ທ່ານ ພິທູນ ມະວົງສາ ຮອງເຈົ້າເມືອງສາມັກຄີໄຊ ແຂວງອັດຕະປື ໄດ້ລາຍງານໃຫ້ຮູ້ເມື່ອບໍ່ດົນມານີ້ວ່າ: ການຈັດຕັ້ງປະຕິບັດແຜນງົບປະມານ 3 ເດືອນຕົ້ນປີ 2023 ເມືອງສາມັກຄີໄຊ ກໍຄືຫ້ອງການການເງິນເມືອງໄດ້ຮັບຜົນສໍາເລັດຫຼາຍດ້ານ ໂດຍສະເພາະການຂຸດຄົ້ນລາຍຮັບເຂົ້າງົບປະມານ ສາມາດຕອບສະໜອງລາຍຈ່າຍໃຫ້ແກ່ການເຄື່ອນໄຫວຂອງກົງຈັກພັກ-ລັດ, ເປັນຕົ້ນລາຍຈ່າຍເງິນເດືອນ, ເງິນນະໂຍບາຍ, ເງິນບໍລິຫານ, ເງິນດັດສົມ-ສົ່ງເສີມໄດ້ໂດຍພື້ນຖານ. ໃນນີ້ດ້ານລາຍຮັບແຜນງົບປະມານ ປະຕິບັດລາຍຮັບໄດ້ 4 ຕື້ 200 ລ້ານກວ່າກີບ ເທົ່າກັບ 27% ຂອງແຜນການປີ, ໃນນັ້ນລາຍຮັບສ່ວຍສາອາກອນມີ 700 ລ້ານກ່ວາກີບ ເທົ່າກັບ 11% ຂອງແຜນການປີ, ລາຍຮັບພາສີທີ່ດິນມີ 42 ລ້ານກວ່າກີບ ເທົ່າກັບ 6% ຂອງແຜນການປີ, ລາຍຮັບຈາກຊັບສິນຂອງລັດ 3 ຕື້ 500 ລ້ານກ່ວາກີບ, ເທົ່າກັບ 41% ຂອງແຜນການປີ, ສ່ວນລາຍຈ່າຍ 3 ເດືອນຜ່ານມາປະຕິບັດລາຍຈ່າຍງົບປະມານໄດ້ທັງໝົດ 1 ຕື້ 900 ລ້ານກ່ວາກີບ ເທົ່າກັບ 25% ຂອງແຜນການປີ, ໃນນັ້ນຈ່າຍເງິນເດືອນ ແລະ ເງິນອຸດໜູນ 1 ຕື້ 300 ລ້ານກ່ວາກີບ ເທົ່າກັບ 26% ຂອງແຜນການປີ, ຈ່າຍເງິນອຸດໜູນນະໂຍບາຍ 215 ລ້ານກ່ວາກີບ ເທົ່າກັບ 22%, ຈ່າຍບໍລິຫານ 244 ລ້ານກ່ວາກີບ ເທົ່າກັບ 25%, ຈ່າຍເງິນດັດສົມ 182 ລ້ານກ່ວາກີບ ເທົ່າກັບ 25%.

ທ່ານ ພິທູນ ມະວົງສາ ກ່າວໃຫ້ຮູ້ອີກວ່າ: ໃນ 3 ເດືອນຕໍ່ໜ້າຈະສູ້ຊົນຈັດເກັບລາຍຮັບງົບປະມານໃຫ້ໄດ້ 11 ຕື້ 500 ລ້ານກວ່າກີບ ຫຼື ເທົ່າກັບ 74% ຂອງແຜນການປີ ສຸມໃສ່ຄຸ້ມຄອງການຈັດເກັບລາຍຮັບ ຜ່ານລະບົບທັນສະໄໝໃຫ້ກວ້າງຂວາງ ໄປຄຽງຄູ່ກັບການຊຸກຍູ້ຫົວໜ່ວຍທຸລະກິດຖືບັນຊີ ແລະ ເຂົ້າລະບົບ TaxRIS ເພື່ອໃຫ້ທັນເວລາຕາມລະບຽບກົດໝາຍ ສຸມໃສ່ວຽກງານຈຸດສຸມ ວຽກບຸລິມະສິດທີ່ຈໍາເປັນຮີບດ່ວນຂອງເມືອງ ແລະ ຂອງໜ່ວຍງານ ໂດຍສະເພາະວຽກງານແກ້ໄຂຄວາມຫຍຸ້ງຍາກດ້ານເສດຖະກິດການເງິນໃຫ້ບັນລຸຕາມຕາມແຜນການທີ່ວາງໄວ້.

ຂ່າວ-ພາບ: ວັດທະນາ