ສະຫາຍ ວິລະພັນ ຊາພູວົງ ໄດ້ຮັບເລືອກຕັ້າງໃຫ້ເປັນເລຂາໜ່ວຍພັກຮາກຖານ ວສຊ

ສະຫາຍ ວິລະພັນ ຊາພູວົງ ໄດ້ຜ່ານບົດລາຍງານການເມືອງທັງສອງພາກໃນໄລຍະ 5ປີຜ່ານມາ, ບົດສໍາຫຼວດການນໍາພາລວມຂອງຄະນະໜ່ວຍພັກ, ໜ່ວຍພັກ ວສຊ ແມ່ນໜ່ວຍພັກໜຶ່ງທີ່ຂຶ້ນກັບອົງຄະນະພັກກະຊວງ ວທ ປັດຈຸບັນມີສະມາຊິກພັກທັງໝົດ 57 ສະຫາຍ ໃນນັ້ນມີພະນັກງານສະມາຊິກພັກອາວຸໂສບໍານານ 7 ສະຫາຍ, ສະມາຊິກພັກທີ່ປະຈໍາການມີ 50 ສະຫາຍ,ຍິງ 24 ສະຫາຍ, ສະມາຊິກພັກສໍາຮອງ 8 ສະຫາຍ, ມີກໍາມະການຄະນະໜ່່ວຍພັກ 5 ສະຫາຍ, ພະນັກງານ-ລັດຖະກອນທັງໝົດ 80 ສະຫາຍ, ຍິງ 37 ສະຫາຍ.

ໃນ 5 ປີຜ່ານມາໜ່ວຍພັກໄດ້ມີຄວາມຕັ້ງໜ້ານໍາພາ-ຊີ້ນໍາວຽກງານວິຊາສະເພາະ ໂດຍຊຸກຍູ້ໃຫ້ບັນດາຂະແໜງການພາກວິຊາໄດ້ມີຄວາມເອົາໃຈໃສ່ຕັ້ງໜ້າຈັດຕັ້ງປະຕິບັດໜ້າທີ່ການເມືອງຂອງຕົນ ຕາມພາລະບົດບາດ, ໜ້າທີ່, ດ້ວຍຄວາມຮັບຜິດຊອບສູງ ເພື່ອບັນລຸຜົນສໍາເລັດ ຂອງການຮຽນ-ການສອນຕາມຫຼັກສູດທີ່ໄດ້ກໍານົດໄວ້. ສໍາລັບການຮຽນ-ການສອນ ວສຊ ມີລະບົບການສອນແບບຄວບຄູ່, ລະຫວ່າງກາຮຽນວິຊາຊີບ(ວິຊາສະເພາະ) ດ້ານສິລະປະການສະແດງກັບການຮຽນສາຍສາມັນສຶກສາ ຊຶ່ງຈັດຢູ່ໃນການສຶກສານອກໂຮງຮຽນ(ກສນ) ຂຶ້ນກັບກົມການສຶກສານອກໂຮງຮຽນ ຂອງກະຊວງສຶກສາທິການ ແລະ ກິລາ ສ່ວນດ້ານວິຊາສະເພາະສິລະປະການສະແດງ ແມ່ນຂຶ້ນກັບກົມສິລະປະ-ວັດທະນະທໍາ, ກະຊວງ ວທ; ຊຶ່ງໃນໄລຍະ 5 ປີ ໄດ້ນໍາພາ-ຊີ້ນໍາ ການກໍ່ສ້າງນັກຮຽນຈົບວິຊາສະເພາະ ຊັ້ນກາງດ້ານສິລະປະການສະແດງໄດ້ທັງໝົດ 154 ຄົນ, ຍິງ 101ຄົນ; ການຮຽນ-ການສອນນອກລະບົບມີນັກຮຽນຈົບຊັ້ນມັດທະຍົມຕົ້ນ (ມ4) ທັງໝົດ 281 ຄົນ, ຍິງ 168ຄົນ; ຈົບຊັ້ນມັດທະຍົມປາຍ(ມ7) ມີ 282 ຄົນ, ຍິງ 166 ຄົນ.

ກອງປະຊຸມຄັ້ງນີ້ ບັນດາສະຫາຍທີ່ເຂົ້າຮ່ວມໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະພັກຮາກຖານ ວສຊ ຊຸດໃໝ່ ໂດຍມີຜູ້ແທນສົມບູນອອກຮັບສະໝັກ 7 ສະຫາຍ ເລືອກເອົາ 5 ສະຫາຍ, ກອງປະຊຸມຄັ້ງປະຖົມມະລຶກ ໄດ້ເປັນເອກະສັນເລືອກເອົາ ສະຫາຍ ວິລະພັນ ຊາພູວົງ ເປັນ ເລຂາໜ່ວຍພັກຮາກຖານວິທະຍາໄລ ສິລະປະແຫ່ງຊາດ, ສະຫາຍ ນາງ ອາໂນລິນ ຫຼວງລາດ ເປັນຮອງເລຂາໜ່ວຍພັກ, ສະຫາຍ ໝາຍເສີນ ຫຼວງຜາວີ ເປັນປະທານກວດກາພັກ, ສະຫາຍ ເມັດຄໍາ ແສງຄໍາ ແລະ ສະຫາຍ ແສງທອງ ບຸດຊາດີ ເປັນກໍາມະການໜ່ວຍພັກ.

ໃນໂອກາດດັ່ງກ່າວ ສະຫາຍ ນາງ ສວນສະຫວັນ ວິຍະເກດ ໄດ້ສະແດງຄວາມຊົມເຊີຍຕໍ່ຜົນງານຂອງຄະນະພັກຮາກຖານຊຸດເກົ່າຍາດມາໄດ້ຕະຫຼອດໄລຍະ 5 ປີຜ່ານມາ. ເພື່ອສືບຕໍ່ຊີ້ນໍາ-ນໍາພາ ວສຊ ໃນຕໍ່ໜ້າໃຫ້ມີການຫັນປ່ຽນທີ່ຕັ້ງໜ້າກວ່າເກົ່າກ່ອນອື່ນໝົດຕ້ອງປັບປຸງພາຍ ໃນພັກ ໃຫ້ມີຄວາມເຂັ້ມແຂງໜັກແໜ້ນໃນທຸກດ້ານ ໂດຍສະເພາະດ້ານການເມືອງ-ແນວຄິດ, ການຈັດຕັ້ງ, ຄວາມຮູ້ ຄວາມສາມາດ, ຄຸນສົມບັດສິນທຳປະຕິວັດ ແລະ ແບບແຜນນໍາພາ, ສະຫາຍ ນາງ ສວນສະຫວັນ ວິຍະເກດ ໄດ້ມີຄໍາເຫັນເນັ້ນຕື່ມບາງບັນຫາຈຸດສຸມຕົ້ນຕໍຄື: ສືບຕໍ່ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ສະມາຊິກພັກມີຄວາມເຊື່ອໝັ້ນຕໍ່ແນວທາງ, ນະໂຍບາຍ ຂອງພັກ ແລະ ທັດສະນະຂອງພັກຢ່າງເລິກເຊິ່ງ, ມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ, ເຊື່ອໝັ້ນຢ່າງຕາຍໃຈ ຕໍ່ອຸດົມການຂອງພັກ.

ຍົກສູງສະຕິລະວັງຕົວຕໍ່ກົນອຸບາຍຂອງບັນດາອິດທິກຳລັງປໍລະປັກ, ຈໍາແນກແຍກແຍະມິດ-ສັດຕູຢ່າງຈະແຈ້ງ, ເຊີດຊຸມານະຈິດປະຕິວັດ, ຍົກສູງສະຕິເປັນເຈົ້າຕົນເອງ-ສ້າງຄວາມເຂັ້ມແຂງດ້ວຍຕົນເອງ, ຍົກສູງນໍ້າໃຈຮັບຜິດຊອບ, ເສີມຂະຫຍາຍມູນເຊື້ອຄວາມສາມັກຄີເປັນເອກະພາບພາຍໃນພັກງ; ຍົກສູງຄວາສາມາດ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງໄດ້ຮັບການມອບໝາຍເປັນຕົ້ນ: ຊຸກຍູ້ສົ່ງເສີມ ໃຫ້ທຸກຂະແໜງການ ເສີມຂະຫຍາຍຫົວຄິດປະດິດສ້າງ ໂດຍສະເພາະ ສຶກສາອົບຮົມໃຫ້ນັກຮຽນ-ນັກສຶກສາ ນັກ ສິລະປະຮຸ່ນໜຸ່ມ ຊຶ່ງເປັນຮຸ່ນສືບທອດເຂົ້າໃຈແຈ້ງເຖິງສິລະປະວັດທະນະທຳອັນດີງາມຂອງຊາດ ຊຶ່ງເປັນມູນມໍລະດົກທີ່ລໍ້າຄ່າ, ສ່ອງແສງເຖິງລັກສະນະຊາດ, ລັກສະນະກ້າວໜ້າ ແລະ ລັກສະນະມະຫາຊົນ ທີ່ເປັນມູນເຊື້ອອັນດີງາມຂອງຊາດ ເພື່ອໃຫ້ດຳລົງຄົງຢູ່ຄູ່ກັບຊາດລາວຕະຫຼອດໄປ; ເອົາໃຈໃສ່ສືບຕໍ່ປັບປຸງກໍ່ສ້າງພະນັກງານ, ສະມາຊິກພັກຮຸ່ນສືບທອດປ່ຽນແທນ, ຂະຫຍາຍມະຫາຊົນກ້າວໜ້າເຂົ້າພັກໃຫ້ໄດ້ຕາມມາດຖານ-ເງື່ອນໄຂ ຂອງພັກທີ່ວາງໄວ້, ປະກອບສ່ວນກໍ່ສ້າງໜ່ວຍພັກໃຫ້ປອດໃສ, ເຂັ້ມແຂງ ໜັກແໜ້ນ.

ຂ່າວ: ຍຸພິນທອງ