ໜັງສືພິມ ປະຊາຊົນ

ຫົວຂໍ້ : ໂທລະເລກເສົ້າສະຫຼົດໃຈ

ເຜີຍແຜ່ໂດຍ: ວິໄລສັກ ເວລາ: 21/07/2022 08:34:04 ຈຳນວນຜູ້ເຂົ້າຢ້ຽມຊົມ 4407 ຄັ້ງ

ສະຫາຍ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ສົ່ງໂທລະເລກເສົ້າສະຫຼົດໃຈ ເຖິງ ສະຫາຍ ອັງເຮນອາຊົວກາ ເຣເຢດສ ຮອງຫົວໜ້າ ແລະ ຜູ້ປະສານງານຄະນະພົວພັນຕ່າງປະເທດສູນກາງພັກກອມມູນິດກູບາ ເມື່ອບໍ່ດົນມານີ້ ທີ່ນະຄອນຫຼວງລາຮາວານ ຊຶ່ງມີເນື້ອໃນດັ່ງນີ້:

ໃນນາມຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ແລະ ໃນນາມສ່ວນຕົວຂ້າພະເຈົ້າຮູ້ສຶກສະເທືອນໃຈ ແລະ ອາໄລອາວອນຢ່າງສຸດຊຶ້ງ ເມື່ອໄດ້ຮັບຂ່າວວ່າສະຫາຍ ໂຮເຊຣາໂມງບາລາເກກາເບຣຣາ ອະດີດເລຂາທິການສູນກາງພັກ ອະດີດຫົວໜ້າຄະນະພົວພັນຕ່າງປະເທດສູນກາງພັກກອມມູນິດກູບາ ໄດ້ເຖິງແກ່ມໍລະນະກຳ ໃນວັນທີ 15 ກໍລະກົດ 2022.

ສະຫາຍ ໂຮເຊຣາໂມງບາລາເກກາເບຣຣາ ເປັນນັກກອມມູນິດທີ່ກ້າແກ່ນ, ເດັດດ່ຽວໜຽວແໜ້ນ, ຕໍ່ສູ້ອົງອາດກ້າຫານບໍ່ຍອມຈຳນົນ, ເປັນນັກປະຕິວັດຜູ້ຈົງຮັກພັກດີຕໍ່ປະເທດຊາດ ແລະ ເປັນລູກຫຼານຜູ້ປະເສີດຂອງປະຊາຊົນກູບາທັງເປັນເພື່ອນມິດທີ່ສະໜິດສະໜົມຂອງ ພັກ-ລັດ ແລະ ປະຊາຊົນລາວ, ຕະຫຼອດຊີວິດຂອງສະຫາຍ ໄດ້ອຸທິດສະຕິປັນຍາ ແລະ ເຫື່ອແຮງໃຫ້ແກ່ພາລະກິດປະຕິວັດຂອງກູບາຢ່າງບໍ່ຮູ້ອິດຮູ້ເມື່ອຍ ແລະ ທັງປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ລະຫວ່າງສອງພັກ, ສອງລັດ ແລະ ປະຊາຊົນສອງຊາດກໍຄືສອງຄະນະພົວພັນຕ່າງປະເທດສູນກາງພັກຂອງພວກເຮົາ.

ການຈາກໄປຂອງສະຫາຍ ໂຮເຊຣາໂມງບາລາເກກາເບຣຣາ ບໍ່ພຽງແຕ່ເປັນການສູນເສຍອັນໃຫຍ່ຫຼວງສຳລັບພັກ, ລັດ ແລະ ປະຊາຊົນກູບາອ້າຍນ້ອງເທົ່ານັ້ນ, ແຕ່ເປັນການສູນເສຍເພື່ອນມິດທີ່ໃກ້ຊິດ, ຮ່ວມອຸດົມການອັນຍິ່ງໃຫຍ່ຂອງພັກ, ລັດ ແລະ ປະຊາຊົນລາວອີກດ້ວຍ.

ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ຂໍແບ່ງເບົາຄວາມໂສກເສົ້າອັນສຸດຊຶ້ງມາຍັງສະຫາຍ, ຄະນະພົວພັນຕ່າງປະເທດສູນກາງພັກກອມມູນິດກູບາ ແລະ ຄອບຄົວຂອງສະຫາຍ ໂຮເຊຣາໂມງບາລາເກກາເບຣຣາມາໃນໂອກາດນີ້ດ້ວຍ.