ສຳນັກຂ່າວສານຫວຽດນາມ ປະຈຳ ອາຟຣິກາ ລາຍງານວ່າ: ວັນທີ 24 ພຶດສະພາ ຜ່ານມາ, ອົງການສະຫະປະຊາຊາດ ໄດ້ຄາດຄະເນວ່າຈຳເປັນຕ້ອງໄດ້ໃຊ້ເງິນທຶນ 7 ຕື້ໂດລາ ໃນການຊ່ວຍເຫຼືອອາຟຣິກາ ທີ່ປະສົບໄພແຫ້ງແລ້ງຢ່າງໜັກໜ່ວງ.

ໃນກອງປະຊຸມຜູ້ອຸປະຖຳຢູ່ສຳນັກງານໃຫຍ່ສະຫະປະຊາຊາດ ນິວຢອກ, ທ່ານ ອັນໂຕນີໂອ ກູເຕີເຣສ ເລຂາທິການໃຫຍ່ສະຫະປະຊາຊາດ ໃຫ້ຮູ້ວ່າ: “ວິກິດການ ສືບຕໍ່ໃສ່ ວິກິດການ” ພວມນາບຂູ່ປະຊາຊົນນັບລ້ານຄົນ ຢູ່ ແຫຼມໂຊມາເລຍ ອາຟຣິກາ, ລວມທັງຂົງເຂດຂອງບັນດາປະເທດ ເອທິໂອປີ, ເອຣິເທຣຍ, ໂຊມາລີ, ຈີບູຕີ, ເຄນຢາ ແລະ ຊູດັງ.

ໃນກອງປະຊຸມ, ຄຳໝັ້ນສັນຍາການຊ່ວຍເຫຼືອໃຫ້ແກ່ພາກພື້ນບັນລຸ 2,4 ຕື້ໂດລາ, ແຕ່ຍັງຫ່າງໄກຈາກເປົ້າໝາຍດັ່ງກ່າວ. ທ່ານ ອັນໂຕນີໂອ ກູເຕີເຣສ ຮຽກຮ້ອງໃຫ້ມີການກະທຳໂດຍໄວ ດ້ວຍຈິດໃຈເຂັ້ມແຂງ, ຮີບດ່ວນກວ່າເກົ່າອີກເພື່ອສະກັດກັ້ນໄພພິບັດ. ເງິນທຶນດັ່ງກ່າວຈະນຳໃຊ້ເພື່ອສະໜອງສິ່ງຈຳເປັນພື້ນຖານ ແລະ ຮັບໃຊ້ຄວາມຕ້ອງການດ້ານການແພດຂອງປະຊາຊົນ.

ປະຊາຊົນຫຼາຍກວ່າ 40 ລ້ານຄົນ ໃນປະເທດເອທິໂອປີ, ເຄນຢາ ແລະ ໂຊມາລີ ກໍາລັງປະເຊີນກັບໄພແຫ້ງແລ້ງທີ່ຍາວນານແບບບໍ່ເຄີຍມີມາກ່ອນ. ການອົບພະຍົບເປັນຈຳນວນຫຼວງຫຼາຍ, ລາຄາອາຫານທີ່ເພີ່ມຂຶ້ນ ແລະ ການປະທະກັນໃນຊູດັງເມື່ອບໍ່ດົນມານີ້ ໄດ້ເພີ່ມຄວາມຫຍຸ້ງຍາກຂຶ້ນໃນພາກພື້ນທີ່ມີຄວາມຂັດແຍ່ງກັນເປັນໄລຍະເວລາຫຼາຍປີຜ່ານມາ.