ໜັງສືພິມ ປະຊາຊົນ

ຫົວຂໍ້ : ສານສະແດງຄວາມເສົ້າສະຫຼົດໃຈ

ເຜີຍແຜ່ໂດຍ: ວິໄລສັກ ເວລາ: 21/07/2022 08:33:12 ຈຳນວນຜູ້ເຂົ້າຢ້ຽມຊົມ 4125 ຄັ້ງ

ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ສົ່ງສານສະແດງຄວາມເສົ້າສະຫຼົດໃຈ ເຖິງ ຄະນະບໍລິຫານງານສູນກາງພັກກອມມູນິດກູບາ ເມື່ອບໍ່ດົນມານີ້ ທີ່ນະຄອນຫຼວງລາຮາວານ ຊຶ່ງມີເນື້ອໃນດັ່ງນີ້:

ບັນດາສະຫາຍທີ່ຮັກແພງ,

ຄະນະບໍລິຫານງານສູນກາງພັກປະຊາຊົນ ປະຕິວັດລາວ ມີຄວາມໂສກເສົ້າເສຍດາຍເປັນຢ່າງຍິ່ງຕໍ່ການມໍລະນະກຳຂອງ ສະຫາຍ ໂຮເຊຣາໂມງບາລາເກກາເບຣຣາ ອະດີດເລຂາທິການສູນກາງພັກອະດີດຫົວໜ້າຄະນະພົວພັນຕ່າງປະເທດສູນກາງພັກກອມມູນິດກູບາ ໃນວັນທີ 15 ກໍລະກົດ 2022 ຜ່ານມາ.

ຕະຫຼອດຊີວິດຂອງ ສະຫາຍ ໂຮເຊຣາໂມງບາລາເກກາເບຣຣາ ໄດ້ອຸທິດສະຕິປັນຍາ ແລະ ເຫື່ອແຮງຢ່າງບໍ່ຮູ້ອິດຮູ້ເມື່ອຍເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດ ກູບາ ແລະ ເປັນຜູ້ກໍ່ຕັ້ງ ພັກກອມມູນິດກູບາ.

ການຈາກໄປຂອງ ສະຫາຍ ໂຮເຊຣາໂມງບາລາເກກາເບຣຣາ ບໍ່ພຽງແຕ່ເປັນການສູນເສຍອັນໃຫຍ່ຫຼວງສຳລັບພັກ, ລັດ ແລະ ປະຊາຊົນກູບາອ້າຍນ້ອງເທົ່ານັ້ນ, ແຕ່ຍັງເປັນການສູນເສຍເພື່ອນມິດທີ່ສະໜິດສະໜົມຂອງ ພັກ, ລັດ ແລະ ປະຊາຊົນລາວ ນຳອີກ.

ຄະນະບໍລິຫານງານສູນກາງພັກປະຊາຊົນ ປະຕິວັດລາວ ຂໍແບ່ງເບົາຄວາມໂສກເສົ້າອັນສຸດຊຶ້ງມາຍັງຄະນະບໍລິຫານງານສູນກາງພັກ, ລັດ, ປະຊາຊົນກູບາ ແລະ ຄອບຄົວ ຂອງ ສະຫາຍ ໂຮເຊຣາໂມງບາລາເກກາເບຣຣາ ມານະໂອກາດນີ້ດ້ວຍ.