ແຂວງສາລະວັນ ເປີດຊຸດຝຶກອົບຮົມ ທິດສະດີການເມືອງ-ການປົກຄອງ ໃຫ້ແກ່ເລຂາໜ່ວຍພັກ, ຄະນະບ້ານໜອງບົວນ້ອຍ ແລະ ສິບບ້ານອ້ອມຂ້າງ ເມືອງສາລະວັນ, ພິທີດັ່ງກ່າວໄດ້ຈັດຂຶ້ນ ໃນວັນທີ 22 ພຶດສະພາ ຜ່ານມາ ຢູ່ບ້ານໜອງບົວນ້ອຍ ເມືອງສາລະວັນ ໂດຍການເຂົ້າຂອງທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ ພັກພະນັກງານ, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ບຸນທະວີ ດວງລາສີ ໄດ້ກ່າວວ່າ: ການຝຶກອົບຮົມຄັ້ງນີ້ ເຖິງວ່າຈະໃຊ້ເວລາບໍ່ດົນ ແຕ່ກໍສຸດທີ່ມີຄວາມໝາຍ, ຄວາມສຳຄັນ ສຳລັບເລຂາໜ່ວຍພັກ, ນາຍບ້ານ ແລະ ອົງການຈັດຕັ້ງຂັ້ນບ້ານ ໄດ້ຮັບຮູ້ເຂົ້າໃຈກ່ຽວກັບວຽກງານການເມືອງ, ການບໍລິຫານ, ການປົກຄອງບ້ານ ກໍຄືແນວທາງນະໂຍບາຍຂອງພັກ ເພື່ອເຮັດໃຫ້ການຈັດຕັ້ງນໍາພາວຽກງານຕ່າງໆຢູ່ຂັ້ນຮາກຖານບ້ານ ດໍາເນີນໄປຢ່າງຖືກຕ້ອງຕາມແນວທາງນະໂຍບາຍຂອງພັກວາງອອກ. ການຮຽນທິດສະດີການເມືອງ-ການປົກຄອງ ກໍເພື່ອສ້າງຄວາມຮັບຮູ້, ຄວາມເຂົ້າໃຈຕໍ່ແນວທາງ ແລະ ແຜນນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດ ຕິດພັນກັບການຈັດຕັ້ງປະຕິບັດວຽກງານຕົວຈິງ ພາຍຫຼັງທີ່ໄດ້ເຊື່ອມຊຶມ, ຮັບຮູ້ ແລະ ເຂົ້າໃຈ ກ່ຽວກັບທິດສະດີ, ພຶດຕິກຳຕ້ອງສອດຄ່ອງ ສະນັ້ນພາຍຫຼັງສຳເລັດບັ້ນຝຶກອົບຮົມຄັ້ງນີ້ ຜູ້ເຂົ້າຮ່ວມຕ້ອງໄດ້ນຳເອົາບົດຮຽນໄປຈັດຕັ້ງປະຕິບັດ ໃຫ້ຖືກຕ້ອງສອດຄ່ອງກັບແນວທາງ, ລະບຽບການຕ່າງໆຂອງພັກ-ລັດ ວາງອອກ ເພື່ອສ້າງໃຫ້ບ້ານມີຄວາມເຂັ້ມແຂງ, ໜັກແໜ້ນ ໃນການຈັດຕັ້ງປະຕິບັດ ວຽກງານຕ່າງໆ ໃຫ້ມີປະສິດທິຜົນ.

ຊຸດຝຶກອົບຮົມຄັ້ງນີ້ ຈະໄດ້ຄົ້ນຄວ້າຮໍ່າຮຽນມີ 3 ກຸ່ມວິຊາຮຽນ, ມີ 19 ບົດ ແລະ ຈະໃຊ້ເວລາທັງໝົດ 80 ຊົ່ວໂມງ ຄື: ກຸ່ມວິຊາຮຽນ 1 ທິດທາງລວມ ມີທັງໝົດ 4 ບົດ ໃຊ້ເວລາຮຽນ 2 ວັນ, ກຸ່ມວິຊາຮຽນທີ 2 ວຽກງານພັກ ປະກອບມີ 6 ບົດ ໃຊ້ເວລາຮຽນ 3 ວັນ ແລະ ກຸ່ມວິຊາຮຽນທີ 3 ວຽກງານການບໍລິຫານ ແລະ ການປົກຄອງ ປະກອບມີ 9 ບົດ ແລະ ຈະໃຊ້ເວລາຮຽນ 4 ວັນ ຊຸດຝຶກອົບຮົມຄັ້ງນີ້ແມ່ນຈະດໍາເນີນໄປຮອດວັດທີ 5 ມິຖຸນາ 2023 ຈຶ່ງຈະສໍາເລັດ.

ຂ່າວ-ພາບ: ສິດຕາ ເພັດວົງສາ