ້ ໄດ້ມີພິທີເປີດງານບຸນສົມໂພດພະພຸດທະຮູບ ຈຳນວນ 9 ອົງຂຶ້ນທີ່ວັດອາມາດຕະຍະຣາມ ບ້ານວັດອາມາດ ເມືອງຈຳປາສັກ ແຂວງຈຳປາສັກ ໂດຍການເປັນປະທານຝ່າຍສົງຂອງພະອາ ຈານໃຫຍ່ ທອງໃສ ພັນທະວົງ ທີ່ປຶກສາສູນກາງອົງການພຸດທະສາສະໜາສຳພັນລາວ (ອພສ), ມີພະອາຈານ ທອງປະເສີດ ພູມະວົງ ຄະນະປະຈຳສູນກາງ ອພສ ຮອງຫົວໜ້າກຳມະທິການສຶກສາ ຜູ້ອຳນວຍການວິທະຍາໄລສົງອົງຕື້. ມີພະອາຈານໃຫຍ່ມະຫາ ສຸວັນ ຈັນທະລາດ ປະທານ ອພສ ແຂວງຈໍາປາສັກ ພ້ອມດ້ວຍຄະນະ ອພສ ຈາກສູນກາງ, ຄະນະ ອພສ ແຂວງ, ພະເຖລານຸເຖລະ. ປະທານຝ່າຍຄາລະວາດໃຫ້ກຽດເຂົ້າຮ່ວມໂດຍທ່ານນາງ ນາລີ ສີສຸລິດ ພັນລະຍາປະທານປະເທດ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ພາຍໃນງານມີການຮັບອະນຸໂມທະນາ, ມີກອງອັດຖະ 14 ກອງ, ພະພຸດທະຮູບ 9 ອົງ, ດໍາເນີນພິທີທາງສາສະໜາໄຫວ້ພະ, ຮັບສິນ, ສູດມຸງຄຸນ ແລະ ຟັງທໍາມະເທສະໜາ. ຕອນທ້າຍໄດ້ມີການຖວາຍປັດໄຈແກ່ພະສົງ ຜູ້ເປັນອົງປະມຸກປະທານຕື່ມອີກ. ມາຮອດເວລາ 21:00 ໂມງໄດ້ເຂົ້າສູ່ພິທີສົມໂພດພະຕະຫຼອດແຈ້ງ. ຕອນເຊົ້າໃນວັນທີ 3 ພຶດສະພາ ມີພິທີທໍາບຸນໃສ່ບາດ, ຖວາຍສັງຄະທານແດ່ພະສົງ, ຟັງທໍາມະເທສະໜາ, ຮັບພອນ, ຢາດນ້ໍາ. ຈຸດປະສົງ ເພື່ອບໍາເພັນບາລະມີ ສ້າງມະຫາກຸສົນ ແລະ ສົມໂພດພະພຸດທະຮູບ ເພື່ອສັກກາລະບູຊາຖືເປັນຄັ້ງປະຫວັດສາດຂອງພະພຸດທະສາສະໜາ.

ຂ່າວ-ພາບ: ໄຊຍະສິດ ສີຫາວົງ

ຂ່າວທີ່ໄດ້ຮັບຄວາມນິຍົມ