ເມືອງໂຂງ ແຂວງຈຳປາສັກ ໄດ້ຈັດກອງປະຊຸມສະຫຼຸບວຽກງານການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ປີ 2021-2023 ຂຶ້ນໃນວັນທີ 25 ກັນຍາ ຜ່ານມາ ທີ່ສະໂມສອນ ເມືອງ ໂດຍການເຂົ້າຮ່ວມເປັນປະທານຂອງ ທ່ານ ພູວັນ ສີສຸພົນ ຮອງເລຂາພັກເມືອງ, ມີທ່ານ ພັອ ສີວິໄລ ແກ້ວປະເສີດ ຮອງຫົວໜ້າກອງບັນຊາການປ້ອງກັນຄວາມສະຫງົບ (ປກສ) ແຂວງ, ທ່ານ ພັທ ສົມສະໜຸກ ພະໄຊສົມບັດ ຫົວໜ້າກອງບັນຊາການ ປກສ ເມືອງໂຂງ, ມີຄະນະພັກ, ຄະນະຫ້ອງການ, ກົມກອງອ້ອມຂ້າງເມືອງ, ນາຍ ແລະ ພົນຕຳຫຼວດກ່ຽວຂ້ອງເຂົ້າຮ່ວມ.

ທ່ານ ພັທ ສົມສະໜຸກ ພະໄຊສົມບັດ ໄດ້ຜ່ານບົດສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດນັບແຕ່ປີ 2021-2023 ແລະ ທິດທາງແຜນການໃນຕໍ່ໜ້າວ່າ: ໃນໄລຍະປີ 2021-2023 ໄດ້ຂຶ້ນບັນຊີເປົ້າໝາຍຢູ່ພື້ນທີ່ຫຼໍ່ແຫຼມມີ 9 ພື້ນທີ່ 21 ບ້ານ 29 ເປົ້າໝາຍ, ສຸມໃສ່ແກ້ໄຂບັນຫາຢາເສບຕິດ ເກັບກຳສະຖິຕິເປົ້າໝາຍຢາເສບຕິດທົ່ວເມືອງມີທັງໝົດ 1.313 ຄົນ ຍິງ 28 ຄົນ, ໃນນັ້ນເປົ້າ ໝາຍຄ້າຂາຍລາຍໃຫຍ່ມີ 41 ຄົນ ຍິງ 1 ຄົນ, ລາຍຍ່ອຍມີ 117 ຄົນ ຍິງ 1 ຄົນ, ເປົ້າໝາຍເສບຢາເສບຕິດມີ 1.155 ຄົນ ຍິງ 13 ຄົນ, ສາມາດມ້າງເປົ້າໝາຍໄດ້ທັງໝົດ 1.081 ຄົນ ຍິງ 26 ຄົນ, ໃນນັ້ນເປົ້າ ໝາຍຄ້າຂາຍລາຍໃຫຍ່ 35 ຄົນ ຍິງ 1 ຄົນ, ລາຍຍ່ອຍ 114 ຄົນ ຍິງ 13 ຄົນ, ເປົ້າໝາຍເສບຢາເສບຕິດມີ 930 ຄົນ ຍິງ 12 ຄົນ, ຢຶດຂອງກາງຢາບ້າໄດ້ 45.689 ເມັດ, ຢາໄອ 36 ກິໂລ ແລະ 10 ຖົງນ້ອຍກັບ10 ຫຼອດນ້ອຍ, ໂຄເຄນ 640 ກິໂລກຣາມ, ໃບກະທ້ອມ 2 ກິໂລກຣາມ, ຢາດີໄອທີ່ປະສົມກັບນ້ຳກະທ້ອມ 14 ຂວດ, ຢຶດລົດຈັກ 19 ຄັນ, ໂທລະສັບ 82 ໜ່ວຍ, ອາວຸດປືນດັດແປງ 5 ກະບອກ, ປືນແກັບ 6 ກະບອກ ແລະ ເຄື່ອງຂອງກາງອື່ນໆອີກຈຳນວນໜຶ່ງ. ພ້ອມນີ້ຍັງໄດ້ປະສານສົມທົບກັບພາກສ່ວນທີ່ກ່ຽວຂ້ອງລົງໂຄສະນາເຜີຍແຜ່ຜົນຮ້າຍ ແລະ ໄພອັນຕະລາຍຂອງຢາເສບຕິດຕາມບ້ານ ແລະ ໂຮງຮຽນໄດ້ 22 ຄັ້ງ, ມີຜູ້ເຂົ້າຮ່ວມທັງໝົດ 10.459 ຄົນ ຍິງ 5.288 ຄົນ, ຕິດປ້າຍໂຄສະນາ 59 ປ້າຍ, ປ້າຍຈິນຕະນາການ 3 ປ້າຍ, ຕິດຕັ້ງໂທລະໂຄ່ງປະຈຳບ້ານ ແລະ ສຳນັກງານຈຳນວນ 148 ໜ່ວຍສຳເລັດ 100%.

ໃນພິທີໄດ້ມອບໃບຍ້ອງຍໍຂັ້ນເຈົ້າເມືອງໃຫ້ບັນດາກົມກອງ, ຫ້ອງການ, ຜູ້ປະກອບການ ແລະ ບຸກຄົນທີ່ມີຜົນງານດີເດັ່ນ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດເປັນບຸກຄົນຈຳນວນ 189 ຄົນ ຍິງ 16 ຄົນ, ຜູ້ປະກອບການ 3 ຄົນ, ກົມກອງ-ຫ້ອງການ 22 ຫ້ອງການ ແລະ ບ້ານຈຳນວນ 114 ບ້ານ.

ຂ່າວ-ພາບ: ພຸດທະສິນ ວົງວິໄລທອງ