ຫົວ​ຂໍ້ : ຜູ້ນຳເຮົາສົ່ງສານສະແດງຄວາມເຫັນໃຈ ແລະ ເສົ້າສະຫຼົດໃຈຕໍ່ເຫດການແຜ່ນດິນໄຫວຢູ່ອາຣັບ ຊີຣີ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 13/02/2023 14:15:40 ຈຳ​ນວນ​ຜູ້​ເຂົ້າ​ຢ້ຽມ​ຊົມ 1992 ຄັ້ງ

ພະນະທ່ານທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ສົ່ງສານສະແດງຄວາມເຫັນໃຈ ເຖິງ ພະນະທ່ານ ບັດຊາ ອານ ອາຊັດປະທານາທິບໍດີ ແຫ່ງ ສາທາລະນະລັດ ອາຣັບ ຊີຣີ ໂດຍມີເນື້ອໃນດັ່ງນີ້:

ຂ້າພະເຈົ້າ ໄດ້ຮັບຊາບຂ່າວດ້ວຍຄວາມເສົ້າສະຫຼົດໃຈຕໍ່ເຫດການແຜ່ນດິນໄຫວອັນຮ້າຍແຮງ ທີ່ເກີດຂຶ້ນໃນເຂດຕາເວັນຕົກສ່ຽງເໜືອຂອງ ສາທາລະນະລັດ ອາຣັບ ຊີຣີໃນວັນທີ 6 ກຸມພາ 2023 ທີ່ຜ່ານມາ ອັນໄດ້ເຮັດໃຫ້ມີຜູ້ເສຍຊີວິດ ແລະ ໄດ້ຮັບບາດເຈັບເປັນຈຳນວນຫຼວງຫຼາຍ ລວມທັງຊັບສິນຂອງປະຊາຊົນໃນເຂດດັ່ງກ່າວ ກໍໄດ້ຮັບຄວາມເສຍຫາຍຢ່າງໜັກໜ່ວງ.

 

      ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈ ແລະ ເສົ້າສະຫຼົດໃຈຢ່າງສຸດຊຶ້ງ ມາຍັງ ພະນະທ່ານ ແລະ ຜ່ານພະນະທ່ານ ໄປຍັງ ລັດຖະບານ ແລະ ປະຊາຊົນ ຊີຣີ, ໂດຍສະເພາະ ຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍຈາກເຫດການແຜ່ນດິນໄຫວໃນຄັ້ງນີ້ດ້ວຍ.

 

      ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາຂອງ ພະນະທ່ານ, ຄວາມສາມັກຄີເປັນນ້ຳໜຶ່ງໃຈດຽວຂອງປະຊາຊົນ ຊີຣີ ແລະ ການຊ່ວຍເຫຼືອຂອງວົງຄະນາຍາດສາກົນ,ຊີຣີ ຈະສາມາດຜ່ານຜ່າໄພພິບັດຄັ້ງນີ້ ແລະ ຟື້ນຟູຊີວິດການເປັນຢູ່ຂອງປະຊາຊົນໃຫ້ກັບຄືນສູ່ສະພາບປົກກະຕິໂດຍໄວ.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ

ສະ​ແດງ​ຄວາມ​ຄິດ​ເຫັນ

ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ