ຫົວ​ຂໍ້ : ສານອວຍພອນ ຈາກ ສ ຣັດເຊຍ

ເຜີຍ​ແຜ່​ໂດຍ​: ວິ​ໄລ​ສັກ ເວ​ລາ: 08/12/2022 14:30:38 ຈຳ​ນວນ​ຜູ້​ເຂົ້າ​ຢ້ຽມ​ຊົມ 7845 ຄັ້ງ

ພະນະທ່ານ ວາລາດີເມຍ ປູຕິນ ປະທານາທິບໍດີ ແຫ່ງ ສະຫະພັນ ຣັດເຊຍ ໄດ້ສົ່ງສານອວຍພອນ ເຖິງ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຊຶ່ງມີເນື້ອໃນວ່າ:

ພະນະທ່ານ ປະທານປະເທດ, ຂໍສະແດງຄໍາຊົມເຊີຍຢ່າງຈິງໃຈ ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ. ສາຍພົວພັນ ລະຫວ່າງ ສອງປະເທດຂອງພວກເຮົາ ແມ່ນບົນພື້ນຖານມູນເຊື້ອແຫ່ງມິດຕະພາບອັນດີງາມ ແລະ ການເຄົາລົບຊຶ່ງກັນ ແລະ ກັນ.

ຂ້າພະເຈົ້າ ເຊື່ອໝັ້ນວ່າ ການສືບຕໍ່ຮັດແໜ້ນການເປັນຄູ່ຮ່ວມມືຍຸດທະສາດສອງຝ່າຍຢ່າງເຕັມເມັດເຕັມໜ່ວຍ ຈະນໍາເອົາຜົນປະໂຫຍດມາສູ່ປະຊາຊົນ ຣັດເຊຍ ແລະ ລາວ, ກໍຄືການຮັບປະກັນຄວາມໝັ້ນຄົງ ແລະ ສະຖຽນລະພາບ ຢູ່ໃນພາກພື້ນ ອາຊີ-ປາຊີຟິກ.

ຂ້າພະເຈົ້າ ຂໍອວຍພອນໄຊ ມາຍັງ ພະນະທ່ານ ຈົ່ງມີສຸຂະພາບເຂັ້ມແຂງ ແລະ ປະສົບຜົນສໍາເລັດ, ພ້ອມນັ້ນ ຂໍອວຍພອນໃຫ້ປະຊາຊົນລາວທຸກຖ້ວນໜ້າ ຈົ່ງມີຄວາມຜາສຸກ ແລະ ຄວາມວັດທະນາຖາວອນ.

ຂະນະດຽວກັນ, ພະນະທ່ານ ມິຄາອິນ ມິຊຸສະຕິນ ນາຍົກລັດຖະມົນຕີ ແລະ ພະນະທ່ານ ເຊີຣເກ ລາວະຣົບ ລັດຖະມົນຕີກະຊວງການຕ່າງປະເທດ ແຫ່ງ ສະຫະພັນ ຣັດເຊຍ ກໍໄດ້ສົ່ງສານອວຍພອນເຖິງ ພະນະທ່ານ ພັນຄໍາ ວິພາວັນ ນາຍົກລັດຖະມົນຕີ ແລະ ພະນະທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດແຫ່ງ ສປປ ລາວ ເຊັ່ນດຽວກັນ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ

ສະ​ແດງ​ຄວາມ​ຄິດ​ເຫັນ

ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ