ໂດຍ: ຕະວິນຍານ

ປັດຈຸບັນ, ທົ່ວແຂວງໄຊຍະບູລີ ມີເສັ້ນທາງຍາວທັງໝົດ 3.308,54 ກິໂລແມັດ (ກມ). ໃນນັ້ນ, ທາງເບຕົງ 5,99 ກມ, ທາງປູອັດສະຟານ 86,35 ກມ, ທາງປູຢາງສອງຊັ້ນ 1.095,42 ກມ, ທຽບໃສ່ປີ 2020 ເພີ່ມຂຶ້ນ 22,72 ກມ, ເທົ່າກັບ 2,12% (ແຜນການຍົກລະດັບເສັ້ນທາງປູຫີນເປັນທາງປູຢາງເພີ່ມຂຶ້ນ 15% ຕໍ່ປີ), ທົ່ວແຂວງມີ 430 ບ້ານ ມີເສັ້ນທາງເຂົ້າເຖິງແລ້ວທຸກບ້ານ. ໃນນັ້ນ, ສາມາດທຽວໄດ້ 2 ລະດູ 357 ບ້ານ, ເທົ່າກັບ 83%, ທຽບໃສ່ແຜນການຍັງ 7% (ແຜນສູ້ຊົນສ້າງເສັ້ນທາງເຂົ້າເຖິງບ້ານໃຫ້ທຽວໄດ້ 2 ລະດູ ໃຫ້ກວມ 90% ຂອງຈໍານວນບ້ານທັງໝົດທົ່ວແຂວງ).

ໃນໄລຍະ 2 ປີເຄິ່ງຜ່ານມາ, ແຂວງສາມາດສ້າງລະບົບສາງພັກສິນຄ້າ, ລະບົບໂລຈິສຕິກຕາມແລວທາງເສດຖະກິດ ປັດຈຸບັນແມ່ນສໍາເລັດຂັ້ນຕອນສຶກສາຄວາມເປັນໄປໄດ້ ແລະ ອອກແບບກະກຽມເຊັນສັນຍາກໍ່ສ້າງ ຢູ່ 3 ດ່ານສາກົນ (ດ່ານນໍ້າເຫືອງ, ດ່ານນໍ້າເງິນ, ດ່ານປາງມອນ). ມີສະຖານີຂົນສົ່ງໂດຍສານ 4 ແຫ່ງ, ປະຕິບັດໄດ້ 66,6% ຂອງແຜນການ (ແຜນ 5 ປີ 6 ແຫ່ງ). ປັບປຸງຜັງເມືອງໃຫ້ໄດ້ 3 ເມືອງ (ເມືອງໄຊສະຖານ, ເມືອງພຽງ ແລະ ເມືອງເງິນ). ມາຮອດປັດຈຸບັນ ຍັງບໍ່ໄດ້ມີການສໍາຫຼວດອອກແບບ ແລະ ປັບປຸງຜັງເມືອງຕາມເປົ້າໝາຍທີ່ກຳນົດໄວ້ (ຍ້ອນວ່າໃນໄລຍະຜ່ານມາບັນດາເມືອງດັ່ງກ່າວແມ່ນມີອັດຕາການຂະຫຍາຍຕົວທາງດ້ານປະຊາກອນທີ່ຍັງຕໍ່າ ແລະ ພວມສືບຕໍ່ຊອກຫາແຫຼ່ງທຶນສຳຫຼວດອອກແບບຜັງເມືອງ). ປັບປຸງຜັງບ້ານໃຫ້ໄດ້ 100% ໃນປີ 2021-2023 ສາມາດອອກແບບວາງແຜນ ແລະ ປັບປຸງຜັງບ້ານ ໄດ້ຈໍານວນ 121 ບ້ານ, ເທົ່າກັບ 28,13% (ແຜນ 5 ປີ ໃຫ້ໄດ້ 100%).

ຮອດປັດຈຸບັນ, ທົ່ວແຂວງສາມາດເຂົ້າເຖິງການບໍລິການນໍ້າປະປາແລ້ວ 10 ເມືອງ. ໃນນັ້ນ, ຂະຫຍາຍລະບົບໂຮງງານຜະລິດນໍ້າປະປາ ແລະ ສຸຂະພິບານ ໄດ້ 1 ເມືອງ (ເມືອງບໍ່ແຕນ) ທຽບໃສ່ແຜນການ ເທົ່າກັບ 100%. ໄດ້ຂະຫຍາຍນໍ້າປະປາຊຸມຊົນໄດ້ 2 ພື້ນທີ່, ທຽບໃສ່ແຜນຄາດໝາຍສູ້ຊົນ ແມ່ນເທົ່າກັບ 20% ຂອງແຜນການ ແລະ ພວມຈັດຕັ້ງປະຕິບັດການກໍ່ສ້າງ 1 ພື້ນທີ່ກຸ່ມບ້ານພັດທະນາ ບ້ານແກ່ນ-ດອນເຟືອງ ເມືອງຊຽງຮ່ອນ ປະຕິບັດໄດ້ 63.94% (ນໍ້າປະປາຮູບແບບ ພາກລັດ ແລະ ເອກະຊົນ) ແລະ ອີກ 1 ໂຄງການຂະຫຍາຍລະບົບທໍ່ແຈກຈ່າຍນໍ້າ ຫາບ້ານນາຕາກ, ບ້ານນາຕໍໃຫຍ່ ໂດຍໄດ້ຮັບທຶນໂຄງການ MAWASU 2 ຈາກປະເທດຍີ່ປຸ່ນ.