- ບັນດາທ່ານຄະນະນຳສູນກາງພັກ, ລັດຖະບານທີ່ເຄົາລົບ ແລະ ນັບຖື!

- ບັນດາທ່ານ ຄະນະກໍາມະການອະໄພຍະໂທດລະດັບຊາດ, ຄະນະກໍາມະການອະໄພຍະໂທດຂັ້ນກະຊວງ, ນະ ຄອນຫຼວງ, ແຂວງ ຕະຫຼອດຮອດປະຊາຊົນລາວບັນດາເຜົ່າທີ່ນັບຖື ແລະ ຮັກແພງ!.

ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ປະຊາຊົນລາວບັນດາເຜົ່າ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີກາງສະໄໝຄັ້ງທີ IX ແລະ ການສະຫຼຸບຜົນການຈັດຕັ້ງປະຕິບັດ 2 ວາລະແຫ່ງຊາດ ແຕ່ປີ 2021 ຫາ 2023 ຄື: ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດເຂົ້າສູ່ຊີວິດຕົວຈິງ ຊຶ່ງໄດ້ຮັບການສະໜັບສະໜູນຢ່າງກວ້າງຂວາງໃນທົ່ວສັງຄົມ.

ມື້ນີ້, ຂ້າພະເຈົ້າຮູ້ສຶກເປັນກຽດທີ່ໄດ້ຖະແຫຼງການ ກ່ຽວກັບການໃຫ້ອະໄພຍະໂທດ ປະຈໍາປີ 2023 ແລະ ໃນນາມປະທານຄະນະກໍາມະການອະໄພຍະໂທດລະດັບຊາດ ຂໍສະແດງຄວາມຊົມເຊີຍມາຍັງບັນດາສະຫາຍໃນຄະນະກໍາມະການອະໄພຍະໂທດແຕ່ສູນກາງຮອດທ້ອງຖິ່ນ ແລະ ຜູ້ທີ່ມີສ່ວນຮ່ວມ ໂດຍສະເພາະບັນດາສະຫາຍທີ່ເຮັດວຽກໃນຂົງເຂດປົກປ້ອງກົດໝາຍ, ຂົງເຂດຕຸລາການ, ຂົງເຂດຍຸຕິທໍາທີ່ມີຄວາມຮັບຜິດຊອບໂດຍກົງຕໍ່ວຽກງານນີ້.

ບັນດາທ່ານທີ່ມີກຽດ, ປະຊາຊົນລາວບັນດາເຜົ່າທີ່ນັບຖື ແລະ ຮັກແພງ !.

ວຽກງານອະໄພຍະໂທດ ແມ່ນວຽກງານໜຶ່ງທີ່ມີຄວາມສໍາຄັນ ຊຶ່ງສະແດງໃຫ້ເຫັນແນວທາງນະໂຍບາຍອັນຖືກຕ້ອງ ແລະ ເປັນທໍາຂອງພັກ, ລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວເພື່ອໃຫ້ຜູ້ທີ່ຫຼົງຜິດໄດ້ກໍ່ສ້າງ, ປັບປຸງຕົນເອງໃຫ້ກາຍເປັນພົນລະເມືອງທີ່ດີຂອງຊາດ ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ; ສ້າງເງື່ອນໄຂໃຫ້ເຂົາເຈົ້າໄດ້ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດໃຫ້ມີຄວາມມັ່ງຄັ່ງເຂັ້ມແຂງ ປະຊາຊົນຮັ່ງມີຜາສຸກ, ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ.

ອີງຕາມລັດຖະທໍາມະນູນ ແລະ ລັດຖະບັນຍັດຂອງປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍການໃຫ້ອະໄພຍະໂທດ ສະບັບເລກທີ 001/ປປທ, ລົງວັນທີ 20 ມີນາ 2018 ແລະ ເພື່ອປະຕິບັດແນວທາງນະໂຍບາຍມະນຸດສະທໍານັ້ນ, ໃນແຕ່ລະປີລັດຖະບານໄດ້ຄົ້ນຄ້ວາ, ນຳສະເໜີອະໄພຍະໂທດ, ຜ່ອນໂທດໃຫ້ແກ່ນັກໂທດທີ່ເປັນຄົນລາວ ແລະ ຄົນຕ່າງປະເທດທີ່ມີການປະພຶດດີ, ມີຄວາມກ້າວໜ້າ, ຮູ້ສຶກກິນ ແໜງແຄງໃຈຕໍ່ການກະທໍາຜິດ, ຕັ້ງໜ້າຝຶກຝົນຫຼໍ່ຫຼອມຕົນເອງຕະຫຼອດໄລຍະເວລາປະຕິບັດໂທດ ແລະ ດ້ວຍແນວທາງນະໂຍບາຍດ້ານມະນຸດສະທໍາດັ່ງກ່າວ ທີ່ໄດ້ຈັດຕັ້ງປະຕິບັດຜ່ານມາຫຼາຍປີ ໂດຍແມ່ນຄະນະກໍາມະການອະໄພຍະໂທດຢູ່ແຕ່ລະຂັ້ນເປັນຜູ້ຄົ້ນຄວ້າ, ນຳສະເໜີຕາມຂັ້ນຕອນ ແລະ ລະບຽບການຢ່າງເຂັ້ມງວດ.

ປີ 2023 ນີ້ເປັນອີກປີໜຶ່ງທີ່ປະເທດເຮົາໄດ້ປະສົບກັບບັນຫາໄພທໍາມະຊາດທີ່ເກີດຂຶ້ນຢູ່ຫຼາຍທ້ອງຖິ່ນ ຊຶ່ງເຮັດໃຫ້ເກີດມີຄວາມເສຍຫາຍຫຼາຍພໍສົມຄວນ; ນອກຈາກນີ້ພວກເຮົາຍັງມີຄວາມຫຍຸ້ງຍາກທາງດ້ານເສດຖະກິດ, ບັນຫາໄພເງິນເຟີ້ ແລະ ການແກ້ໄຂຄວາມທຸກຍາກຂອງປະຊາຊົນ ເຮັດໃຫ້ພົບຄວາມຫຍຸ້ງຍາກໃນຫຼາຍດ້ານ; ເຖິງຢ່າງໃດກໍຕາມດ້ວຍຄວາມເອົາໃຈໃສ່ຊີ້ນໍາຈາກສູນກາງພັກ, ລັດຖະບານ ແລະ ຄວາມຮັບຜິດຊອບຂອງບັນດາສະຫາຍ ໄດ້ມີຄວາມພະຍາມຢ່າງຕັ້ງໜ້າ ແລະ ເຮັດສໍາເລັດໜ້າທີ່ດ້ວຍຄວາມຮັບຜິດຊອບສູງ; ໃນໂອກາດນີ້ຂ້າພະ ເຈົ້າຂໍແຈ້ງມາຍັງບັນດາທ່ານ ແລະ ປະຊາຊົນບັນດາເຜົ່າທົ່ວປະເທດຊາບວ່າ: ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ວັນທີ 2 ທັນວາ 2023 ຄົບຮອບ 48 ປີ (2 ທັນວາ 1975-2 ທັນວາ 2023), ຜ່ານການກວດກາ, ຄົ້ນຄ້ວາຢ່າງລະອຽດ, ຄົບຖ້ວນ, ຮອບດ້ານ ແລະ ພາວະວິໄສຂອງລະບົບຍຸຕິທໍາ; ລັດຖະບານໄດ້ສະເໜີປະທານປະເທດແຫ່ງສປປ ລາວ ອອກລັດຖະດໍາລັດ ວ່າດ້ວຍການໃຫ້ອະໄພຍະໂທດແກ່ນັກໂທດ ສະບັບເລກທີ 219/ປປທ, ລົງວັນທີ 21 ພະຈິກ 2023; ຕົກລົງໃຫ້ອະໄພຍະໂທດແກ່ນັກໂທດ ທັງໝົດ 1.824 ຄົນ, ຍິງ 238 ຄົນ; ຄົນຕ່າງປະເທດ 16 ຄົນ; ໃນນີ້ໃຫ້ອະໄພຍະໂທດ ດ້ວຍການຫຼຸດຜ່ອນໂທດ 1.602 ຄົນ, ຍິງ 200 ຄົນ, ຄົນຕ່າງປະເທດ 13 ຄົນ; ອະໄພຍະໂທດດ້ວຍການປ່ອຍຕົວ 222 ຄົນ, ຍິງ 38 ຄົນ, ຄົນຕ່າງປະເທດ 3 ຄົນ.

ປັດຈຸບັນນີ້ ກອງເລຂາຄະນະກໍາມະການອະໄພຍະໂທດລະດັບຊາດໄດ້ກະກຽມບັນດາເອກະສານຕ່າງໆ ເພື່ອຈັດສົ່ງໃຫ້ບັນດາຄະນະກໍາມະການອະໄພຍະໂທດລະດັບກະຊວງ, ນະຄອນຫຼວງວຽງຈັນ, ແຂວງ ເພື່ອພ້ອມກັນຈັດຕັ້ງປະຕິບັດໃຫ້ສໍາເລັດຕາມແຜນການທີ່ວາງໄວ້.

ຂ້າພະເຈົ້າໃນນາມປະທານຄະນະກໍາມະການອະໄພຍະໂທດລະດັບຊາດ, ຈຶ່ງຂໍແຈ້ງມາຍັງບັນດາທ່ານ, ປະຊາຊົນລາວບັນດາເຜົ່າເພື່ອຊາບກ່ຽວກັບການອະໄພຍະໂທດຕໍ່ນັກໂທດພາຍໃນ ແລະ ນັກໂທດທີ່ເປັນຄົນຕ່າງ ປະເທດປະຈຳປີ 2023 ແລະ ຂໍຖືໂອກາດນີ້ສະແດງຄວາມຂອບໃຈມາຍັງບັນດາສະຫາຍຄະນະນໍາສູນກາງພັກ ແລະ ລັດຖະບານ, ບັນດາສະຫາຍຄະນະກໍາມະການອະໄພຍະໂທດ, ອົງການປົກຄອງທ້ອງຖິ່ນທີ່ໄດ້ສະໜັບສະໜູນການເຄື່ອນໄຫວວຽກງານຂອງຄະນະກໍາມະການອະໄພຍະໂທດແຕ່ລະຂັ້ນ ໄດ້ປະຕິບັດສໍາເລັດໜ້າທີ່ເປັນຢ່າງດີ.

ຂໍຂອບໃຈ