ເມື່ອບໍ່ດົນມານີ້ ທີ່ແຂວງເທື່ອທຽນເຫວ້ ສສ ຫວຽດນາມ ໄດ້ຈັດພິທີເອົາຮ່າງອັດຖິນັກຮົບອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ລາວເຂົ້າສູ່ສຸສານນັກຮົບນິລະນາມທີ່ນະຄອນເຫວ້ ຈຳນວນ 16 ອັດຖິ ທີ່ຂຸດຄົ້ນໄດ້ພາຍໃນແຂວງສາລະວັນ ຈໍານວນ 11 ອັດຖິ ແລະ ແຂວງເຊກອງ ຈໍານວນ 5 ອັດຖິ. ໂດຍການເຂົ້າຮ່ວມຂອງ ທ່ານ ເລ ເຈື່ອງ ລືວ ກໍາມະການສູນກາງພັກກອມມູນິດຫວຽດນາມ ເລຂາຄະນະພັກແຂວງ ປະທານສະພາປະຊາຊົນແຂວງ ຫົວໜ້າຄະນະສະມາຊິກສະພາແຫ່ງຊາດປະຈໍາແຂວງເທື່ອທຽນເຫວ້ ສສ ຫວຽດນາມ, ມີສະຫາຍ ພົນຈັດຕະວາ ພູວັນ ພົມມະຈັນ ຄະນະປະຈໍາພັກແຂວງ ຫົວໜ້າການເມືອງກອງບັນຊາການທະຫານແຂວງສາລະວັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີໄດ້ມີການວາງພວງມະລາ ແລະ ໄຕ້ທູບທຽນຕໍ່ໜ້າອັດຖິນັກຮົບອາສາສະໝັກ ແລະ ຊ່ຽວຊານ ຫຽດນາມ. ໂອກາດນີ້, ສະຫາຍ ຟານ ຫງັອກຖໍ້ ຮອງເຂລາພັກແຂວງ ຮອງເຈົ້າແຂວງເທື່ອທຽນເຫວ້ ແລະ ສະຫາຍ ພົນຈັດຕະວາ ພູວັນ ພົມມະຈັນ ໄດ້ມີຄຳເຫັນວ່າ: ໄລຍະຜ່ານມາລາວ-ຫວຽດນາມໄດ້ມີມູນເຊື້ອສາມັກຄີຊ່ວຍເຫຼືອຊຶ່ງກັນ ແລະ ກັນ ໃນພາລະກິດຕໍ່ສູ້ກູ້ຊາດຕ້ານຈັກກະພັດລ່າເມືອງຂຶ້ນ ເພື່ອຄວາມເປັນເອກະລາດແຫ່ງຊາດຂອງປະຊາຊົນ 2 ຊາດລາວ-ຫວຽດນາມ ຊຶ່ງໄດ້ຮ່ວມສຸກ, ຮ່ວມທຸກ, ຮ່ວມຂຸມຄອງດຽວກັນ ເພື່ອຕີສັດຕູໂຕດຽວກັນ, ນີ້ເປັນການຢັ້ງຢືນວ່າອັດຖິຂອງນັກຮົບອາສາສະໜັກ ແລະ ຊ່ຽວຊານຫວຽດນາມຈຳນວນ 16 ອັດຖິນີ້ແມ່ນໝາກຜົນແຫ່ງການຮ່ວມມືຂອງລັດຖະບານ ສປປ ລາວ ກັບລັດຖະບານ ສສ ຫວຽດນາມ ກໍຄືອຳນາດການປົກຄອງທ້ອງຖິ່ນຊາວແຂວງສາລະວັນ ທີ່ໄດ້ເອົາໃຈໃສ່ຂຸດຄົ້ນຮ່າງອັດຖິດັ່ງກ່າວ. ພ້ອມນີ້ກໍໄດ້ເຄື່ອນຍ້າຍເອົາຮ່າງອັດຖິຂອງນັກຮົບອາສາສະໜັກ ແລະ ຊ່ຽວຊານຫວຽດນາມ ເຂົ້າສູ່ສຸສານັກຮົບນິລະນາມທີ່ນະຄອນເຫວ້ ສສ ຫວຽດນາມ ຢ່າງສົມກຽດ.

ຂ່າວ-ພາບ: ສຸຂາວພອນ ສອນນາລີ