ພະແນກສຶກສາທິການ ແລະ ກິລາ ແຂວງສະຫວັນນະເຂດ ໄດ້ຈັດພິທີມອບລາງວັນ ແລະ ຍ້ອງຍໍນັກຮຽນເກັ່ງທີ່ເປັນຕົວແທນຂອງແຂວງເຂົ້າຮ່ວມສອບເສັງນັກຮຽນເກັ່ງລະດັບຊາດ ປະຈໍາສົກຮຽນ 2022-2023 ເມື່ອບໍ່ດົນມານີ້ ທີ່ຫ້ອງປະຊຸມຂອງພະແນກດັ່ງກ່າວ, ໂດຍການເປັນປະທານຂອງ ທ່ານ ພິມມະສອນ ວໍລະຍຸດ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຄະນະພະແນກສຶກສາທິການ ແລະ ກິລາແຂວງ, ຄະນະຫ້ອງການສຶກສາທິການ ແລະ ກິລາ 2 ເມືອງ 1 ນະຄອນໄກສອນ ພົມວິຫານ, ຄູ-ອາຈານ, ຜູ້ປົກຄອງ ແລະ ນັກຮຽນເຂົ້າຮ່ວມ.

ໃນພິທີ, ທ່ານ ອາໂນລາດ ພິມໂວຫານ ຫົວໜ້າຂະແໜງສາມັນສຶກສາ ພະແນກສຶກສາທິການ ແລະ ກິລາແຂວງ ໄດ້ຜ່ານບົດສະຫຼຸບການສອບເສັງລະດັບຊາດໂດຍສັງເຂບ ຊຶ່ງການສອບເສັງແມ່ນໄດ້ຈັດຂຶ້ນໃນລະຫວ່າງວັນທີ 4-7 ເມສາ 2023 ທີ່ມະຫາວິທະຍາໄລແຫ່ງຊາດ ນະຄອນຫຼວງວຽງຈັນໂດຍມີ 3 ກິດຈະກໍາຫຼັກ ຄື: ສອບເສັງນັກຮຽນເກັ່ງ, ທັດສະນະສຶກສາ ແລະ ຖາມ-ຕອບ ວິທະຍາສາດ, ພາຍໃຕ້ການເປັນປະທານຂອງ ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ມີຕົວແທນນັກຮຽນຈາກ 17 ແຂວງ ແລະ 1 ນະຄອນຫຼວງວຽງຈັນ ເຂົ້າຮ່ວມທັງໝົດ 144 ຄົນ, 68 ຄົນ.

ຜ່ານການສອບເສັງໃນຊັ້ນມັດທະຍົມສຶກສາຕອນຕົ້ນ (ມ.4) ນັກຮຽນເກັ່ງຂອງແຂວງສະຫວັນນະເຂດ ນາງ ດາລິນສຸກ ແກ້ວວິໄລສັກ ຈາກໂຮງຮຽນ ມ.ຕ ມ່ວງໄຂ່ ສາມາດຍາດໄດ້ອັນດັບທີ 17 ວິຊາພາສາລາວ-ວັນນະຄະດີ, ທ້າວ ເລທັນບິນ ຈາກໂຮງຮຽນ ມ.ສ ລາວ-ຫວຽດ ໄດ້ລາງວັນຊົມເຊີຍ ວິຊາຄະນິດສາດ, ນາງ ພອນສະໄໝ ສຸຄຳທັດ ຈາກໂຮງຮຽນ ມ.ສ ລາວ-ຫວຽດ ຍາດໄດ້ອັນດັບທີ 5 ວິຊາຟີຊິກສາດ ແລະ ນາງ ບົວສະຫວັນ ແພງຂຸນໄຕ ຈາກໂຮງຮຽນ ມ.ສ ໂພນເດື່ອ ຍາດໄດ້ອັນດັບທີ 3 ວິຊາເຄມີສາດ.

ສ່ວນ ມ.7 ວິຊາພາສາລາວ-ວັນນະຄະດີ ທ້າວ ຈັນທະສອນ ສິນທະວົງສາ ຈາກໂຮງຮຽນ ມ.ສ ສະຫວັນ ຍາດໄດ້ອັນດັບທີ 16, ວິຊາເຄມີສາດ ນາງ ແພໄໝ ແກ້ວຫານາມ ຈາກໂຮງຮຽນໂພນສະຫວັນ ຍາດໄດ້ອັນດັບທີ 13, ວິຊາຄະນິດສາດ ທ້າວ ໄຊວິສິດ ທິບພະເກສອນ ຈາກໂຮງຮຽນ ມ.ສ ລາວ-ຫວຽດ ຍາດໄດ້ອັນດັບທີ 14, ວິຊາຟີຊິກສາດ ນາງ ກັນສຸດາ ນາມມູນຕີ ຈາກໂຮງຮຽນ ມ.ສ ລາວ-ຫວຽດ ຍາດໄດ້ອັນດັບທີ 9.

ໂອກາດດຽວກັນນີ້, ທ່ານ ຄຳຫຼາຍ ສຸວັນນາລີ ວິຊາການຂະແໜງຈັດຕັ້ງ-ພະນັກງານ ພະແນກສຶກສາທິການ ແລະ ກິລາແຂວງ ໄດ້ຜ່ານມຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍການຍ້ອງຍໍໃຫ້ກົມກອງ ແລະ ບຸກຄົນດີເດັ່ນ, ຂໍ້ຕົກລົງຂອງທ່ານຫົວໜ້າພະແນກສຶກສາທິການ ແລະ ກິລາ ແຂວງສະຫວັນນະເຂດ ຕໍ່ຜູ້ມີຜົນງານ, ຄູ-ອາຈານ ແລະ ນັກຮຽນ ແລະ ມອບໃບຍ້ອງຍໍ.

ຕອນທ້າຍ, ທ່ານ ພິມມະສອນ ວໍລະຍຸດ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ການຫ້າງຫາກະກຽມຂອງຄະນະຮັບຜິດຊອບທຸກພາກສ່ວນ ຕະຫຼອດຮອດນັກຮຽນມັດທະຍົມສຶກສາທົ່ວແຂວງ ທີ່ມີຄວາມເອົາໃຈໃສ່ດ້ວຍຄວາມຮັບຜິດຊອບສູງ. ພ້ອມກັນນັ້ນ, ທ່ານຍັງໄດ້ຮຽກຮ້ອງໃຫ້ຄູ-ອາຈານ, ນັກຮຽນທຸກຄົນ ຈົ່ງພ້ອມກັນຕັ້ງໜ້າເອົາໃຈໃສ່ສືບຕໍ່ຄົ້ນຄວ້າບົດຮຽນ ເພື່ອກຽມພ້ອມເຂົ້າສອບເສັງນັກຮຽນເກັ່ງໃນຄັ້ງຕໍ່ໄປ.

ຂ່າວ-ພາບ: ຄຳແພງເພັດ ຂັນຕິວົງ