ເມື່ອ​ບໍ່​ດົນ​ມາ​ນີ້, ທ່ານນາງ ປານີ ຢາທໍ່ຕູ້ ຮອງປະທານປະເທດ ພ້ອມຄະນະ ໄດ້ເຄື່ອນໄຫວ ຢ້ຽມຢາມພົບປະປະຊາຊົນ ເຂດບ້ານຫຽງ ເມືອງສຸຂຸມາ ແຂວງຈໍາປາສັກ, ໂດຍມີ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ມີເຈົ້າເມືອງສຸຂຸມາ ພ້ອມຄະນະນຳຂອງເມືອງ, ອົງການປົກຄອງບ້ານ ແລະ ປະຊາຊົນເຂດດັ່ງກ່າວ ໃຫ້ການຕ້ອນຮັບ.

ທ່ານ ຄຸດທະວົງ ວົງຄໍາຈັນ ເລຂາພັກບ້ານ ນາຍບ້ານຫຽງ ໄດ້ລາຍງານສະພາບລວມ ຂອງບ້ານວ່າ: ບ້ານໃຫຍ່ບ້ານຫຽງ ແມ່ນບ້ານຈຸດສຸມຂອງແຂວງ, ຈຸດສຸມຂອງເມືອງ ມີພົນລະເມືອງ 3.295 ຄົນ, ມີ 489 ຫຼັງຄາເຮືອນ, ມີ 479 ຄອບຄົວ, ໄດ້ປະກາດເປັນບ້ານພັດທະນາໃນປີ 2009 ແລະ ປະກາດເປັນບ້ານໃຫຍ່ ຄ້າຍຄືຕົວເມືອງນ້ອຍໃນຊົນນະບົດໃນປີ 2015.

ຄະນະພັກ-ອຳນາດການປົກຄອງບ້ານ ໄດ້ຖືສຳຄັນວຽກງານສຶກສາອົບຮົມການເມືອງ-ແນວຄິດເປັນກົກ ໂດຍສຸມໃສ່ການນຳເອົາບັນດາແນວທາງນະໂຍບາຍ, ມະຕິ, ຄຳສັ່ງ, ເອກະສານ ແລະ ນິຕິກຳຕ່າງໆຂອງຄະນະພັກຂັ້ນເທິງ, ມາຈັດຕັ້ງເຜີຍແຜ່ ໃຫ້ປະຊາຊົນພາຍໃນບ້ານເປັນປົກກະຕິ, ໄດ້ເອົາໃຈໃສ່ໃນການປຸກລະດົມຊຸກຍູ້ ປະຊາຊົນພາຍໃນບ້ານ ທຳການຜະລິດ, ທຳມາຫາກິນ ເພື່ອປະກອບສ່ວນໃຫ້ແກ່ການພັດທະນາ ເປັນຂະບວນການໜຶ່ງໃນຂໍ້ແຂ່ງຂັນຮັກຊາດພັດທະນາ, ເລັງໃສ່ການຜະລິດເປັນສິນຄ້າ ຊຶ່ງມີເນື້ອທີ່ການຜະລິດ 1.700 ກວ່າເຮັກຕາ, ໃນນັ້ນ ເນື້ອທີ່ນາປີ 1.458 ກວ່າເຮັກຕາ, ຜົນຜະລິດ 3.665 ໂຕນ ສະເລ່ຍ 2,5 ໂຕນ/ເຮັກຕາ; ອັນພົ້ນເດັ່ນ ບ້ານມີຄອບຄົວຕົວແບບດ້ານການຜະລິດກະສິກຳ 10 ຄອບຄົວ, ລາຍຮັບສະເລ່ຍ 7,2 ລ້ານກີບຕໍ່​ຄົນ​ຕໍ່​ປີ, ມີຄອບຄົວເຫຼືອກັນ 72 ຄອບຄົວ, ຄອບຄົວກຸ້ມກິນ 417 ຄອບຄົວ; ຄອບຄົວທຸກຍາກ 29 ຄອບຄົວ ແລະ ບ້ານມີຈຳນວນຫົວໜ່ວຍທຸລະກິດທັງໝົດ 47 ຫົວໜ່ວຍ.

ສຳລັບວຽກງານການກໍ່ສ້າງພື້ນຖານໂຄງລ່າງຂອງບ້ານ ມີລະບົບໂທລະໂຄ່ງຂັ້ນບ້ານ, ຕະຫຼາດ, ໂຮງຮຽນປະຖົມ-ມັດທະຍົມສົມບູນ, ໂຮງໝໍນ້ອຍ, ເສັ້ນທາງຜັງບ້ານ, ທາງເຊື່ອມຕໍ່ລະຫວ່າງບ້ານຕໍ່ບ້ານສາມາດທຽວໄດ້ 2 ລະດູ; ວຽກງານການສຶກສາໄດ້ເອົາໃຈໃສ່ ແລະ ຖືສຳຄັນ ໃນການພັດທະນາຊັບພະຍາກອນມະນຸດ ຕາມ 3 ລັກສະນະ 5 ຫຼັກມູນຂອງການສຶກສາ ທີ່ທາງກະຊວງສຶກສາ ແລະ ກິ​ລາ ວາງອອກ ເອົາໃຈໃສ່ປຸກລະດົມທົ່ວສັງຄົມ ປະ​ກອບ​ສ່ວນເຂົ້າໃນການພັດທະນາພຶ້ນຖານໂຄງລ່າງ​ດ້ານການສຶກສາ ແລະ ລະດົມນັກຮຽນພາຍໃນບ້ານໄດ້ເຂົ້າໂຮງຮຽນ ຢ່າງທົ່ວເຖິງ.

ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດ ການຈັດຕັ້ງ ແລະ ການນໍາພາ ສ້າງບ້ານຫຽງ ເປັນບ້ານພັດທະນາ ປະຊາຊົນ ຢູ່ດີກິນດີ ມີແບບແຜນການດຳລົງຊິວິດທີ່ໝັ້ນຄົງ ແລະ ຂໍໃຫ້ສືບຕໍ່ນໍາໃຊ້ທ່າແຮງ ເນື້ອທີ່ດິນທີ່ມີ ເພື່ອຂະຫຍາຍການຜະລິດ ໃຫ້ກຸ້ມຢູ່ກຸ້ມກິນ ແລະ ກາຍເປັນສິນຄ້າ, ສືບຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ຖືເປັນວຽກງານ​ບຸລິມະສິດທີ່ສໍາຄັນ ເພື່ອຮັບປະກັນການດໍາລົງຊີວິດຂອງປະຊາຊົນ, ເພື່ອເຮັດໃຫ້ເປັນເຂດຊາຍແດນມິດຕະພາບ ເພື່ອອຳນວຍຄວາມສະດວກໃຫ້ແກ່ການພົວພັນລະຫວ່າງປະເທດ, ການແລກປ່ຽນຊື້-ຂາຍ ສິນຄ້າ, ການນໍາເຂົ້າ-ສົ່ງອອກສິນຄ້າ, ນອກຈາກນີ້ ຍັງເນັ້ນໜັກໃຫ້ເອົາໃຈໃສ່ໃຫ້ເດັກນ້ອຍໄດ້ຮັບການສຶກສາໃນແຕ່ລະຂັ້ນ ແລະ ການເຂົ້າເຖິງ​ການ​ບໍ​ລິ​ການສຸກຂາພິບານຂອງປະຊາຊົນ ໂດຍສະເພາະແມ່ນ ເດັກນ້ອຍ ແລະ ອື່ນໆ. ຈາກນັ້ນ, ທ່ານຮອງປະທານປະເທດ ພ້ອມຄະນະ ໄດ້ຢ້ຽມຢາມເບິ່ງ ດ່ານປະເພນີ ຊ່ອງຕາອູ ເມືອງສຸຂຸມາ ຕື່ມອີກ.

ຂ່າວ-ພາບ: ນາງ ພູທິບສະຫວັນ ແກ່ນບຸດຕາ