ພິທີເຊັນສັນຍາ ໂຄງການປູກໝາກໂມເປັນສິນຄ້າ ເພື່ອສົ່ງອອກ ລະຫວ່າງອົງການປົກຄອງເມືອງຫົງສາ ແຂວງໄຊຍະບູລີ ຊຶ່ງຕາງໜ້າໂດຍ ຫ້ອງການແຜນການ ແລະ ການລົງທຶນ ກັບບໍລິສັດ ເອເຊຍກະເສດອິນຊີ ຈໍາກັດ ໄດ້ຈັດຂຶ້ນເມື່ອບໍ່ດົນມານີ້ ທີ່ເມືອງຫົງສາ ໂດຍມີທ່ານ ຈັນເພັງ ອູ່ທອງຄໍາ ຮອງເຈົ້າເມືອງ ຜູ້ຊີ້ນໍາວຽກງານເສດຖະກິດ, ມີພາກສ່ວນກ່ຽວຂ້ອງເຂົ້າຮ່ວມ.

ໂຄງການດັ່ງກ່າວ ແມ່ນການລົງທຶນຂອງເອກະຊົນ 100% ລົງທຶນປູກໝາກໂມເປັນສິນຄ້າ ເພື່ອສົ່ງອອກໃນລະດູແລ້ງຂອງແຕ່ລະປີ, ໄລຍະຂອງໂຄງການແມ່ນ 5 ປີ (2024 - ເດືອນຕຸລາ 2029) ຊຶ່ງປູກຢູທົ່ງນາໃນເທດສະບານເມືອງ ກວມເອົາ 7 ບ້ານຄື: ບ້ານໂພນຈັນ, ບ້ານເມືອງຫານ, ວຽງແກ້ວ, ຈໍາປາ, ນາສ້ານ, ຈອມແຈ້ງ ແລະ ບ້ານສີມຸງຄຸນ.

ບໍລິສັດຈະຮັບຜິດຊອບຈ່າຍພັນທະຕ່າງໆເຊັ່ນ: ຄ່າບໍລິຫານບ້ານ, ຄ່າບໍລິຫານວິຊາການ, ຄ່າເຊົ່າດິນ, ທຶນພັດທະນາບ້ານ ແລະ ການຄຸ້ມຄອງສິ່ງແວດລ້ອມ, ຄ່າບໍລິຫານພາກລັດ, ຈ່າຍຄ່າແຮງງານໃນການສ້ອມແປງຄັນນາຄືນ (ໃນກໍລະນີໂຄງການເຮັດຄັນນາເປ່ເພ).

ໃນໂອກາດັ່ງກ່າວ, ທ່ານ ບຸນທະວີ ສີປະເສີດ ຫົວໜ້າຫ້ອງການແຜນການ ແລະ ການລົງທຶນ ຕາງໜ້າອົງການປົກຄອງເມືອງ ແລະ ທ່ານ ໄຊປະເສີດ ຕັງຊະນະ ເຈົ້າຂອງໂຄງການ ກໍໄດ້ຮ່ວມເຊັນສັນຍາ ໂດຍຊ້ອງໜ້າທ່ານ ຈັນເພັງ ອູ່ທອງຄໍາ ຮອງເຈົ້າເມືອງ ຜູ້ນໍາວຽກງານເສດຖະກິດ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ທ່ານ ຈັນເພັງ ອູ່ທອງຄໍາ ໄດ້ສະແດງຄວາມຍ້ອງຍໍຊົມເຊີຍ ເຈົ້າຂອງໂຄງການ ແລະ ເຈົ້າຂອງທີ່ດິນທີ່ເຫັນຄວາມສໍາຄັນໃນການປູກໝາກໂມເປັນສິນຄ້າຢູ່ພາຍໃນເມືອງ, ພ້ອມທັງເນັ້ນໜັກໃຫ້ທັງສອງຝ່າຍຈົ່ງພ້ອມກັນເອົາໃຈໃສ່ສືບຕໍ່ຈັດຕັ້ງປະຕິບັດໄປຕາມສັນຍາ, ຮັບປະກັນທາງດ້ານປະລິມານ ແລະ ຄຸນນະພາບຖືກຕ້ອງຕາມກົດໝາຍ ແລະ ລະບຽບການ.

ຂ່າວ-ພາບ: ເມືອງຫົງສາ