​ໃນວັນທີ 24 ພຶດສະພາ ນີ້ ຢູ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມພົບປະລະຫວ່າງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ກັບ ພາກທຸລະກິດ ທັງພາກລັດ ແລະ ເອກະຊົນພາຍໃນແຂວງ ໂດຍການເປັນປະທານຂອງ ທ່ານ ສຸວັນນີ ໄຊຊະນະ ປະທານສະພາປະຊາຊົນແຂວງບໍ​ລິຄຳ​ໄຊ (ສ​ພ​ຂ), ມີ ສສຊ, ສສຂ, ນັກທຸລະກິດພາຍໃນແຂວງ ແລະ ຂະແໜງການກ່ຽວຂ້ອງເຂົ້າຮ່ວມ.

ທ່ານ ໄຊຍະເພັດ ຈັນທິສອນ ປະທານສະພາການຄ້າ ແລະ ອຸດສາຫະກຳແຂວງ ທັງເປັນສະມາຊິກ ສສຂ ເຂດເມືອງປາກຊັນ ໄດ້ລາຍງານການເຄື່ອນໄຫວຂອງ ສະພາການຄ້າ ແລະ ອຸດສາຫະກຳແຂວງໃນໄລຍະຜ່ານມາ ຊຶ່ງໄດ້ຮ່ວມກັບຄະນະພັດທະນາທຸລະກິດກະສິກໍາຂອງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ເພື່ອລົງຊຸກຍູ້ວຽກງານການສົ່ງເສີມກະສິກໍາໂດຍສະເພາະແມ່ນການປູກພືດຜັກຢູ່ໃນ 5 ເມືອງຂອງແຂວງ ໂດຍ​ໄດ້ມອບແນວພັນສາລີແຂງຈຳນວນ 200 ກິໂລ, ປຸ໋ຍເຄມີ ຈຳນວນ 15 ​ເປົາ, ປຸ໋ຍຊີວະພາບຈໍານວນ 2 ໂຕນ ແລະ ເ​ງິນສົມທົບໃນການຄາດໄຖເນື້ອທີ່ ຈຳນວນ 2,7 ລ້ານກີບ ໃຫ້ກັບກຸ່ມຊາວສວນເຂດບ້ານໂພນສະອາດ ເມືອງປາກຊັນ (ຊຶ່ງມີເນື້ອທີ່ປູກຈໍານວນ 54 ໄລ່), ມອບແນວພັນສາລີແຂງໃຫ້ຊາວສວນເຂດເມືອງທ່າພະບາດ ຈຳນວນ 350 ກິໂລ ແລະ ເມືອງບໍລິຄັນ ຈຳນວນ 50 ກິໂລ ແລະ ໄດ້ມອບແນວພັນຜັກບົ່ວໃຫ້ກຸ່ມຊາວສວນປູກຜັກປອດສານພິດຢູ່ບ້ານຫົວນາ ເມືອງບໍລິຄັນ ຈຳນວນ 125 ກິໂລ, ຈັດງານວາງສະແດງ ແລະ ຈຳໜ່າຍສິນຄ້າ ໄດ້ 5 ຄັ້ງ, ໄດ້ຈັດສົ່ງບັນດາຫົວໜ່ວຍຜະລິດຕະພັນ ODOP ແລະ ຫົວໜ່ວຍຜະລິດຕະພັນທີ່ເປັນທ່າແຮງຂອງແຂວງ ເຂົ້າຮ່ວມງານວາງສະແດງ ແລະ ຈຳໜ່າຍສິນຄ້າຢູ່ພາຍໃນ ແລະ ຕ່າງປະເທດໄດ້ 7 ຄັ້ງ, ມີຜູ້ເຂົ້າຮ່ວມ 22 ຫົວໜ່ວຍ.

ກອງປະຊຸມຄັ້ງນີ້ບັນດາຜູ້ເຂົ້າຮ່ວມ ຍັງໄດ້ປະກອບຄຳຄິດຄຳເຫັນຫຼາຍບັນຫາ ເປັນຕົ້ນແມ່ນການກົດໜ່ວງຖ່ວງດຶງຕໍ່ການດຳເນີນທຸລະກິດ, ການອອກໃບອະນຸຍາດຕ່າງໆ ລະຫວ່າງເມືອງກັບແຂວງຍັງບໍ່ທັນລະອຽດ, ສະເໜີໃຫ້ມີການຊົມໃຊ້ຜະລິດຕະພັນພາຍໃນແຂວງໃຫ້ຫຼາຍຂຶ້ນ ເພື່ອໃຫ້ຜູ້ປະກອບກິດຈະການ ສາມາດຄົງຕົວໃນຕະຫຼາດ ແລະ ພັດທະນາສິນຄ້າຂອງຕົນເຂົ້າສູ່ຕະຫຼາດແຂວງອື່ນໆໄດ້.

ຂ່າວ-ພາບ: ແຂ​ວງ​ບໍ​ລິ​ຄຳ​ໄຊ