ທ່ານ ນາງ ລັດສະໄໝ ຄຳພິລາວົງ ຫົວໜ້າຫ້ອງການກະສິກໍາ ແລະ ປ່າໄມ້ ເມືອງສາມັກຄີໄຊ ແຂວງອັດຕະປື ເປີດເຜີຍຕໍ່ສື່ມວນຊົນທ້ອງຖິ່ນເມື່ອວັນທີ 2 ພຶດສະພາ ຜ່ານມາໃຫ້ຮູ້ວ່າ: ປັດຈຸບັນຊາວກະສິກອນທົ່ວເມືອງສາມັກຄີໄຊ ກໍາລັງຂຸ່ນຂ້ຽວເກັບກ່ຽວມ້ຽນມັດເຂົ້ານາແຊງ ຂອງຕົນດ້ວຍຄວາມຮັບຜິດຊອບສູງ ເພື່ອໃຫ້ທ່ວງທັນກັບລະດູການ ຊຶ່ງການຜະລິດເຂົ້ານາແຊງຢູ່ເມືອງສາມັກຄີໄຊ ປີນີ້ ມີຢູ່ 2 ເຂດການຜະລິດຄື: ເຂດໂຄງການນາພອກ ແລະ ເຂດໂຄງການນາແກ້ງຂາມ, ໃນນີ້ ໂຄງການນາພອກມີເນື້ອທີ່ຕົວຈິງ 69 ກວ່າເຮັກຕາ ມີ 100 ຄອບຄົວທີ່ທໍາການຜະລິດ, ສຳເລັດການເກັບກ່ຽວໄປແລ້ວ 50% ຂອງເນື້ອທີ່ທັງໝົດ, ສະມັດຖະພາບສະເລ່ຍໄດ້ 3 ໂຕນກວ່າຕໍ່ເຮັກຕາ, ສ່ວນໂຄງການນາແກ້ງຂາມ ມີເນື້ອທີ່ຕົວຈິງ 53 ກວ່າເຮັກຕາ ມີ 80 ຄອບຄົວທີ່ທໍາການຜະລິດ, ໄດ້ສໍາເລັດການເກັບກ່ຽວໄປແລ້ວ 40% ຂອງເນື້ອທີ່ທັງໝົດ, ສະມັດຖະພາບສະເລ່ຍໄດ້ 3 ກວ່າໂຕນຕໍ່ເຮັກຕາ, ການຜະລິດເຂົ້ານາແຊງປີນີ້ຢູ່ເມືອງສາມັກຄີໄຊ ຍັງພົບຄວາມຫຍຸ້ງຍາກຫຼາຍຢ່າງ ເປັນຕົ້ນເນື້ອທີ່ມີຈໍານວນໜ້ອຍ ບໍ່ໄດ້ຕາມແຜນການ, ຄວາມຕື່ນຕົວຂອງປະຊາຊົນຕໍ່ການທໍາການຜະລິດ ບໍ່ສູງ, ອີກສ່ວນໜຶ່ງກໍຍ້ອນບັນດາປັດໄຈການຜະລິດ ມີລາຄາທີ່ສູງຂຶ້ນ ໂດຍສະເພາະປຸ໋ຍ ແລະ ປັດໄຈອື່ນໆ.

ທ່ານ ນາງ ລັດສະໄໜ ຄໍາພິລາວົງ ຍັງໄດ້ຮຽກຮ້ອງມາຍັງປະຊາຊົນ ທົ່ວເມືອງສາມັກຄີໄຊ ໃນລະດູຝົນທີ່ຈະມາເຖິງໜ້ານີ້ ໃຫ້ເປັນເຈົ້າການ ສຸມໃສ່ການທຳການຜະລິດ ປູກຝັງ-ລ້ຽງສັດ ໃຫ້ໄດ້ຫຼາຍກາຍເປັນສິນຄ້າ ແລະ ສ້າງລາຍຮັບເຂົ້າຄອບຄົວ.

ຂ່າວ-ພາບ: ວັດທະນາ