ຂໍ້​ມູນ​ຈາກ ຂະແໜງປູກຝັງ ພະແນກກະສິກໍາ ແລະ ປ່າໄມ້ປະຈໍາແຂວງຄໍາມ່ວນໃຫ້ຮູ້ວ່າ: ໃນລະດູການຜະລິດເຂົ້ານາແຊງສົກປີ 2022-2023 ນີ້ທົ່ວແຂວງມີເນື້ອທີ່ແຜນການທັງໝົດ 12.341 ເຮັກຕາ, ຄາດຄະເນຜົນຜະລິດ 67.535 ໂຕນ, ໃນນີ້ແຜນການປູກເຂົ້າເພື່ອເປັນສະບຽງອາຫານ 4.293 ເຮັກຕາ, ຄາດຄະເນຜົນຜະລິດ 23.182 ໂຕນ, ແຜນການປູກເຂົ້າເພື່ອເປັນສິນຄ້າ 8.048 ເຮັກຕາ, ຄາດຄະເນຜົນຜະລິດ 44.353 ໂຕນ.

ຜ່ານການຈັດຕັ້ງປະຕິບັດຕົວຈິງໄດ້ 11.268 ເຮັກຕາ ທຽບໃສ່ແຜນການປີທີ່ວາງໄວ້ເທົ່າກັບ 91%, ໃນນັ້ນນາຫວ່ານ 4.275 ເຮັກຕາ, ນາປັກດໍາ 6.993 ເຮັກຕາ, ​ເນື້ອທີ່ປູກເຂົ້າເພື່ອເປັນສະບຽງອາຫານປະຕິບັດໄດ້ 3.945 ເຮັກຕາ ທຽບໃສ່ແຜນການປີປະຕິບັດໄດ້ເທົ່າກັບ 92%, ເນື້ອທີ່ປູກເຂົ້າເພື່ອເປັນສິນຄ້າປະຕິບັດໄດ້ 7.323 ເຮັກຕາ ທຽບໃສ່ແຜນການປີປະຕິບັດໄດ້ເທົ່າກັບ 109% (ລື່ນແຜນ 9%) .

ດ້ານການເກັບກ່ຽວເຂົ້າຂອງປະຊາຊົນແມ່ນເຮັດເປັນສອງລະບົບຄື: ເກັບກ່ຽວໂດຍໃຊ້ແຮງງານຄົນ ແລະ ເກັບກ່ຽວໂດຍໃຊ້ກົນຈັກທັນສະໄໝ, ມາຮອດປັດຈຸບັນທົ່ວແຂວງສາມາດເກັບກ່ຽວເຂົ້າໄດ້ແລ້ວໃນເນື້ອທີ່ 7.241 ເຮັກຕາ ເທົ່າກັບ 64,27% ຂອງເນື້ອທີ່ຕົວຈິງ. ໃນນີ້ເນື້ອທີ່ປູກເຂົ້າເພື່ອເປັນສະບຽງອາຫານປະຕິບັດໄດ້ 2.542 ເຮັກຕາ ເທົ່າກັບ 64,44% ຂອງເນື້ອທີ່ຕົວຈິງ, ເນື້ອທີ່ປູກເຂົ້າເພື່ອເປັນສິນຄ້າປະຕິບັດໄດ້ 4.699 ເຮັກຕາ ເທົ່າກັບ 64,17% ຂອງເນື້ອທີ່ຕົວຈິງ.

ສ່ວນສາເຫດທີ່ເຮັດໃຫ້ເນື້ອທີ່ທໍາການຜະລິດເຂົ້ານາແຊງໃນປີນີ້ບໍ່ໄດ້ຕາມແຜນການຍ້ອນວ່າຊາວກະສິກອນຈໍານວນໜຶ່ງ ໄດ້ຫັນໄປປູກພືດຊະນິດອື່ນທົດແທນເຊັ່ນ: ຫັນໄປປູກມັນຕົ້ນ ແລະ ເກັບກູ້ຜົນຜະລິດມັນຕົ້ນ, ບໍລິສັດນໍ້າເທີນ 2 ໄດ້ຢຸດການປ່ອຍນໍ້າຊົ່ວຄາວໃນໄລຍະການສ້ອມແປງຄອງລະບາຍນໍ້າໂດຍນໍາໃຊ້ນໍ້າຈາກປະຕູປ່ອງທີ 3 ເຂື່ອນໄຟຟ້ານໍ້າເທີນ 2 ຊຶ່ງຢູ່ໃນໄລຍະທໍາການຜະລິດຂອງປະຊາຊົນເມືອງຍົມມະລາດເຮັດໃຫ້ການສະໜອງນໍ້າເຂົ້າສູ່ພື້ນທີ່ການຜະລິດບໍ່ພຽງພໍກັບຄວາມຕ້ອງການ ແລະ ບໍລິສັດ ເທີນຫີນບູນໄດ້ຢຸດຕິການສະໜອງນໍ້າມັນໃຫ້ຊາວນາໃນເຂດໂຄງການຊົນລະປະທານຂອງເມືອງຄູນຄໍາເພື່ອຮັບໃຊ້ທໍາການຜະລິດ.

ຂ່າວ-ພາບ : ແດງສະຫວັດ ແສນພານິດ